1 Ŋìnó a ye tí kpo ꞌduù mì yo tí ndâ mbe kû kili ta ṛè mì Bìndi-Mbíṛì ká kû cu wáràgà tí no ji wò tí niì tí nó náa Mbíṛì cu ꞌbì wó mítí lo gî nó, delè ji ndâ ꞌviì mì lo. Ye zè yo nìkì maa ta yúcó. À delè me káa ye ta kpéétí ye ká kû zè yo nìkì maa lá, ndâ ꞌduù ŋìnó mbe ŋò yúcó ni gî nó delè ꞌdáá gî kû zè yo nìkì maa. 2 Tacó yúcó kuu gbí njembí ndoo; yúcó delè bà dù gbí njembí ndoo dúú bà ya tí . 3 Ye kû ꞌdeke tí ye ji Bu ndoo tí Mbíṛì, ye delè kû ꞌdeke tí ye ji Jézù tí Bìndi-Mbíṛì, tí ꞌViì mì Bu ndoo tí Mbíṛì máa, ndú ꞌví bàkà nambeè ji yo, ndú ꞌví ŋò yê ṛo yo, ndú delè ꞌví si yo ꞌví dù nìkì maa ta ṛè mì yúcó, delè ta ṛè mì bà zè tí nìkì maa.

4 Tàkòcò ye giì peteke ta bà ꞌdi có énó máa, ndâ ꞌviì mì lo kû co tí kpokèjì mì yúcó á go có tí nó náa Bu ndoo táánò ꞌdè ji ndoo nó, ngé ndii gî. 5 Ye kpónó kû cu wáràgà tí nó ji wò me tacó bà ꞌdè ꞌbí ngú có ji wò lá, naà. Ye kû ꞌva a mbí lo gítí có tí nó náa ndoo ꞌdi ꞌdo tí o bà ꞌbìtà bà dù ndoo tí ndâ mbe ùnje gítí Bìndi-Mbíṛì nô. 6 Bà zè tí nìkì maa a bà ꞌvala go ndâ có mì Mbíṛì. Ŋìnò a có náa yo ꞌdáá gî ꞌdi ꞌdo tí o bà ꞌbìtà bà dù yo tí ndâ mbe ùnje gítí Bìndi-Mbíṛì, máa, yo ꞌdáá gî ꞌví ꞌvala ta bà zè tí yo gbí òkò tí yo nìkì maa nô.

7 Ndâ mbe kû eendi ndâ ꞌduù me mbè kpónó kuu muu to tí nô. Ndú biya bà ùnje énó máa, Bìndi-Mbíṛì táánò gì gí muu to tí nó ta dìì wó tí ꞌduù nò gî. Káa ꞌduù ta ŋa có tí nò gbí muu wó a mbe kû eendi ndâ ꞌduù, yí delè a mbe kû jòò gbí có ta Bìndi-Mbíṛì. 8 Má énò, yo kpolo tí yo, tacó wàa, yo ꞌví bàkà sé nèté mítí yo sínò lá. 9 ꞌDuù má ndii muu i tí nó náa Bìndi-Mbíṛì nìbà  nó gî, Mbíṛì mì ꞌduù tí nò wálá. Káa ꞌduù má ꞌvala go có tí nò, ndâ Bu ndoo tí Mbíṛì ta ꞌViì mì wó kuu tàkò wó. 10 ꞌDuù má gì gí ꞌbá mì yo ta ꞌbí ŋa tende bà nìbà i, yo ꞌví si yí ꞌví dù á ꞌbá mì yo lá, yo delè ꞌví ꞌvee ꞌbì wó lá. 11 Tacó mbe kû ꞌvee ꞌbì wó a ka wó, náa ndú gbí bà bàkà vò nèté tí nò ta yí.

12 Ndâ có kuu mì ye me mbè tacó bà ꞌdè ji wò, káa ye koṛo có máa, bà cu ndú ta wáràgà bà dù me tó kpokèjì ngé ndii gî lá. Tacó énò, a gbí muu ye a có bà ya ꞌdóó ye ta miṛi ye gí kà, wàa ye ꞌví ꞌdè ndú ji wò ta nje ye, tacó tàkòcò ndà só ꞌví peteke gî.

13 Ndâ ꞌviì mì náꞌvindí lo náa Mbíṛì cu ꞌbì wó mítí wó gî nó ꞌvee wò ma.