1-2 Aeꞌ Pol aposel Jisas Kraisi andaꞌ maol ananini. Okom Godi atom nofale nandandepe andaꞌ maol inimba. Aeꞌ aloma owamapa Sostenes wape naꞌaꞌe wasapaꞌ dagala nemaf buꞌwafi nefeꞌmago ipaꞌ amam nematawa Kristen sios pagape Korini. Eaꞌ andaꞌ basef ifimba fafeꞌmago ipaꞌ. Ipaꞌ pagape sisihipama Krais Jisasi, God nandaꞌepa pape hililiꞌ nofalepa nosahoꞌepa eaꞌ ananipai atipa. Afaꞌ biafa waseꞌepa dagala ipaꞌ paloma epes hiasi ma walemb hielimbi sogofala agol Dembinai apeꞌinai Jisas Kraisi, anen dembinai ma apaꞌ, esis wapani.* Ro 1:7; 1 Ko 6:11; Ap 9:14

3 Afaꞌ biafa waꞌi God apeꞌinai noloma Dembinai apeꞌinai Jisas Krais mondaꞌago ipaꞌ andeandeꞌ mumafipa motopalopago opalef ipeꞌilifi fepe saꞌombel.

4 Aeꞌ anifela God dondola ipaꞌ. Deiꞌ main, ipaꞌ pagape sisihipama Krais Jisasi. Eaꞌ God notopalopepa dowafa pegape andeandeꞌma anen atona. 5 Ipaꞌ pape sisihipama Krais pape andeandeꞌ aꞌowa eaꞌ pefaꞌ basef hiafi pagaꞌiefi faloma gawa hiani buꞌwani. 6 Deiꞌ main, basef ifimba buꞌwafi Kraisi afaꞌ wagawalapafi fataga alihif fandawalap banagambela opalef ipeꞌilifi siꞌilif.* Lu 17:30; 2 Te 1:7; Ta 2:13 7 Eaꞌ deiꞌ ipaꞌ pape ukup pehafa dembinai apeꞌinai Jisas Krais anaf nogataga alihina. Afamba pape pehafana apefaꞌ presen hiani Ambal buꞌunai Godi nagaseꞌepan dowafi hiꞌalan. Ina anin akepa, owaꞌatin.* Fl 1:6; 1 Te 3:13, 5:23 8 Jisas Krais atiasi nowaꞌ banagaepa ma pegape banagepa atipipa pefeꞌ pegatagama nemaf afamba Dembinai apeꞌinai Jisas Krais nogafiꞌafii ma diga basef kofagesa akepa nemaf afamba.* 1 Jo 1:3; 1 Ko 10:13; 1 Te 5:24 9 God nandaꞌ hiahawes ananisi hiꞌalas datimai nofalepa ma pegape opaf atof pegaloma Nogamana ananinai Jisas Krais Dembinai apeꞌinai.* Fl 2:2

10 Apaꞌ ipaꞌ sahin owan, aꞌipipa banagoga ma agol Dembinai apeꞌinai Jisas Kraisi naꞌamba. Ipaꞌ pendape miniꞌap atetep endilisi pindaila nomonas atifisa okom atotom. 11 Ipaꞌ sahin owan aeꞌipai, esis miniꞌap Klowei saꞌipi saꞌi ipaꞌ pandaꞌ migimigah sape laꞌafena ipaꞌ.* 1 Ko 3:4; Ap 18:24-28; Jo 1:42 12 Aeꞌ aꞌi isimba, ipaꞌ hipai atona atin pagaꞌias naꞌamba. Anis saꞌi, “Apaꞌ miniꞌap Poli.” Anis saꞌi, “Apaꞌ miniꞌap Apolosi.” Eaꞌ anis saꞌi, “Apaꞌ miniꞌap Pitai.” A anis saꞌi, “Apaꞌ miniꞌap Kraisi.”

13 Ipaꞌ pandaꞌas naꞌamba ma main? Ipaꞌ paꞌi Krais nandawal waꞌawaꞌana? Eaꞌ paꞌi aeꞌ Pol sandele lawag usiꞌigai tiꞌwanaegai ma agatopalopepa? Owaꞌatin endilisi. Ipaꞌ ina pefaꞌ baptaisa agol aeꞌ Poli, owaꞌatin.* Ap 18:8; Ro 16:23 14 Aeꞌ andaꞌ baptaisima amam amamba ipeꞌimi biam Krispusi Gaius atom. Anis epes ipeꞌisi daias, owaꞌ. Aeꞌ anifela Goda ina andaꞌ baptaisima anis ipeꞌisi wapani, owaꞌ. 15 Eaꞌ isimba deiꞌ anin epen ina niꞌipipa niꞌi ipaꞌ pefaꞌ baptaisa agol aeꞌagili, owaꞌ.* 1 Ko 16:15 16 Endilisi, andaꞌ baptaisima esis wambota Stefanasi wapani, apaꞌ aeꞌ ina okom mandandaꞌma anis wapani, owaꞌ.* Mt 28:19; Jo 4:2 17 Deiꞌ main, Krais ina nasapaꞌe afiꞌima endaꞌ baptaisima anis epes, owaꞌatin. Anen nasapaꞌe ma ewalapa basef buꞌwafi Godi igaꞌif. Aeꞌ ina ewalapa basef ifimba iꞌif ila anin gawa amom gawaimi magaꞌiani, owaꞌ. Naꞌamba epes siꞌi basefa lawag usiꞌigai tiꞌwanaegai Krais nagagaꞌagai siꞌi basef ifimba owaꞌ banagafia falafifi atif.* 2 Ko 4:3; Ro 1:16

18 Endilisi, epes isimba sagape ufiaꞌw higiligalasaꞌwi, esis ukup pandandaꞌma basefa lawag agamba usiꞌigai tiꞌwanaegai sagandola Kraisagai saꞌi basef ambamba falafumi atom putuputaꞌimi. Apaꞌ amam nematawa deiꞌ God nape nofaꞌapa nakwahomapa waf awafi mogotanimaii eaꞌ mogawa basef amamba banagami Godi atom.* Ais 29:14

19 Baibel nagaꞌias naꞌamba naꞌi, “Anaf aeꞌ ehambombaga gawa esis isimba gawaisi. Eaꞌ elefata nomonas epes isimba gawaisi sagaꞌi nomonas sasisasi hiahiasii sagapaisi.”* Ais 19:12; Ais 33:18; Ais 44:25; Jop 12:17

20 Deiꞌ amom gawaimi mondandaꞌ miꞌimama? Eaꞌ amom gawaimi mogogawa gawa hianii mondaꞌ main? Eaꞌ epes isimba itap apaꞌisi saꞌi basef sapaꞌef sandahihianamaifi sondaꞌ mamahisa? Owaꞌatin. God nandaꞌ gawa epes isimba itap apaꞌisi nataga falafalafini siꞌi epes isimba sahaga sagagaoli.* Mt 11:25

21 Deiꞌ main, epes itapasi ina laꞌifisa sogogawa Goda gawa inimba asasini atin, owaꞌatin. God anen gawainai eaꞌ nasopamasa ufiaꞌw asasiꞌwi. Eaꞌ anen okom mandandaꞌ naꞌi nofaꞌai amam nematawa sogahapifanai sotanimai. Esis sahapifa basef ifimba wagaꞌipasafi epes itapasi sagaꞌi wafifi gawa akafi.”

Eaꞌ God nofaꞌas sotanimai.* Mt 12:38; Ap 17:28,32 22 Esis Juda ukup paipaila sigati maol banagani atin siꞌi God nandaꞌani apaꞌ esis Grik ukup paꞌipaꞌi sogofaꞌ gawa hiani luꞌwani.* Ro 9:32; 1 Ko 2:14 23 Apaꞌ afaꞌ wawalapa basefa Krais nagagaꞌ lawag usiꞌigai tiꞌwanaegai. Basef ifimba fahambombaga ukup esis Judai. Apaꞌ esis Grik ukup pandandaꞌmef paꞌi amamba basef wafimi gawa akami.* Kl 2:3 24 Apaꞌ amam nematawa God nogofalapai, esis Juda saloma anis Grik wapani, basef ifimba faꞌi Krais anen banagami gawa Godi.* 2 Ko 13:4 25 Deiꞌ main, basef amamba Godi epes sagaꞌi “Gawa akami wafimi”, amamba gawaimi atom luꞌwami mikilaꞌ gawa epesi. Eaꞌ hiahaom amamba epes sagaꞌi “Awanami falafumi Godi”, amamba banagem aꞌowaꞌ mikilaꞌ banagami epesi.* Mt 11:25; Jo 7:48; Je 2:1-5

26 Alipipai aeꞌipai, ipaꞌ ataꞌ ukup pendandaꞌma fowaꞌ dambadamba God nogofalepa ma pagataga Kristen. Ipaꞌ hipai ina anis epes hiasi laꞌafena ipaꞌ gawaisi ma itap anaꞌe, owaꞌatin. Owaꞌ anis hiasi agof luꞌwagufisa. Eaꞌowaꞌ anis hiasi dembesi banagasia, owaꞌ. 27 Apaꞌ God okom ananimi atom nandandepa anis epesa sogape ananisi atis. Epes isimba esis amam nematawa itapasi sagaꞌi gawa akasi, apaꞌ God nandandepas eaꞌ ma nogaha iwana epes gawaisi. Eaꞌ epes isimba itapasi hiasi sagaꞌi falafalafisi owaꞌ banagasia, isimba God nandandepas eaꞌ ma nogaha iwana epes isimba dambesi banagasi. 28 Anen nandandepa epes isimba amam nematawa itapasi sagaꞌi owaꞌ fasisia, falafisi atis dowafi agof akasi. Ahoꞌ, anen nandandepasa nogahambombaga hiahaom amamba banagami mogoloma epes isimba banagasi agufisi itap anaꞌiisi.* Ro 3:27; Ef 2:9 29 Nandaꞌas naꞌamba ma anin epen ina laꞌifina negasaꞌma agol ananigili atogol luꞌwagola naep Godi, owaꞌ.* Jer 23:5-6; Jo 17:19; 2 Ko 5:21 30 God nahapona ipaꞌ pape sisihipama Krais Jisas eaꞌ nandaꞌ anen nape kofagonama gawa apeꞌinii. Anen atona ufiaꞌw apeꞌikwi ma God nandaꞌapa mogape beꞌepa hililiꞌi ma naep ananipi ma mogape ananipai atepa. Anen atona natalepa nakwahepa ma waf awafi ma magape wahifipa.* Jer 9:24; 2 Ko 10:17 31 God nandaꞌam naꞌamba ma anif basef fagail Baibeli fetaga fendawalap. Basef ifimba fagaꞌi, “Epen ami niꞌi sonogahani, anin aꞌ sonondahana Dembinai atona.”