Uţup wi Pawulu apiiŧuŋ
banfiyaaruŋ banfëţuŋ du uŧaak wi
Efeŧ
Uţup Ujuni
Ulibra wi uwo kakaarta ki Pawulu apiiŧuŋ banfiyaaruŋ Kriŧtu biki Efeŧ. Kë aşë wo aampiiŧ wa pa bukal ţañ ţiki ţi ŋlibra ŋŧeek baanţu katim ki Efeŧ du ujuni. Uhina kawo kë Pawulu apiiŧ wa banfiyaaruŋ biki ŋbeeka ŋŧum ţi Aŧiya bahil baji woli baleyiiri bawul bandukiiŋ baleyiir. Apiiŧ kakaarta ki wi awooŋ ukalabuş du Rom. Efeŧ dawooŋ ubeeka unlilnuŋ ţi ŋbeeka ŋi Rom daşihuŋ bŧi ŋanwooŋ ţi Aŧiya. Bañaaŋ baŧum ţi biki Efeŧ bawo bawaap. Baniwar Artemiŧ unŧoŋ wi bajaaŋ badëman katoh kanuura. Artemiŧ mënţ awo ptu, awo ñaaţ. Ţi katoh kanuura mënţ ki ki bajaaŋ baya pdëmana. Bañaaŋ banwooŋ da bŧi baji badëman unŧoŋ mënţ, Bayuday na banfiyaaruŋ Kriŧtu ţañ bawooŋ baanji badëman wa. Uko wi Pawulu adiimanuŋ ţi kakaarta ki wii wi : Naşibaţi ado nja kë ŋme uko ummeniiŋ wi adoluŋ ţi bnuura bi nul. Uwooŋ kë ado iko bŧi inwooŋ du baţi duuţ na ţi mboş iwo ţi pşih pi Yeŧu Kriŧtu. Akak aţup aji banfiyaaruŋ Kriŧtu bawo kaŧiinkar kawo ji banţaaruŋ. Uunka pdo kaji i awo nayuday kë undu aanwo nayuday. Naşoorad baka bukal batëb bŧi awo aloolan, Ŧatana a. Bawo keeri kanaakiir kañehan Naşibaţi. Pawulu akak aţup jibi ñaaŋ awooŋ kaţijan aharul, jibi bapoţ bawooŋ kaţijan başin baka na jibi bajuuk ţi ulemp bawooŋ kaţijan bankaaŋ baka. Aji banfiyaaruŋ Kriŧtu bawo kawo ţi ploolan na a.
Hënk di ifah yi ulibra wi iwooŋ:
1. Pwul mboş (1.1-2)
2. Kriŧtu awul nja bnuura na Uhaaş wi Naşibaţi (1.3–3.21)
3. Pka ubida uhalu na Kriŧtu. (4.1–6.20)
4. Pwul mboş pbaañşaani (6.21-24)
1
Pwul mboş
1 Nji *Pawulu, i Naşibaţi adoluŋ kë nwo nanjañan i Yeŧu *Kriŧtu, dwul mboş biki ubeeka wi Efeŧ banwooŋ biki Naşibaţi abot afiyaar Yeŧu Kriŧtu na manjoonan. 2 Dñehan Naşibaţi Aşin nja na Yeŧu Kriŧtu Ajugun bawulan bnuura babot bajoobţënan ŋhaaş.
Bnuura bi ŋkaaŋ ţi Kriŧtu
3 Najoh ŋdëman Naşibaţi Aşin Yeŧu *Kriŧtu Ajugun, aţëpna ţi uhaaş wi nul awul nja iko bŧi inuura yi baţi inknţënkuŋ nja ŋdo kaţaşa, ţiki ŋkak amëbandër na Kriŧtu. 4 Ji umundu ubi udo kapaşana, Naşibaţi aţëpna ţi Kriŧtu adat nja ŋhilna ŋwo ţi kadunul bañaaŋ bajinţ piş banwooŋ baanwo na nin buţaan bloŋ. Aŋal nja ukaaŋ kë 5 aţëpna ţi Yeŧu Kriŧtu ji ŋbi ŋdo kabuka ajej nja kë ŋwo babukul. Uko waŋ wi wi aŋaluŋ pa nja ţi pjoob bkow pi nul. 6 Najoh keeri ŋyeeh mndëm mi nul na bnuura bweek bi aţëpnuŋ ţi Kriŧtu i amaganuŋ, awul nja.
7 Kriŧtu atul tul pñaak pi nul ukaaŋ kë ŋbuuri, kë ipekadu yi nja ibot apën. Hënk, Naşibaţi ayuuj pdëm pi bnuura bi nul. 8 Awul nja ba aŧuman wi awuluŋ nja uşal unŧuŋa na mntit bŧi 9 mi pme uko wi aŋaluŋ pdo, wi ñaaŋ awooŋ aambaaŋ kame'aara. Naşibaţi ajon nŋal pdo uko mënţ ţi Kriŧtu. 10 Wi wal wi adatuŋ ukbanuŋ uko mënţ udolana : aţonkrën iko bŧi na bañaaŋ bŧi banwooŋ du baţi na mboş kaşë kaţu Kriŧtu awo naşih.
11 Ŋkak ayeenk ţi Kriŧtu iko bŧi yi Naşibaţi ahoŋuŋ. Ul anjaaŋ ado iko bŧi jibi anumiiŋ, adatun ji ŋdo kabuka, 12 pa un ŋnŧaruŋ ahaţ ţi Kriŧtu ŋţu bado kayeeh mndëm mi nul. 13 An kak namëbandër na Kriŧtu wi naŧiinkuŋ uţup wi manjoonan, Uţup Ulil Unuura unkbuurananaŋ. Kë wi nafiyaaruŋ, Naşibaţi awulan Uhaaş wi nul wi ahoŋuŋ kadiiman kë nawo biki nul. 14 Uhaaş wi nul uwooŋ uko ujuni wi iko yi ahoŋuŋ aji aluŋ kawulan. Iko mënţ ŋyeenk ya wal wi Naşibaţi akbuuranuŋ nja ţi buţaan bŧi. Najoh ŋyeeh mndëm mi nul.
Pawulu añehandër banfiyaaruŋ
15 Ukaaŋ wi nŧiinkuŋ kë bakţiiniyaan pfiyaar pi nafiyaaruŋ Yeŧu Ajugun na jibi naŋaluŋ bañaaŋ bŧi banwooŋ biki Naşibaţi, 16 kë mbi duka duka ţi pbeeb Naşibaţi ţi uko wi nan, kabot kaleşan wonţi dñehana. 17 Dñehan Naşibaţi i Yeŧu Kriŧtu Ajugun, Aşin nja anwooŋ ajug mndëm awulan Uhaaş wi nul unkţu'anaŋ nawo bañaaŋ banwooŋ na uşal unŧuŋa ubot uyuujan Naşibaţi bnuura nahilna name'a. 18 Dñehan kak Naşibaţi ajeehanan ŋşal nahilna nayikrën phaţ pankaaŋ kë adu'an, nabot name pdëm pi pyok pi ahoŋuŋ bañaaŋ banwooŋ biki nul, 19 nabot nayikrën pdëm pweek maakan pi mnhina mi adoluŋ kë manklempar nja, ŋnfiyaaruŋ Kriŧtu.
20 Mnhina mënţ, adiiman ma bŧi ţi Kriŧtu wi anaţanuluŋ ţi pkeţ abot aţoorana ţi kañen kadeenu ki nul du baţi. 21 Adola kë apel bnuura başih bŧi, baweek bŧi, mnhina bŧi, na bankşihuŋ bŧi. Ayeenk katim kampeluŋ itim bŧi yi bahilanuŋ katiman ţi umundu wi na unkmbiiŋ. 22 Naşibaţi aţu iko bŧi na bañaaŋ bŧi ţi ihoţ yi Kriŧtu uţeeh pa aşih ya, abot adola kë awo naşih i banfiyaaruŋ bŧi ; 23 bukal bawooŋ uleeful. Kriŧtu aţuuŋ mnhina mi nul ţi baka aŧuman, ul ajaaŋ awul iko bŧi ţi umundu ubida kaŧuman.