Balʉa gba Polo pɨ
Tito
Eli na kalanʉ
Tito ɨnde akolo nanɨ kpála na kulu bhʉ́ dabɨlɨ bini ne Polo, anɨ atsia adʉ di ateteke anɨ bhʉ́ kulu gba e na Ebhe ɨnde anɨ adʉ adholo ne e, anɨ adʉ nanɨ mʉpagano ɨnde adji bua e, anɨ atsia azɨba Kilisito . Polo aye balʉa ɨnde pɨ Tito, makombi ɨnde adʉ ateteke anɨ bhʉ́ Dadjua gba Ebhe na Kelete-o. Polo aꞌo nanɨ ká anɨ oo ngʉbula natsia ’kpɨ́ lɨ kulu na Dadjua gba Ebhe ango-o. Ngbengbe ’ngʉ́ bhʉ́ balʉa ɨnde bata.
Engʉ́ na kalanʉ u aye bhʉ́ balʉa ɨnde-e, ko nasuno pɨ Tito dasʉndʉ ɨnde a ayo me obhelesɨ okpála na Dadjua gba Ebhe dʉ ne e, adʉ kpi ne bhe na sisiti ɨnde lɨ okpála na Kelete nde ne e ko. Pɨpɨta-a, Polo ngaha lɨ́lɨ pɨ Tito me anɨ dʉ mʉsuno pɨ limbi okpála ngangá na Dadjua gba Ebhe-o. Limbi okpála maka: obhosɨ na bhelesɨbhelesɨ, omakombise, obalise ne olɨsɨ bhe na bhelesɨbhelesɨ (ɨnde a ayo me u ha lɨ́lɨ pɨ otsalɨsɨ). Lɨ soso-o, Polo ngaha lɨ́lɨ pɨ Tito pɨndjɨ lele nadholo gba makilisito, ne nadʉ ne mʉkʉnda, ne nadʉ ne guo ’ngʉ́ ngʉbula nakpe yala, ne nakpe tolo, a la di na gbogbo bhʉsʉ bhʉ́ Piga gba Ebhe.
Ongbengbe ongʉ́ ɨnde bhʉ́ bhuku ɨnde-e ngae ɨnde:
Eli na kalanʉ 1:1-4
Obhelesɨ okpála na Piga gba Ebhe 1:5-16
Engʉ́ a ayo me limbi okpála mene e bhʉ́ Piga gba Ebhe 2:1-15
Naha lɨ́lɨ gba Ebhe ne napa me kpála dʉ ne nalila lɨ e 3:1-11
Eli na soso 3:12-15
1
Polo yi Tito mayi
1 Ma aye balʉa ɨnde-e ngama Polo, bali gba Ebhe, la di bhʉlʉ titima gba YesuKilisito . Ebhe aha kulu napana kpadjɨ na nabhuka pɨ okpála ɨnde anɨ abhʉ o-o mʉma ngʉbula me u bhuka nɨ, amba u kɵ di mboli kʉkʉlʉ nasuno ɨnde atɨ ne mʉkobho ɨnde ngadhɵgɵ anɨ-o. 2 Abhomʉ-o, u tɨ da nadʉ ne ’to o me o osía mʉkobho na dʉdʉma masia. Ebhe ɨnde ɨ papa eu de-e, apana nanɨ mʉkobho ango-o pɨ omaha e bhʉtode kala me anɨ bho kokpɨ́ ne doto. 3 Nedhɨnga ɨnde lɨ Ebhe aꞌo e akolo lɨe, Ebhe, Mʉkobho gba nɨ́-e amene me omaha nɨ mbɨla ’li nɨ lɨ kpadjɨ nakpokpo Bádha Ngali . A bhomʉ-o kulu ɨnde anɨ aha lɨ́lɨ me ma mene e-o.
4 Ma ngaye balʉa ɨnde-e pɨ mʉ Tito. Mʉ maka kʉkʉlʉ ndɨlɨ gba ma bhʉ́ ’bu nabhuka ɨnde ngakpɵtsɵ nɨ́ ko. A ayo me bádha bhʉ́ ’bu ne guo ’ngʉ́ gba ’Dyɨ nɨ́ Ebhe, di ne Yesu Kilisito Mʉkobho gba nɨ́-e dʉ ne mʉ bhʉ́ dabɨlɨ bini.
Lele mʉkobho gba obhelesɨ okpála na Piga gba Ebhe
5 Ma aꞌo ka mʉ bhʉ́ kpɵmɵ na Kelete, amba mʉ ndjia naleke ndʉ ’ngʉ́ hana ɨnde atigala-o. A ayo me mʉ bhʉ obhelesɨ okpála na Piga gba Ebhe-e bhʉ́ ndʉ gʉdhʉ hana bini ne bini nakpata olɨ́lɨ nako ma aha e pɨ mʉ-o moko me, 6 a ayo de me u u bhele kpála na Piga gba Ebhe-e ne siti ’ngʉ́-o de. Anɨ dʉ ne koli ɵlɵ bini. A ayo me ongɨsɨ gba anɨ-e dʉ omabhuka . U améne engʉ́ bini de ɨnde u ꞌɨ́ uo ka e me, a ko ongɨsɨ na sisiti, di ne me, a ko ongɨsɨ na ndjondjo.
7 Bhele kpála na Piga gba Ebhe-e ngalila kulu gba Ebhe-e ngae. Kaka-a, a ayo de me u u anɨ ne siti ’ngʉ́-o de. A adʉ́ kpála na ’ngbé ’ndjɨ de. Anɨ adʉ́ nake ’ngʉ́ lɨe má gala de. Anɨ ahá lɨe pɨ pandɨ de. A adʉ́ bhʉlʉ nagʉ gbele de. Anɨ adʉ́ nagɨlɨ tɨa lɨ siti kpadjɨ de. 8 Engʉ́ bini, anɨ dʉ nasia ogomago ndjɨndjɨ. Anɨ kʉnda bádha ’ngʉ́. Anɨ dʉ nabhundja ’ngʉ́ ndjɨndjɨ. Anɨ dʉ ngbingbili. Anɨ dʉ bubu kala okpála di ne kala Ebhe. Anɨ dʉ kpála naholo bua e ka ’ngʉ́ maholo. 9 A ayo me anɨ gbite lɨe kpekpeke lɨ Eli na kʉkʉlʉ ɨnde atɨ ne engʉ́ ɨnde nɨ́ asuno e pɨ anɨ-o. Abhomʉ-o, anɨ tɨ́ da nato masi bhʉ́ okpála koko ne nasuno na ngbingbili-o. Anɨ tsia tɨ́ la di da nasuno pɨ okpála ɨnde ngaꞌo bhayiki lɨ nasuno gba anɨ-e me uo lɨ pʉlʉ kpadjɨ.
Polo agbele ’dje Tito pɨndjɨ nasuno na eu
10 Okpála bhelé ne kpéke ’ndjɨ, a ane la mane bhʉ́ ká okpála ɨnde ngasuno me a ayo me omakilisito kpata lɨ́lɨ gba omaYuda lɨ kpadjɨ nalɨ gandja-o . U ngapite okpála koko, u di ngapa ongʉ́ na padhá padhá. 11 A ayo nagbite ’bhɵ uo, anga u ngangbɨngɨ ’ndjɨ opiga libhomu ne nasuno ongʉ́ ɨnde a ayo nasuno e de, ngʉbula nasia tɨa lɨ siti kpadjɨ.
12 Sʉka kpála bini na kpɵmɵ na Kelete-e, adʉ nanɨ bhʉlʉ ɨmbɨlangʉ. Anɨ apa nanɨ ne ’bhɵ e me: «Okpála na Kelete-e, a ko odidili obhʉlʉ eu, uo maka onʉ na ’gʉ́. A ko obhʉlʉ ɨpio, u ngabhundja bha bini bula ’ngʉ́ na ’zʉ.» 13 Engʉ́ ɨnde anɨ apa e bhomʉ-o, a ko kʉkʉlʉ ’ngʉ́. Kaka-a, mbe bhʉ́ ’ndjɨ uo tété kpekpeke, ngʉbula me u lʉ kpekpeke bhʉ́ nabhuka, 14 u aꞌó la di ’ndjɨ o lɨ ongʉ́ na padhá padhá ɨnde lɨ omaYuda ngagbe e bhʉ́ ’ndjɨ o de. U adʉ́ di namene lɨ́lɨ gba okpála bhende ngayala kʉkʉlʉ ’ngʉ́-o de. 15 Pɨ okpála bhende kala Ebhe bubu-o, ndʉ ’he hana bhadi bubu. La-a, pɨ okpála bhende kala Ebhe bubu ade-e, ɨnde ayala nabhuka-a, ehe bini pɨ uo bubu belegʉ ade bini. Padhá de, anga ɨmbɨlangʉ di ne bua nakpokpo kú ’ngʉ́ gba uo-o asiti. 16 U ngapa me, o mbɨla Ebhe hana, engʉ́ bini ongʉ́ ɨnde u ngamene e ngasuno me u mbɨla anɨ de. Engʉ́ ɨnde u ngamene e nga lɨ okpála de, a nga la di lɨ Ebhe de. A ko okpála na kpekpeke ’ndjɨ. Uo la di ne angu namene bádha ’ngʉ́ belegʉ ade bini.