2
1 छिमित मछिनी धकाः हे जिं थथे मवयेगु क्वःछिनागु खः। 2 छिमित जिं नुगलय् स्याकल धाःसा जितः सुनां लय्ताय्की? जितः लय्ताय्किपिं छिपिं हे मखु ला? 3 अय्जूगुलिं हे खः जिं व पौ च्वयाः छ्वयाहयागु। जितः लय्ताय्किपिंलिसे हे नुगलय् स्याके म्वाःलेमा धकाः जिं मवयेगु क्वःछिनागु खः, छाय्धाःसा जि लय्ताःसा हे जक छिपिं लय्ताइ धकाः जिं स्यू। 4 तसकं हे नुगः मछिंकाः दुःख तायाः मिखाय् दंक ख्वबि तयाः छिमित पौ च्वयाहयागु खः। छिमित नुगलय् स्याकेत अथे च्वयाहयागु मखु, बरु जिं छिमित गुलि माया यानाच्वनागु दु धकाः सीकेत जक खः।
दोषीयात क्षमा
5 सुनानं सुयातं नुगलय् स्याकूसा, जितः जक मखु बरु छिपिं फुक्कसितं नुगलय् स्याकूगु थें खः। जि छिमित यक्व बोझ कुबीके मास्ति मवः। 6 थुकथं व मनूयात छिपिं मध्ये यक्वसिनं सजाँय बी धुंकूगुलिं आः वयात सजाँय बी गात। 7 न्ह्यागु हे जूसां आः छिमिसं वयात क्षमा यानाः साहस ब्यु। थथे मयाःसा वं झन तसकं नुगलय् स्याकी। 8 थथे छिमिसं वयात माया यानाच्वनागु दु धकाः क्यँ धयागु जिगु बिन्ति दु।
9 जिं धयागु खँ छिमिसं मानय् याः ला कि मयाः धकाः स्वयेत जिं थथे च्वयागु खः। 10 थुकथं छिमिसं सुयात क्षमा याइ वयात जिं नं क्षमा बी। छाय्धाःसा जिं सुयातं छुं खँय् क्षमा याये माःसा छिमिगु हे निंतिं ख्रीष्टया न्ह्यःने यानाबी। 11 झीसं थथे क्षमा याःसा शैतानं झीत स्यंके फइ मखु। शैतानं झीत न्ह्याथे यानाः सां क्वथलेत स्वयाच्वंगु खँ झीसं स्यू।
त्रोआसय् पावलं धन्दा काःगु
12 ख्रीष्टयागु भिंगु खँ न्यंकेत जि त्रोआसय् वयाबलय् अन ज्या यायेत प्रभुं जितः लुखा चाय्कादिल। 13 अय्नं किजा तीतसयात लुइके मफुगुलिं जितः तसकं सुख मन्त। अय्जूगुलिं जि अनं बिदा कयाः माकेडोनिया वना।* २:१२-१३ प्रे २०:१
ख्रीष्टलिसे झीपिं नं त्याइ।
14 परमेश्वरयात सुभाय् दु, छाय्धाःसा ख्रीष्टलिसे तुं जिपिं नं न्ह्याबलें त्याना च्वनेत वय्कलं जिमित दया माया यानादीगु दु। अले जिमिगुपाखें भिंगु खँ नस्वाः थें न्यंकभनं न्यंकादीगु दु। 15 जिं न्यंकागु ख्रीष्टयागु भिंगु खँ परमेश्वरयात तःधंकेगु नस्वाः थें खः। थ्व मुक्ति काःपिं व नाश जुइपिनि दथुइ नं जिपिं परमेश्वरया निंतिं ख्रीष्टया नस्वाः खः। 16 नाश जुइपिनिगु निंतिं थ्व नवःगु नरक थें खः, मुक्ति काइपिनिगु निंतिं थ्व नस्वाःगु जीवन थें खः। थथे याये फुम्ह सु दु?
17 व्यापार याये थें जिमिसं परमेश्वरयागु भिंगु खँ न्यंकाच्वनागु मखु। जिमित परमेश्वरं हे छ्वया हयादीगुलिं ख्रीष्टया च्यःतय्सं थें जिमिसं खःगु खँ जक नवानाजुयागु दु।