GAY MARABƏŊ UWANA
LUKA ATSETSÈR
Evangile selon Luc
1
1 Deda Tewofil.
Azladza aŋuvaw tawàɗ vok à uda, kà matsetser gay uwana apakahà vok la tataka gami la abà. 2 Tatsetseràh azlatatak uwana tatsənàŋ la slaka azladza uwana tanəŋàŋ la yewdi aŋatà, dagay la madzəka, ŋgaha tafà à atà kà mapəhay gay uwaga à ahàl. 3 Gi babay gəkə̀s tetəvi aŋa manərəz tatak uwaga gesina, dagay la madzəka, kà gi aŋa mapàhla uwaga ala, la tekula tekula à kak məŋga Tewofil. 4 Uwana gəɗahà uwaga kà, kà kak aŋa matsən dziriga aŋa matapla uwana kaɓə̀zal gesina.
Malika apəhla gay aŋa mayyi Yuhana masla maɗàh batem ala
5 La mok uwana Herod agà Sufəl aŋa Yahudiya kà, masla mav tatak à Zəzagəla anik la ahəŋ, uwana sləm aŋha kà Zakari; masla kà tsəhay aŋa azlaməna mav tatak à Zəzagəla, la huɗ gày aŋa Abiya. Sləm aŋa mis aŋha kà Elisabet, masla kà mayyi à tsəh ala aŋa Haruna, məŋ madzahaga aŋa azlaməna mav tatak à Zəzagəla uwarà. 6 Atà səla nna kà, azladza dziriga la huma aŋa Zəzagəla, ŋgaha takə̀s gay aŋa Sufəl Zəzagəla la ləv tekula, tanəfà mapəhay aŋha la dziriga bay. 7 Ama bəzi aŋatà la ahəŋ aw, Elisabet aslàla vok aŋa maɓəz bəzi aw, kà uwana tadapak makoz.
8 Vərdi anik, Zakari aɗàh sləray aŋa makaɗ tatak à Zəzagəla, kà uwana à ahàl iyaw aŋha kà maɗehəŋ. 9 Bokuba uwana zagəlà aŋatà aŋa mazəɓani vok la ahàl iyaw la ahàl iyaw, kà masəl dza uwana aɗàh sləray la mavakay uwatà la tsəh, ŋgaha atə̀ɗ à Zakari à gəl kà maɓək kidzidzi la gày Sufəl Zəzagəla la aku. 10 La mok uwana aɓə̀k kidzidzi kà, maham à ahəŋ dza tadə̀v kuɗa. 11 La abatà malika aŋa Sufəl Zəzagəla apə̀hla vok à Zakari, atsìzl à ahàl kaf aŋa slaka maɓək kidzidzi à gəl. 12 Guba akə̀s Zakari à mok uwana anəŋàŋ askùlla à tsəh ala kaykay. 13 Ama malika agòɗal: “Zakari, guba akəs ka aw, kà uwana Zəzagəla adatsən madəv kuɗa aŋak. Elisabet mis aŋak adàyya à ka bəzi, kadàvàl sləm Yuhana. 14 Kak kadàhənla la marabay, ŋgaha azladza aŋuvaw tadàrabay lakəl aŋa mayyi masla. 15 Kà uwana adàgay məŋ dza la huma yewdi aŋa Sufəl Zəzagəla. Tetuwa adàsa guzu aw, amiyaka bà mana beymi uwana maməslga bay kà adàsay aw. Adàgay mahənla à la Masasəɗok Zəzagəla dagay la huɗ aŋa iyà aŋha.✡ 1.15 4Musa 6.3 16 Adàwulla azla Isərayel aŋuvaw à huma Sufəl Zəzagəla. 17 Masla la gəl aŋha adàtsa vok à awtày à huma Zəzagəla la ndzəɗa aŋa Masasəɗok, ŋgaha la ndzəɗa aŋa masla mapəhal gay à ahàl Eliya uwana uwarà, kà matsən vok gay azlababa la azlabəza aŋatà, adàwulla azlaməna makəs gay aw à haŋkəli aŋa azladza dziriga à abà, adàɗah tsəhay à ahəŋ kà mas à waŋ aŋa Sufəl Zəzagəla.”✡ 1.17 Malaki 4.5-6 18 Ama Zakari agòɗ à malika: “Kakay gədàsəlay kà uwaga kà dziriga ma? Tsa mədapakah makoz la mis gulo mi”, agòɗal. 19 Kiya uwaga malika agòɗal: “Gi kà sləm gulo kà Gabəriyel. Gi la uwana Zəzagəla afà à gi à huma aŋha à gay, kà gi aŋa mazlakəŋ, masla aslə̀l gi à waŋ kà mapəh à ka gay uwaga. 20 Ama kadìŋ gəl à gay gulo uwana à vok gəpə̀h à ka, adàpaka vok gəgòɗ à ka aw kà, kà uwaga kapakay bada, kaɓaɗma aya aw, tsəràh à uwana tatak uwana gəpə̀h à ka adàpaka vok dandan la uwana kadàɓaɗma.”
21 La kaslà uwatà, azlaməna madiŋal gəl à vok takùd Zakari la uda, ŋgaha ləv avàl atà à gay məŋga, kà uwana asàf məŋga la gày maɓək kidzidzi la aku. 22 Ama mok uwana adasa à uda kà, aslàla vok aŋa maɓaɗatàma aya aw, azladza tadzùgw kà: Anəŋà nadzipo anik la gày la aku, tagòɗ. Aɓaɗatàmà kà la ahàl pəra, kà uwana aslàla vok kà maɓaɗma aya aw.
23 Mok uwana Zakari adadəv kaslà aŋha à gay kà maɓək kidzidzi la məŋ gày Zəzagəla la aku kà, awùl à mtəga aŋha. 24 Zwek la huma la gay kà, bəzi adà à Elisabet, mis aŋha, à huɗ, ŋgaha masla Elisabet ahaɗà bəzi la huɗ tsəràh à təla zlo. Agòɗ la gəl aŋha: 25 “Iyay, aganay tatak uwana Sufəl Zəzagəla aɗahàŋ kà aŋulo, Zəzagəla asàl aŋa mahəlla gi ziruwi lakəl ala la huma azladza gesina.”
Malika apəhla gay mayyi Yesu ala
26 La təla mukwa, Zəzagəla aslə̀l malika Gabəriyel à gudəŋ Galili, uwana sləm aŋha Nazaret, 27 à slaka dahalay anik, uwana mawɗa aŋa Yusufu, masla kà la mayyi à tsəh ala aŋa sufəl David la abà. Sləm aŋa dahalay uwatà bay kà Mariyama. 28 Malika adagay à slaka aŋha agòɗal: “Ràb, kà uwana Zəzagəla adahənkala la vok mahamay aŋha, Sufəl Zəzagəla la ahəŋ la kak.” 29 Mariyama kà gəl akàɗal à vok kà gay uwaga. Anavà gəl aŋha agòɗ: ‘Mana asal magoɗay ayyi marabay gà uwanay ma?’ 30 Kiya uwaga malika agòɗal: “Mariyama, guba akəs ka aw, kà uwana kadaɓəz vok mahamay aŋa Zəzagəla. 31 Kadàgay la bəzi la huɗ ŋgaha kadàyyi bəzi zilga, uwana kadàvàl sləm Yesu. 32 Masla adàgay məŋ dza, ŋgaha tadàzallalla Kona aŋa Zəzagəla, uwana kərkər la afik. Sufəl Zəzagəla adàpakəŋ ala kà məŋ sufəl, bokuba uwana aɗahàŋ à David, baba aŋha madzidziga. 33 Ŋgaha adàkor tsəhay Isərayel aŋa koksikoksi; makoray aŋha adàkəɗ gəl à ahəŋ aw.”✡ 1.33 2 Samuyel 7.12-13,16; Yesayya 9.7
34 Mariyama agòɗ à malika: “Kakay uwaga adàpaka vok, tsa gi la zil dadàŋ aw ma?”
35 Malika agòɗal: “Masasəɗok tsikasla adàsa à ahəŋ à gəl aŋak, ŋgaha ndzəɗa aŋa Zəzagəla uwana kərkər la afik, adàsa à ka à gəl, bokuba dzəgay, kà uwaga à uwana bəzi uwana kadàyyi kà, tadàzallalla: Tsikasla, Kona aŋa Zəzagəla uwana la zagəla la afik. 36 Elisabet dəg tsiŋ aŋak babay kà, bəzi la huɗ, tekeɗika adagay makoz babay, azladza kà ‘Dəgər’, tagòɗal, ama lagonay kà bəzi la huɗ aŋa təla mukwa. 37 Kà uwana tatak la ahəŋ aɗuw kà Zəzagəla à gəl aw.”✡ 1.37 1Musa 18.14 38 Kiya uwaga Mariyama agòɗ: “Gi kà, gi mayà aŋa Sufəl Zəzagəla; apakà à gi vok, bokuba uwana kapə̀h lagwa zlà.” Kiya uwaga malika asàkal à ahəŋ.
Mariyama aday kà aŋa manəŋ à Elisabet à gay
39 La kaslà uwatà, Mariyama atsìzlla ala, amərà vok, kà mad à gudəŋ anik à abà, la gudəŋ la afik la kutso Yahudiya. 40 Ahàd à gày aŋa Zakari, “Ayyi”, agòɗ à Elisabet. 41 La mok uwana Elisabet atsənà maɗàh ‘Ayyi’ aŋa Mariyama kà, bəzi aɓəlakà vok la huɗ aŋha. Elisabet adàhənla la Masasəɗok Zəzagəla, 42 awiyà la ndzəɗa: “Zəzagəla apìs à ka gay à vok kaykay la tataka azlamis anik la abà gesina, ŋgaha mapis gay à vok aŋha adàdza à ahəŋ lakəl aŋa bəzi, uwana kadàɓəzal. 43 Gi ma gi uwa, à uwana iyà aŋa Sufəl gulo atsa à waŋ à mtəga gulo uwa? 44 Kà uwana mok uwana gətsənà ‘Ayyi’ aŋak kà, bəzi aɓəlakà vok la huɗ gulo la marabay. 45 Lapiya agay la kak, kà uwana kadiŋ gəl à tatak uwana à vok, Sufəl Zəzagəla apə̀h à ka uwaga apaka vok.”
Mahabay marabay aŋa Mariyama✡ 1.45 Dzàŋ 1 Samuyel 2.1-10 bay
46 Kiya uwaga Mariyama agòɗ:
“Masasəɗok gulo azləɓ məŋga aŋa Sufəl Zəzagəla,
47 Ləv gulo adahənla la marabay à kà Zəzagəla masla maɓəl gi.
48 Kà uwana vok ahamàl kà gi à uwana anə̀ŋ gi kà kiya gi mayà aŋha tələmmaga.
Iyay, dagay lakana azladza tagoɗay kà, gi kà gi mapis gay à vok gà.
49 Kà uwana Zəzagəla, uwana tsikasla, aɗahà tatak gesina dzəɓa aŋha səla aw kà aŋulo.
Sləm aŋa Zəzagəla kà tsikasla.
50 Mawoyəŋ aŋha adàgay la ahəŋ
Lakəl aŋa azladza gesina, uwana tahoy yewdi aŋha koksikoksi.
51 Ahənà azlasləray məŋga məŋga ala, la ndzəɗa aŋa ahàl aŋha.
Awìts azlaməna zlapay gà ala.
52 Adakwà azlasufəl à ahəŋ la kursi aŋatà la afik, adawalla atà à vəɗah;
Ama azigənàhà azlaməna tələmmaga.✡ 1.52 Job 5.11; 12.19
53 Ahanà azlaməna may ala la azlatatak delga, delga gà,
Akuɗə̀kàh azlagorobu la ahàl deyday.
54 Asà à waŋ, azlàk tsəhay aŋha Isərayel, masla sləray aŋha
Avikàŋ kà mapəhla delga aŋha ala aw,
55 La slaka Abəraham, ŋgaha la mayyi à tsəh ala aŋha kà aŋa koksikoksi,
Bokuba uwana apə̀h à azlababa gami madzidziga.”✡ 1.55 1Musa 17.7
56 Mariyama adzà à ahəŋ la Elisabet nekwa nekwa təla makər, la lig la ahəŋ, awùl à mtəga aŋha.
Mayyi Yuhana masla maɗàh batem
57 Kiya uwaga mok uwana kaslà masewk à ahəŋ aŋa Elisabet adaslay kà, ayyà bəzi zilga. 58 Azlaməna magay aŋha la azlatsəhay aŋha tatsənàŋ kà Sufəl Zəzagəla adaɗahalla delga, ŋgaha atà taràb la slaka gà. 59 Mok uwana bəzi adaɗah kasukwa tekula kà, tadala kà makədəv à uda, atà kà, asà à atà kà mavàl sləm aŋa baba aŋha, Zakari.✡ 1.59 3Musa 12.3 60 Ama, “Awaŋ”, iyà aŋha agòɗ; “Sləm aŋha kà mavàl kà Yuhana.” 61 “Awaŋ, dza la ahəŋ la tsəhay aŋak la abà, à uwana tavàl tsəhay sləm uwanay”, tagòɗal. 62 Kiya uwaga tanavà baba aŋha mabada bada, kà masəl sləm uwana asàl mav à bəzi. 63 Zakari anàv tatak kà manəhal à adi, ŋgaha kiya uwanay à uwana anə̀h: ‘Yuhana, la uwana sləm aŋha.’ Ləv avàl atà à gay gesina aŋatà. 64 Katskats la abatà Zakari adzəkà mapokw gay kà maɓaɗma, adzəkà mazləɓ Zəzagəla la kuda zləkkà. 65 Kiya uwaga guba akə̀s azlaməna magay aŋha gesina, ŋgaha azlaməna madz à ahəŋ la gudəŋ uwatà la afik gesina tapàh tatak uwana apakà vok. 66 Azladza gesina uwana tatsənà uwana tapəhay kà, awùl atà à gəl, ŋgaha tanàvàh à vok: “Tsa bəzi uwanay ma adàgay ma uwa tak uwa? Ndzer, maslay aŋa Sufəl Zəzagəla la ahəŋ lakəl aŋha, haɗay!”
Mahabay aŋa Zakari:
masla mapəhal gay à ahàl aŋa mapàh à azladza
67 Zakari, baba aŋa bəzi uwaga, agà mahənlaga la Masasəɗok Zəzagəla, adzəkà maziŋ kiya uwanay:
68 “Mazləɓay agay kà la Sufəl, uwana Zəzagəla aŋa azla Isərayel
Kà uwana afà sləm à azladza aŋha, aɓə̀lla atà.
69 Masla apə̀hanula maslay la mav à anu masla maɓələŋ dziriga,
Uwana la mayyi à tsəh ala aŋa Sufəl David la abà, uwana magamza aŋha.
70 Uwaga la uwana apə̀h uwarà la paŋaw aŋa azlaməna mapəh à atà gay à ahàl kà mapàh à azladza:
71 ‘Gədàtəf akul la ahàl aŋa azlaməna məzam aŋkul agòɗ,
Ŋgaha la ahàl aŋa azlauwana tapəsew anu gesina.’
72 Masla adàpəhla mawoyəŋ aŋha à azlababa gami madzidziga ala,
Ŋgaha gay makəs vok slawda aŋha tsikaslaga uwatà adàwulal à gəl.
73 Kà uwana Sufəl Zəzagəla azùw mawaɗay à baba gami madzidziga Abəraham.
74 Kà masla aŋa mapəlanula la ahàl aŋa azlaməna məzam gami,
Ŋgaha kà anu aŋa maɗahala sləray la kokuɗa kurit yewdi.
75 Kà anu aŋa magay sətaka, ŋgaha la dziriga la huma aŋha koksikoksi.
76 Ŋgaha kak, bəzi gulo kadàgay masla mapəhal gay à ahàl aŋa dza uwana kərkər la afik aŋa koksikoksi.
Kà uwana kak la uwana kadàguway la huma aŋa Sufəl kà maɗahallaŋ tetəvi à ahəŋ.✡ 1.76 Malaki 3.1
77 Ŋgaha kà mapəhla à azladza aŋha ala kà, adàɓəl atà la mamats atà tsakana aŋatà ala.
78 Haɗay, Sufəl Zəzagəla gami kà, adahənla la vok mahamay, ŋgaha la lapiya,
Adasləl à anu uɗaka à ahəŋ à gəl gami gesina, bokuba uɗaka aŋa afats uwana atsa à afik.
79 Kà masla aŋa manəŋ azladza uwana ala, atà la mələs la abà, ŋgaha la azladza uwana la dzəgay aŋa mamətsay la abà,
Ŋgaha masla aŋa manəŋla asik gami la tetəvi aŋa lapiya la tsəh.”✡ 1.79 Yesayya 9.2
80 Bəzi azigə̀n, ŋgaha haŋkəli aŋha bay azàla vok à gəl. Adzà à ahəŋ la fəta la abà, tsəràh à mavakay uwana apə̀hla vok ala la huma tsəhay Isərayel.