1 Mzli kc tqrblxtxpe nzaenzli-krgr x tqxngitr-zlwzkr nzmnc-rlru-krmamu bagr, sc tqaotipe drtwrgr kx nigr badr Saelas namnc-txpwzkr taon kc etu Atens, 2-3 x na-atwzlr-ngrbzkr Timoti bamu. Nide mzlegr kx wzkr badr mz nzwztr-krbzkr Gct. Okatrle nigr mz nzyapwxtipx-krbzle Nrpa ngr Kraes. X atwzlr-ngrbzkr nide murde na-axplrle nimu x na-apqtrpzle nabzmu. Murde ma nzrlxngiti-krmu tqrnrc mz nzkxpungr kcng tqprtzmqng bamu mzli ka. Murde krlzpeamu kx da kxmule lcng naprtzmqng bagu. 4 Murde pi-pnzbzkr ena bamu mzli kc tqmnc-ngrgu, kx leplz sa na-atrkatilr nimu kalr. X mzli ka da kc tqpi-ngrbzkrle sc tqtutrpe. 5 Mz nzmu-krde lcde, mzli ka rblxtxpe nzaenzli-krgr, delc tqatwzlrpe-kai-ngrbo Timoti bamu, murde nakrlzx kxmupe nzrlxngiti-krmu. X mwxlrlvzx nimu murde ma tqataole nimu Setzn, x nzwz-krgr sc tqngipe brmrda.

6 A' mzli ka Timoti yzlupe-mop bagr x lemle bagr nrpa ngr nzrlxngiti-krmu x nivz lrmu. Pimle bagr kx dcpx zvz mz drtwrmu nigr x sutitx zlwz drtwrmu nzmc-krmu nigr, da kc tqwai-kzkr nzsutikr drtwrgr nzmc-krgr nimu. 7 Mz nzmu-krde lcde, kxmule-esz' nzatrkatilr nigr mz da kxkqlu, a' apqtrle drtwrgr nzxlr-krgr nrpa ngr nzrlxngiti-krmu. 8 X mnc-zpwxpekr mz nzxlr-krgr nzlolvz-amqngi-krmu Kxetu rgu. 9 X rblxm bagr nzpipx-krgr natq ngr nzawi-krbzkr mz Gct mz nzetukr nzabrtzlvz-krgr nimu. 10 X nzkrka'-krgr pq zvz, ngrlx x nrlckxbq. Krka'-ngrgr kx namc-moukr nimu x na-alvztr-ngrbzkr bamu da amrlx kcng tqmrbrpxm mz nzrkrlz-krmu nzrlxngiti-krgu.

11 Krka'ngr mz nzrpi-krgr kx,

“Gct Trtegr x Kxetu rgr Jiszs, rlxtibzkr bamu naoliqtipxbzmu lrpzki kc nakrlz-ngrbzkr lr Tesalonika. 12 X krka'-kz-ngrgr kx na-aetunepxbzmu nivz lrdr mz nzmrlzti-lzbq-krdr x nzmrlzti-krdr leplz amrlx, x namrlztilr leplz da kc tqwai nzmrlzti-krgr nidr. 13 Trte, axplr nabzdr, murde natrng x natubqng mz nzobq-krm, myapxbz mzli kc Kxetu rgr Jiszs nayzlu-ngrmlr badr leplz kxnztr nedeng. Eu. Angida!”