1-2 Timotius, naba name o'ona sembangkenne! Na Paulusti mome ane an sembe palilamna. Nari sembamnange Nuni Allahap, Allahri Yesus wepto “Nimi so'oag nimi taulbahaileri saelhailul,” aro poghogne nenekoapti, “Anag o'ona senero yeplangkirikti, walia ulangkirikti, aingniangkurukang,” aro molona mololamna. Allahri seneropne agha, Yesus nu talulamsildi, saelbamsilne nenekori na sekitneori wepto pogneoba, Yesus yubu walinge ambarelamsinne wamna. Yubu walinge ambarelamsinne, Allahri yubu salag lebogne neneko sunsunum uro Eldi wepto poghogne Yesusti nimi kamag nenehiropne poneko sembe ambarelamsindi, mome ane an sembe palilamna. Nu kamag uro wamapnena, Yesus “Nimi mog so'oag nimi taulbahaileri saelbahailul,” aro Allahri wepto poghogne neneko sembe “Kristus” alamap. * Samenag Yesus anam mog so'oag yan komag agha, Yahudi nimi sembe Allah yubu silimu tiptopnangdi “Allahri wepto poglenge nhon amik yaleri, mog so'oag nimi saelbamsilul,” aro mome toro pibek. Allahri “Saelbamsululam” aro wepto poglenge neneko sembe Ibrani yubuag “Mesias” aro lerop aghana, Yunani yubuag “Kristus,” aro lerop (Sepna 2:1-2 neneag kembanep). Amik Yesus mangaptaog sumeneko Yesus Kristus engero pibog kom. Yesus anam teban koma, nimiri el sembe, “Kristus to, kom to,” aro haildalamek (Matius 16:13-17ap, 26:63ap kembanep). Yesus tebaogti, kamag taogpa, el neleptopne Petrusti el sembe tibin nenero ambarelamsiogne nene agha, “Yesus Kristus” aro nikag engero yabiog (Pogsiognang 2:36ap, 3:6ap, apna 4:26 kembanep). Yesus Kristusap ma'altalamapne nenekori nu kamag nembamsilba, kamag wamap sembamnari, mome ane an sembe palilamna.

3 Samen nunisa yabo Yahudi nimiri Nuni Allah yepto tolamekti omeklamek saog uro, naba na wanaag “Allahri senenne sunsunum uro ulamna,” aro seneraglamnari, nari babe Allah yepto tolamnari omeklamna. Nuni Allahag molona mololamnari, sinag kweleknag an sembe seneraglangkendi, Allahag “Naniong, Andi naba name yeplulam,” aro Allahag moloro omeklamna. 4 Nu koloptanumu sumeneko an engkalumba, hail mag timbaghaeogne seneraglamnange nene sembe “Anap haiptahanemeba, na wana awi sirik uanoho,” senelamna. 5 An sembe ekon tan koma seneragamnangena, andi anau Loisap, anin Eunikeapti sam Yesusag “Sikne” aro seneraglamdek saog uro, andi babe Yesusag “Sikne” aro sik tapto seneraglamlam. 6-7 Ane sembe nari anag yubu ambarelangkenne ulamlulam. Samen Allahri an Timotius sembe, “Sae yan taleri Nari awe tolamlul,” sembaogpa, nari sae andi usoghag sae pipkeno pere agha Allahri anag mikipne pipkeo. Allahri nunag mikipne palilamsilne, Eldi “Log sembaukang” aro palilamsil kom. Eldi nunag palilamsilnena, “Mikip wamikti, o'ona seneldalamikti, wana hekto wamukang,” aro nunag palilamsil. Allahri mikipne auk pog saog uropne anag pipkeo ane sembe, nimiri “Auk pog nubu talul,” aro yae piro ulamang saog uro, andi babe “Allahri mikipne auk pog saog uropne nanag pipneonge oro niknibaneagti, nubu nembanun,” aro yae piro up tangkamlulam.

8 Mikipne pipkeo ane sembe, Yesus nu Saelba uahiropne poneko sembe ali semban koma lag phoro ambarelamsululam. Na babe yubu walinge Yesus sembe ambarelamsinoba, nimiri na sae kaupto kop aeag tobongkimneong aghana, wamnange sembe babe ali sembaheng kom. Nari yubu walinge Yesus sembe yubu ambarelamsinne sembe seklelamna† Paulusti, “Seklelamna” seogne sembe Lukasti mome toro pibogpa, mome toroba Pogsiognangdi Ulameka sembe pibogne pasal 22 agha 28ap kembanep. aghana, Allahri an seklelapmenag mikip nenelangkeleba, andi babe Yesus yubu walinge ambarelamsululam. 9 Nuni Allah ponekori nuri mali-malia ulamubunge sembe ya'ag opsinep aghana, nu mog so'oag nimi sembe “Walia uahinun,” senelamsildi, “Nari mabo taikti, Nari senenne sunsunum uro ulamukang,” aro yoplamsil. Yoplamsilne agha nu Yesusag “Sikne” aro seneragtop nimi talulamsil. Nu yoplamsildi, talulamsilnena, nuri walia ulamapne agha yoplamsil kom aghana, Elba Eldi wana walingeag agha, “Undo uanun,” sembaogti, yoplamsil. Eldi anam imap so'oap sumban komag agha El el uro wamogti, wana waliri, “Nari wepto pognenge Yesus Kristus pere agha Nari mabo nembahinun,” aro karepto pibog. 10 Yum-yum samenag karepto pibog aghana, wenena Allahri Yesus Kristus wepto “Mog so'oag nimi taulbahilulam,” aro poghogpa, yaog andarina Allahri wana walingeag agha “Walia uahinun” senelamsilne lag taog. Yesus Kristus “Mog so'oag nimi taulbahinun,” aro yaogne pere agha nimi tepna mikipne neneko kom nembaog. Nimi tepna mikipne kom nembaogpa, nimi etneri yubu walinge Yesus sembe sik seneraglamleri, Yesusag wana piamle tanena ya'ag kamag wamleri, tebalul kom. 11 Yesus yubu walinge ambatsinne sembe, Allahri na toro sekitneoba Yesusti na wepto pogneoba, na nimi amohinne tanori, lag phoro ambarelamsin. 12 Yesus sembe yubu ambarelamsinba, nimiri “Karong,” aro malia ulamneangba, seklelamna. Seklelamna aghana, na sik uro naringe wana Yesusag paiamnari seneraglamna. Na el wamnangena, “Nari wana Yesusag paiamnaba, Eldi na yae wamnele paghabog nen phendep sum 'Tam karebanun,' aro yalul,” senelamnari seneraglamna. Ane sembe wene seklero wamnange sembe ali seneldalamna kom. 13 Nari sik uro an yubu walinge ambatkehinge sunsunum uro sik wali uro seneragto saelbapmendi, tipto ambarelamsululam. Ambarelamsimendi, Yesusag “Sikne” aro seneraglapmenba, Yesus Kristus nenekori nimi o'ona senelamsilne agha o'ona senero ambarelamsululam. 14 Nari yubu walinge Yesus sembe sik uro ambarelangkenori, andi saeag nembaghenoba, nu Yesusag seneragtop nimi sembe Allah Eldamne Yame Walinge nu nongag ua ulamla. Pogsiognang 2:38; Matius 3:11; Yohanes 14:16-17 Allah Yame Walinge nenekori yeplangkeleba, sik yubu anag ambatkeno yubu eneko yae paiapmendi,sik uro tipto ambarelamsululam.

15 An elwamlamne Asia so'oag wamang nimiri na laplopneong. Figelusap Hermogenesapti babe laplopnerong. 16 Laplopnerong aghana Onesiforusti ik etbare na wana awi sirik nenelamneo. Ora nimiri na sae kaupto kop aeag pimneongbog, wamnoag na sae kaupto wamnonge sembe ali sembao komdi, na wana awi nenelamneo. Unu aneoba nari sembamnange, nu Taluro Salelamsilne ponekori Onesiforus ponekoap el ae lomag nimiap o'ona senero yeplamsilul. 17 Roma wamnoag babe Onesiforus poneko piori, na elamneori, na wamnoag imneoba haiptanomo. 18 An babe elwamlam, eldi na Efesus wamnoag maikno yeplamneo. Maikno yeplamneoba, nu Taluro Salelamsilne ponekoag molbarelamnange, nia mangkina Saelba Uahiropne ponekori nimi ni sembe tam karebale sumeneko, “Onesiforus sembe yareag sembalulam,” aro molbarelamna.