Sam Kranzpnu-li-nrade-rlimz (27)
Nim Mevalu Rnge X Trpnzngr Kx Namwxlrtix
Nabz ne Devet kx yrbzle mz kxrmailz ngr dzbe kxnzngrng.
Lrpalvc Nyznge
1 Yawe, nim Mevalu rnge kx arlapx-zvzle ninge. X trpnzngr kx namwxlrtix.
Trnarnrcti-lzbq-ngrneu murde nim lrpalvc nyznge.
2 Mzli kc kxdrka'-ngrng natz-ngrdr ninge mz nznibq-krdr ninge,
Enqmi lcng sa nataong.
3 Kxmule-esz' ami kxetu navzm mz nzoti-krmlr ninge, a' trpnzngr nzmwxlr-krnge.
X kxmule-esz' otakr badr, a' drtwrnge sc tqabrtr-zvzbo bam.
Ma Nyzm
4 Yawe, da kx rlxtitxpwo bam nide sele: Sutitx zlwz drtwrnge nzmnc-zvz-krnge mz ma nyzm.
Murde naxngi-zvzbo nzulr nzmyalz-krm mz nzaoti-zvzkr drtwrnge me pnz drtwrm.
5 Murde krlzx kx sa na-aclve-angidrq ninge mz mzli r nzkxpu-krnge.
X na-amnc-kapqq ninge mz Mangr-nzangiongr nim, mz nzngini-krm butqbr kx rlakitrx.
6 Sa nabatrpe' nzaovxio-krnge enqmi lcng tztu-ngalelvzlr ninge.
X sa namalq-zlwzx nzka-krbo bam blz mz Mangr-nzangiongr nim.
X nangr-ngrbo bam nabz ngr nzawingr.
Nzkrka'-krnge
7 Yawe, xlrm nzkrka'-krnge mz nzkqle-krnge nim.
X nayc mz drtwrm ninge mz nzayzlu-krme natqnge.
8 Mzli kc tqrpi-ngrme kx, “Vzm mz nzangio-krm ninge.”
X ayzlubo natqm kx, “Eu, ninge la navzbo.”
9 Delc, bzkq mnc-rlrume bange. Ninge kxnzawz nem.
X bzkq esablqtiq ninge mz nzngyatikr drtwrm ninge.
Murde okatr-zvzq ninge mzli kc.
Mevalu rnge, bzkq pxtxpx-ngrn ninge mz nzaxtx-krm ninge.
10 Kxmule-esz' trtenge x lxenge nzaxtxtxdr ninge,
A' nim la tqaclve-angidrq ninge.
Nzti Kx Tubq
11 Alvztrp nqmq krmqng bange.
X mailz ninge mz nzo-zli-zvz-krnge nzti kx tubq murde enqmi rngeng sa tzaukztilr ninge.
12 Bzkq rlr-ngrbzme nzlolvz-krdr ninge.
Nzpokiatitrlr ninge x nzamwxlr-ngrdr ninge mz nzycmne-zngya-krdr.
13 Yawe, krlzpex kx nzmrlz-zlwz-krm
Sa nakrlzmle ninge mzli ka mz nrlc.
14 Mzlengeng, na-abrtr-ngrbzku drtwrgu mz Yawe.
X naxplrku mz nzlxngiti-krgule.
Bzkq matitr drtwrgu nide,
A' drtwrgu na-abrtr-zvzbzku bade.