Pol ile malueng teltelnga ako i wat i a toko lemioongare nge ako o voth a rem a Korin
1 Korin
Ritetong nge a 1 Korin
Toko pelie ako a rem pomnga a Korin o velpol tel ini toko lemioongare, nge ako o nongpol Panongpolong Sivenga ako Pol i panongpol nge. Na Pol i panongpol Korin angare nge ile esong paininga. (O thepola Pakekere ole Omaing 18:1-18) Na Korin ini rem pomnga aolonga nomenga nge wop lemi ako Pol i es nge la. Na toko na seng pulua ako o voth a rem aken, o panes vothung kerenga pulua, na o lotual avalare tomo nge ako o sung polpol oni peti nge pel. Na nge a Pol ile panongpolong a esong menga i voth a rem pomnga a Epesus, na i nongpol nge toko lemioongare ako a Korin ole men kerereong. Pol i nongpol ako toko lemioonga ponganga pelie ako a Korin, i klip nge or ako aro o modop ole vothung kerenga areko o oma i nomenga. Na i nunganga ako Oni Riringa i sungu sungong sivesivenga pulua ako a toko lemioongare nge ako a Korin, ave o panes senu senu sungong areken mirenga avele. Na osivenga olemi ve, ole mire i aolonga, (1:18–2:16) mako o paroro osivenga. (4:6-21) Na toko omole e ako i ngo tomo nge itema iewo aininga ako i mothongpot mun i, (5:1-8) na o pamit pel nge riong evelelnga. (6:1-11) Na o thomreu pel nge lotu. (1:10-17; 3:1-23) Na tokokoe pelie mun ako o plosa a Korin me, ma o nin a Pol nge ur pelie ako toko lemioonga areken a Korin olemi nine nge rongan. (7:1; 8:1; 12:1; 16:1) Na i venen aken, mako Pol i wat malueng ake mo aro i pator ole nge ole vothung kerenga areken, na i olal senu ole ninongre. Na i ritet or nge peangeong a vothung, (7:1-40) na i ria or ve, toko lemioonga e avele aro i pamatu itein lemioonga e nge vothung ako i rivenga i sivenga ako aro i oma i, ave itein lemioonga aken i rivenga vothung aken ini vothung kerenga. (8:1–11:1) Na Korin angare o engeng nge Oni Riringa ile sungong nge keiong rel relnga ringa, mako Pol i ritet or ako o lotu tomo nge a Oni Riringa ile sungongre vava. (11:2–14:40) Na i ritet mun or ako tokokoere ole los wereraing ini ur aolonga ako i voth a Panongpolong Sivenga lemi. (15:1-58) Na i nunganga ako toko lemioonga pelie ako a Korin o panes vothung kerenga pelie, na olemi nine nge ur pelie rongan, aveto Pol ile pamirealing nge ur areken i pavurvur ako aro i opoal it ponange, eneke te thepol ur areken a lotuong lemi ponange.
Toko lemioongare o mothong tova o pun pel nge riong eve o paroro osivenga oion
1
(Vonge 1:1–4:21)
1 Tho a Pol, tho wat malueng ake a thomu nge wot. Na tho ini a Krais Jisas ile pakeke, eneke i panes a God ilemi, mako i ateal tho mo tho velpol ini ile pakeke. Na titeir a Sostenes i voth tomo nge tho.
2 Na tho wat malueng ake a thomu areko o lotual a God ako a Korin. Na God i pariri thomu a itheki, nge ako i oma thomu mo thomu omole ol inga a Krais Jisas nge. Na i ateal thomu mo ini ile, ranga ve ako i ateal toko alavusnga a rumrem elonga ako olemio nge a ar Pomnga a Jisas Krais na o lotual i, ini oa Pomnga na ini ar Pomnga mun.
3 Naro thomu o el themosaling na lemi moring a Titemer a God tomo nge ar Pomnga a Jisas Krais nge.
Pol i ri sivengaing a God nge, nge ile opoaling a Korin angare nge.
4 Evelelnga tho ri sivengaing a God nge, nge thomu, eneke i sung ile themosaling a thomu nge, eneke thomu o teo a Krais Jisas nge. 5 Make nge lomu teoong aken thomu o oror nge ur e avele, ranga ve ako God i opoal thomu nge ile riong panongpolnga elonga, na i panine lomu mire nge ur alavusnga, 6 eneke lemem panongpolong nge a Krais, i teo a lomumu. 7 Make thomu o oror nge Oni Riringa ile sungong e avele, nge wop lemi ake thomu o thealal nge ar Pomnga a Jisas Krais ile velpoling. 8 Naro i paengeng lomu lemioong, i pavurvur nge nang patopalalnga aken, mo aro ur e avele aro i voth a thomu nge, nge nang aken aro i pamit tokokoere nge riong. 9 Eneke God i panes inga ur ako i ri nge. Na ake ini isivenga, ako i ateal thomu mo o teo a Itun a Jisas Krais nge, ako ini ar Pomnga.
Pol i pator or nge ole mit omoleong.
10 Titeikre, ar Pomnga a Jisas Krais i sung engenging a tho nge, make tho nong engeng a thomu nge ve aro o mothong tova o pun pel nge riong, na o mothong tova sivengomu o omreu pel. Aro lomu menong omole inga naro lomu lemi rumong omole mun inga, nge sovengalo ako aro thomu o panes a Krais nge. 11-12 Titeikre, tho ri venen aken, eneke ina Kloe ile vel lemia pelie o ria tho ve, thomu o pun pel nge riong. Ranga ve ako omu pelie o ri ve, “Them panes a Pol ile panongpolong.” Na pelie o ri ve, “Them panes a Apolos ile panongpolong.” Na pelie o ri ve, “Them panes a Pita ile panongpolong.” Na pelie mun o ri ve, “Them panes a Krais ile panongpolong.”
13 Na lomu vothung aken i sivenga avele. Toko lemioonga alavusnga o ranga ve ini a Krais ini peti ako i omole inga, na i pavurvur aro thomu o omrireu i avele. Na tho a Pol tho mon a won ngoronga nge mo aro tho el werer thomu, kene avele, Krais ienga inga i oma venen aken. Na nge nang ako thomu o el paninuong, thomu o apet iok avele, thomu o apet a Krais iion. 14 Na tho ri sivengaing a God nge ako tho paninu omu pelie avele, ini inga Krispus ome a Gaius, 15 aken na omu e avele i pavurvur aro i ri ve, “Pol i paninu tho mo tho ini ile wainlanga.” 16 O, lemik simikal, tho paninu mun a Stepanas ome ile vel lemiare. Na lemik mire senu avele, ava tho paninu mun pelie eve ava avele. 17 Na lemik i sivenga ako tho paninu toko pulua avele, eneke Krais i pake tho nge omaing aken, kene avele. Ave i pake inga tho ve aro tho panongpol nge Panongpolong Sivenga. Na tho panongpol tomo nge toko ulue angare ole mire avele. Na aro ve tho oma venen aken, aro panongpolong nge a Krais ile omaing a won ngoronga nge ako tho panongpol nge, kene aro ile engenging avele.
God ile mire na ile engenging i voth a Krais nge.
18 Aro tho ri mun nge panongpolong nge a Krais ile omaing a won ngoronga nge. Na tokokoe areko o penthal, aro ve o nongpol i, aro o ri ve ini ur polpolnga. Aveto tokokoe areko God i pamimi or, aro ve o nongpol i, aro olemi mire ako ve, God ile engenging i voth nge panongpolong aken. 19 Na i ranga ve ako God ile erere i ri nge, na i ri vene:
“Aro tho pakerenga toko powe ninengare ole mire.” Aisaia 29:14
20 Na i vava nge toko powe ninengare tomo nge pamirealingare nge a Moses ile patorong na tokokoe mun areko o ri ololo tokokoere, e? Or ini toko ulue anga inga na God i oma ole mire mo ini ur polpolnga na i pamimi tokokoere nge ole mire aken avele. 21 Na God i panes ile mire sivenga, mako i oma tokokoere olemi mo aro ve o panes osivenga ole mire, i pavurvur aro olemi mire senu nge a God avele, na ilemi sivenga ve aro i pamimi areko olemio nge a Krais, nge ako o nongpol panongpolong ako tokokoe areko o panes vothung ulue anga, kene o ri ve ini ur polpolnga inga, ini panongpolong ako them panongpol nge. 22 Na Judare oni plong nge panongpolong aken, eneke o engeng inga nge pathepolong thopolnga. Na areko or ini Judare avele, oni plong mun nge panongpolong aken, eneke o engeng nge toko powe ninengare ole riong nongpolnga. 23 Aveto them, them panongpol inga nge ako Krais i pamimi tokokoere nge ile rinong a won ngoronga nge. Ave Judare olemi rit nge riong aken nongpolnga, na areko or ini Judare avele, o ri ve riong aken ini ur polpolnga. 24 Ave Judare tomo nge areko or ini Judare avele, aro ve o nongal a God ikei, aro olemi mire ako ve, riong aken i ri nge a Krais, na God ile engenging tomo nge ile mire ninenga, i voth a i nge. 25 Eneke God ile omaing aken, ako i oma i nge ile mire ninenga, ako tokokoere o rivenga ini ur polpolnga, kene i mukal nge tokokoere ole omaing engenga alavusnga.
26 Titeikre, lomumu rum werer nge lomu menong nge nang ako thomu o nongal a God ile lenging a thomu nge. Na nge toko ulue angare ole thopolong a thomu nge, omu pelie avele kene ini powe ninenga, na omu pelie avele ako iomu i kima, na omu pelie avele ini nepes itun. 27 Na God i ateal tokokoe areko toko ulue angare o ri ve or ini ngongong, mo or ini ile, aken i pathengal toko powe ninengare ako ve, or ini toko powe ninengare a God itheki avele ma ole mara. Na God i ateal mun tokokoe areko toko ulue angare o ri ve or ini toko polpolnga, mo or ini ile, aken i pathengal toko kima angare ako ve, or ini toko kima angare a God itheki avele ma ole mara. 28 Na God i ateal mun tokokoe areko toko ulue angare o papomnga or avele na o ri ve or ini toko vulutnga na oni silal ir, mo or ini ile, aken i pathengal toko ulue angare ako ve, ur ako o papomnga i, kene ini ur polpolnga a God itheki. 29 Na God i oma venen aken mo aro toko e avele i pavurvur aro i ri ve, “Nge sivengek lek mire inga, tho velpol ini a God ile.” 30 Ave God ienga inga ako i pateo thomu a Krais Jisas nge. Na nge ler teoong aken, God i sungu mun ile mire sivenga a it nge, na i pamen senu it tomo nge i, na i pariri it a itheki, ma i pavthopot it nge ler vothung kerenga. 31 Maken i sivenga ako aro te oma ranga ve ako God ile erere i ri nge, ma i ri vene:
“Aro ve toko e i papomnga toko e,
i sivenga ako aro i papomnga Toko Pomnga
nge ile omaing aken.” Jeremaia 9:24