1 Utshunœ adœke Ndjaba mbœrœ tshalafo dœ tshapashɔ, O'o sœ lima zœ. O'o sœ lima awa bale dœ Ndjaba, yé O'o kœdœ lima Ndjaba. 2 O'o sœ lima awa bale dœ Ndjaba utshunœ adœke tshe mbœrœ tshalafo dœ tshapashɔ. 3 Ndjaba mbœrœ œrœ kɔ dœ awa nœ ye, yé anga œrœ bale mbœmbœrœtœ ye kpi tœ ye nene. 4 O'o sœ lima dœ soro, yé soro kœdœ lima ɨngbɨsho nœ azu. 5 Yé ɨngbɨsho matœ ye lœ ubu osho kashe ubu osho sœsœ dœ gbɔgbɔ tœ kœwo ɨshirɨnœ nene. 6 Ndjaba vwa lima anga yakoshe bale á ɨ'ɨrɨ ye kœdœ Yowane. 7 Tshe na lima ɓata timu mbœrœ kœpa o'o tœ upu nœ ɨngbɨsho. Tshe na adœke azu para kɔkɔ sœ dœ kœyindœrœ ga ndœ ɨngbɨshonœ. 8 Tshe dœ́dœ́ lima ɨngbɨsho má nene, kashe tshe na lima adœke œne pandœ adja o'o tœ upu nœ ɨngbɨshonœ. 9 O'onœ kœdœ lima adja ɨngbɨsho, œneke á na ga pa ɔshɔnœ asœke yé œ tɔ ga ndœ azu para kɔkɔ.

10 O'o sœ lima pa tshapashɔnœ asœke. Ndjaba mbœrœ lima tshapashɔnœ asœke dœ awa nœ ye kashe azu tshapashɔ wuwu lima sœ ye nene. 11 O'o na lima ga lœ ogo nœ ye dœ tœ ye, kashe azu nœ ye zaza lima osho kœsœ fœ she nene. 12 Andaa, mbœrœ azu neke á endje za lima osho kœsœ fœ she, á sœ lima dœ kœyindœrœ dœ ɨ'ɨrɨ ye, tshe za lima awa fœ endje adœke endje te agbolo nœ Ndjaba. 13 Endje tete agbolo nœ Ndjaba lœ indji dœ pe lœ mara nœ azu nene, ɓata á yakoshe œ zu gbolo tœ yashe liaka ogo nœ endje nene, kashe Ndjaba dá zu lima endje liaka gbetshelœ nœ ye dœ tœ ye.

14 Yé O'o wuta uzu, œ lo ugurutœ azœ. A wu mokɔ nœ ye, yé œtœnœ kœdœ mokɔ á Ndjaba Aba za fœ Gbolo nœ ye tshebale, á tshe sú dœ ɔtshɔ lɔsu œdœ adjapu. 15 Yowane te lima tœ kœpandœ o'o tœ upu nœ ye, á gbara lima o'o adœke: «'E wu uzu á mœ mɨ lima ndœ o'o tœ upu nœ ye lɔkɔ á mœ pa adœke: “Tshe sœ kœna manda mœ, kashe tshe ropa mœ ye, gbambanœ nene, utshu mœ tshe sœ lima zœ.”» 16 Lœ ɔtshɔ lɔsu nœ ye, tshe to kane ye ga pa azœ para kɔkɔ, yé tshe kpa to anganœ ga pa nœ. 17 Ndjaba za lima awa akwa fœ azœ lœ awa nœ Moyize, kashe ɔtshɔ lɔsu nœ ye œdœ pe adja o'o nœ ye na ga ndœ azœ dœ awa nœ Yisu Kristu. 18 Adja uzu bale wuwu Ndjaba nene, kashe Gbolo nœ Ndjaba tshebale á tshe kœdœ Ndjaba, yé á sœ awa bale dœ Abanœ, œshe dá yisœ Ndjaba fœ azœ.

19 Yé asœke kœdœ o'o á Yowane pa lima lɔkɔ á agbozu tshapa Ayuda á endje lœ lima lœ Yerusaleme vwa lima anganga Ndjaba œdœ pe alevite ndœ kœyu she adœke: «Œɓœ kœdœ uzu ɗe e?» 20 Tshe vwavwara lima tœ ye tœ kœgi o'o nene, tshe pa lima o'ara adœke: «Mœ dœ́dœ́ Kristu* 1.20 Kristu yindœ kœpa dœ o'o ama Ebre adœke Masiya nene.» 21 Á endje kœyu she adœke: «Ataa, ɓœ kœdœ má œɗe e? Œɓœ kœdœ Eliya a?» Á tshe kœgi adœke: «Mœ dœ́dœ́ she nene.» «Œɓœ kœdœ ayi kœgbara o'o a?» Á tshe kœgi adœke: «Œ̃.» 22 Endje kœpa fœ she adœke: «Atamœ, œɓœ kœdœ má ɗe e? Mbœrœ œ li adœke 'a gu dœ o'o fœ azu á endje vwa 'a. Ɓœ pa kotoo tœ zœ dœ tœ zœ a?» 23 Á tshe gi fœ endje adœke: «Œmœ kœdœ

24 Andaa azu á endje vwa lima endje fœ Yowane kœdœ lima Afarisayi. 25 Endje kpa yu she adœke: «Œdœ ɓœ kœdœ́dœ́ Kristu nene, ɓœ dœ́dœ́ Eliya nene, á dœ́dœ́ ndje ayi kœgbara o'o nene, mbœrœ gaɗe á ɓœ sœ kœza batisimu fœ azu a?» 26 Yowane kœgi fœ endje adœke: «Mœ sœ kœza batisimu fœ azu ɓa la ungu. Kashe anga uzu bale sœ ugurutœ 'e á 'e wuwusœ ye nene, 27 tshe na manda mœ, yé mœ li kœzu uwu œrada nœ ye nene.» 28 Œneke kɔ mbœrœ lima tœ endje ɓa lœ Betani ɓa kele ungu Yɔrdane ɓa tœ osho á Yowane sœ lima kœza batisimu fœ azu tœnœ.

29 Osho kɔrɔ pa nœ, Yowane wu Yisu kœna ga ndœ ye á pa adœke: «Wu Aya Pata nœ Ndjaba á tshe gi ekperœ pa azu tshapashɔ. 30 Œshe dá mœ pa lima o'o tœ upu nœ ye adœke: “Anga uzu bale œ na manda mœ, kashe tshe ropa mœ ye; gbambanœ nene, utshunœ adœke mœ wuta ga pa ɔshɔ asœ, tshe sœ lima zœ.” 31 Œmœ ndje, mœ wuwu lima sœ ye nene, kashe mœ na kœza batisimu ɓa la ungu á kœmbœrœ adœke azu Israyele kœwusœ ye.»

32 Yowane kpa pa adœke: «Mœ wu Ɔtshɔ Ɨshirɨ ɓata mbepa á tshe to ɓa lafo á jerœ kœsœ ga pa ye. 33 Yé mœ wuwu lima damba sœ ye nene, kashe Ndjaba á tshe vwa mœ ndœ kœza batisimu fœ azu ɓa la ungu dá pa fœ mœ adœke: “Uzu á ɓœ wu Ɨshirɨ kœjerœ kœsœ ga pa ye, œshe dá za batisimu nœ Ɔtshɔ Ɨshirɨ fœ azu.” 34 Yé œmœ, mœ wu lima yeka á sœ kœpa tœ upu nœ ye adœke, œshe kœdœ Gbolo nœ Ndjaba.»

35 Olo bale manda nœ, Yowane kpa sœ lima kpœtœ oshonœ asœmœ dœ anga ayambarœ nœ ye bisha. 36 Lɔkɔ á tshe wu Yisu kœro tœnœ, tshe pa adœke: «Wu Aya Pata nœ Ndjaba.» 37 Ayambarœ nœ Yowane dji o'onœ á tshe pa lima asœmœ yé œ na manda Yisu. 38 Yisu fatœ ye ngarrr œ wu, endje sœ kœna manda œne, á yu endje adœke: «'E sœ kœpara gaɗe?» Endje gi fœ she adœke: «Rabi, ɓœ sœ kœlo ɓata a?» 39 Tshe gi fœ endje adœke: «'E na gamœ yeka á kœwu.» Œ sœ lima ada ɔlɔ vana manda kakpi ɔlɔ. Endje na lima, œ wu osho á tshe sœ lima kœlo tœnœ, yé œ sœ lima kpœtœmœ awa bale dœ she.

40 Anga bale ugurutœ abishanœ á endje dji o'o ama Yowane, á na manda Yisu asœmœ kœdœ lima Andere, aya Shimu Petro. 41 Tshe na utshunœ œ gbɔ ayanœ dœ Shimu, á pa fœ she adœke: «'A gbɔ Masiya» – Œ yindœ kœpa adœke «Kristu». – 42 Tshe to Shimu na ga ndœ Yisu. Á Yisu kœshokɔ she kukuku, á kœpa adœke: «Œɓœ kœdœ Shimu, gbolo nœ Yowane. Endje e ɓœ Sefase.» – Œ yindœ kœpa adœke «Petro».

43 Osho kɔrɔ pa nœ, Yisu gbe kœkwa ga lœ Galilayi. Tshe gbɔ lima Filipo á pa fœ she adœke: «Na manda mœ!» 44 Andaa Filipo kœdœ lima uzu tshalakpɨ Betesayida, osho á endje zu Andere œdœ Petro tœnœ. 45 Manda nœ, Filipo na œ gbɔ Natanayele á pa fœ she adœke: «'A gbɔ uzunœ á endje sú o'o lima tœ upu nœ ye ga la awa akwa nœ Moyize œdœ aayi kœgbara o'o: Œshe kœdœ Yisu, gbolo nœ Yozefu uzu tshalakpɨ Nazarete.» 46 Á Natanayele kœyu she adœke: «Lœ Nazarete, adja anga ɔtshɔrœ œ wuta zœ a?» Á Filipo kœpa fœ she adœke: «Na gamœ, yé œ wu.»

47 Yisu wu Natanayele kœna lima ga ndœ ye, á pa tœ ye adœke: «Tsheneke kœdœ adja uzu Israyele, tshe pa kolœ adja o'o fœ azu.» 48 Yeka á Natanayele kœyu she adœke: «Ɓœ wusœ mœ ɓata a?» Yisu kœpa fœ she adœke: «Lɔkɔ á ɓœ sœ ɓa tshakudu ɔyɔ fige, mœ wu ɓœ utshunœ adœke Filipo e ɓœ.» 49 Natanayele kœpa fœ she adœke: «Rabi, ɓœ kœdœ Gbolo nœ Ndjaba, ɓœ kœdœ gbozugo nœ azu Israyele.» 50 Yisu kœgi fœ she adœke: «Ɓœ sœ dœ kœyindœrœ ga ndœ mœ mbœrœ á mœ pa fœ ɓœ adœke mœ wu má ɓœ ɓa tshakudu ɔyɔ fige a? Ɓœ kpa wu ogboro œrœ á ropa œneke.» 51 Á Yisu kpa kœpa adœke: «Mœ pa fœ 'e dœ adjapu adœke, 'e wu bala tshalafo kœkɔrɔ tœnœ dœ aandjelu nœ Ndjaba kœɔ kœjerœ pa Gbolo nœ uzu.»