Macoo
Kilɛ Jozaama pe pu wa wu Ja Yesu Kirisa kaa yu ge, Macoo wo nigama
Jɔgɔ wu ɲɛ Macoo wɛ?
Macoo bɛ wu bye Yesu wo tudunmɔɔ kɛ ni shuun wu ni. Girɛkii pʼa Macoo we yiri (Macoo 9:9-13), Heburuu ma jo Levi (Marika 2:14; Luka 5:27, 29). Wee Egilizi wʼa wii na wee wʼa Macoo Kitabu wu ka.
Fanhafɛɛ wari shɔvɔɔ wu bye wii. Na Yesu yaha ɲiŋɛ ke na wee tuun wu ni Yawutuu bi bye Oromɛ shɛɛn wo fanha ki nɔhɔ ni. Fanha ki bye kii Yawutuu pʼa munaa pɛrɛmɛ kaan. Saan wu bi ma pii ɲaha bulo pʼa munaa pɛrɛmɛ pu shuu Yawutuu pu mu. Tɛɛgɛɛ niɲɛhɛŋɛɛ funŋɔ ni piimu ɲaha saan wu bi ma bulo ge, Yawutuu pu ma bye pii. Pee kaa ɲɛ ma dan Yawutuu pusamaa ni wɛ, bani pʼa sɔɔ Oromɛ shɛɛn pu mu na kapyeŋɛɛ pyi pu mu. Pee fanhafɛɛ wari shɔvɛɛ pu pʼa bi sipyii pu ŋmahana, na la faraa munaa pɛrɛmɛ pu bɛ na, kɔnhɔ pu bɛ di bye lafɛɛ. Yawutuu pu bi pee wii koŋɔ ke bɛɛri wo jurumu fɛɛ. Ga Yesu ya ɲuŋɔ ɲaari Macoo na, na wu yiri.
We Jozaama Kitabu we kakana ɲuŋɔ
Macoo ya we Kitabu we fanha ɲɛhɛ Yawutuu shizhaa na. Wu sɛmɛ wu kaɲugbɔhɔ ki ɲɛ na: Yawutuu pu wo saan wu ɲɛ Yesu, wemu wo ɲɔmɛɛ Kilɛ tudunmɔɔ pʼa lɔ ge.
Macoo ya Yesu kalaa wu taa tayereye kaguro: 1 Faaboboŋɔ ki ɲuŋɔ wo kalaa we (Macoo 5—7). 2 Yesu ya piimu tun pu shɛ Kilɛ saanra ti kaa jo ge (Macoo 10). 3 Fugba saanra ti wo taleŋɛɛ (Macoo 13). 4 Sipya ɲiifɛɛrɛ pyegana wu cebooloo nʼa daa fɛɛ tɛ ni (Macoo 18). 5 Kalaapiire ti na já Yesu cabaŋa caŋa sige sigegana lemu na ge (Macoo 24—25).
Jozaama Kitabu wu kafila ɲugbɔyɔ
Macoo 1—2 Yesu Kirisa nɔhɔ tayirige ni wu se se keree.
Macoo 3:1—4:11 Yohana Batizelipye wo Kilɛ Jomɔ yɛrɛ ni Yesu batizeli ni wu nɔwuuro.
Macoo 4:12—18:37 Yesu wo labye we Galile fiige ki ni.
Macoo 19—20 Yesu nigariwo Zheruzalɛmu ni.
Macoo 21—28 Yesu wo labye we Zheruzalɛmu ni. Pʼa wu she wà, na wu co, na wu gbo. A wʼi ba ɲɛ.
1
Yesu Kirisa nɔhɔ tayirige sɛmɛ
(Luka 3:23-38)
1 Yesu Kirisa nɔhɔ tayirige sɛmɛ wʼa we. Yesu ya foro saannaa Dawuda shi ni, Dawuda dʼa foro Ibirayima shi ni.
2 Ibirayima wʼa Ishaaga se.
Ishaaga di Yakuba se.
Yakuba di Zhuda ni wu ceboronamaa se.
3 Zhuda di Fɛrɛsi ni Zara se, pu nu wu bye Tamari.
A Pɛrɛzi di Ɛsirɔmu se,
Ɛsirɔmu di Arami se.
4 Arami di Aminadabi se.
Aminadabi di Nasɔn se.
Nasɔn di Salimɔ se.
5 Salimɔ di Bowazi se, wu nu wu bye Araxabi.
Bowazi di Obɛdi se, wu nu wu bye Wuruti.
Obɛdi di Zhese* Zhese: Wee ninumɔ pʼa byi Izayi. se.
6 Zhese di saannaa Dawuda se.
Saannaa Dawuda di Solomani se, wee nu wu bi fɛnhɛ pye Uri shɔ.
7 Solomani di Orobowamu se.
Orobowamu di Abiya se.
Abiya di Azafu se.
8 Azafu di Zhozafati se.
Zhozafati di Zhoramu se.
Zhoramu di Oziyazi se.
9 Oziyazi di Zhowatamu se.
Zhowatamu di Akazi se.
Akazi di Ezekiyasi se.
10 Ezekiyasi di Manase se.
Manase di Amɔ se.
Amɔ di Zhoziyasi se.
11 Zhoziyasi di Zhekoniya ni wu ceboronamaa se. Wee tuun wu ni a pʼi Izirayɛli sipyii pu co na kari Babilɔni ni.
12 Pee sipyii pu na co xɔ na kari Babilɔni ni,
a Zhekoniya di Salacɛli se.
Salacɛli di Zorobabɛli se.
13 Zorobabɛli di Abiyudi se.
Abiyudi di Eliyakimu se.
Eliyakimu di Azɔri se.
14 Azɔri di Sadɔki se.
Sadɔki di Akimu se.
Akimu di Eliyudi se.
15 Eliyudi di Eleyazari se.
Eleyazari di Matan se.
Matan di Yakuba se.
16 Yakuba di Yusufu se.
A Yusufu di bye Mariyama poo we. Yesu we wʼa yiri Kirisa ge, a Mariyama di wee se.
17 Shi wu segee kɛ ni shishɛɛrɛ wu ɲɛ Ibirayima ni Dawuda tɛ ni. Lee kadugo na a shi wu segee kɛ ni shishɛɛrɛ di bye Dawuda ni Izirayɛli shɛɛn coduun wu tɛ ni na kari Babilɔni ni. A shi wu segee kɛ ni shishɛɛrɛ di bye na lɔ wee tuun wu na na pa gbara Yesu seduun wu na.
Yesu Kirisa segana
(Luka 2:1-7)
18 Yesu Kirisa segana li le. Wu nu Mariyama wu bi bye Yusufu curɔ. Ga na pu yaha pu sanha binnɛ ɲa wɛ, a Fɛfɛɛrɛ Munaa sefɛɛrɛ di digi Mariyama na, a wʼi yere yacɛrɛ na. 19 Wu curɔ Yusufu wu bye sipyitiimɛ, wu funŋɔ bye wu Mariyama mɛgɛ kyɛɛgi wɛ. A wʼi li kɔn wuyɛ funŋɔ ni na wʼi tee curɔrɔ te kyɛɛgi ŋmɔhɔrɔ ni. 20 Na Yusufu yaha ni kee fungɔngɔ ki ni, a Kilɛ wo mɛlɛkɛ wa di ba wuyɛ shɛ wu na ŋmunɔgɔ ni, na yi jo wu mu na: «Dawuda ja Yusufu, ma ganha bu fya Mariyama leŋɛ na wɛ, bani Fɛfɛɛrɛ Munaa sefɛɛrɛ ni wʼa yere yacɛrɛ na. 21 Wu na ba funana se, mʼa lee mɛgɛ le Yesu, bani wu na ba wu sipyii pu shɔ pu jurumu wu na.»
22 Kee keree ki bɛɛri ya pye mu, kɔnhɔ Kafɔɔ Kilɛ bi yemu jo wu taatuunnɔ li wo Kilɛ tudunmɔ wu ɲɔ ni ge, yee ɲɔ di fa na:
23 «Li wii, doɲiŋɛ fucɛri nacɛbaa na ba yere yacɛrɛ na,
na funana se. Li mɛgɛ na le na ‹Emanuwɛli,›»* Ezayi 7:14
lee kɔ́ri ɲɛ «Kilɛ ɲɛ wèe niŋɛ ni.»
24 Ba Yusufu ya yìri ŋmunumɔ pu na wɛ, na li pye na bɛ ni Kafɔɔ wu mɛlɛkɛ wu wo kafilajo wu ni. A wu Mariyama furu pɔ. 25 Ga pu ya pinnɛ ɲa wɛ, fo na shɛ Mariyama pye wʼa tigi wu funazhiire na. A Yusufu di pya wu mɛgɛ le Yesu.