1 Poru, Iesu Keriso oya nog abnawa, ge nu gwanunwa Timoti apa onne Pirimon me nu evunwa nonunmagawa nau desiroma abnawa. 2  ✡ 1Ko 4:17; 2Ti 2:3Sira nu yogiyunwa Apia, nu mut abnawa desiroma Arukipas, sira siosi me gwe geuma danave wakenewa mu gumbo onne.

3 Mamunwa God sira Ayapan Iesu Keriso gumbe God ano oraiwa ge yum ye guniyap wakeigimpe.

4 Ne nun neuma danave genan anoeni, sira God neuma gumbe kum evedni gaun veni. 5 Kuiyawa ne anona anotumat geuma me Ayapan Iesu oya sira baigan geuma iyayapan iyakaisi igiyawa munan. 6 Ne imunap, ge yaimoyai yaug anoa dividivi oraiwa me Keriso oya etewa, sira ne imunap ge anotumat gumbe baigan toboratanwa me yusipamit ag yaipe. 7  ✡ 2Ko 7:4Gwanen, nu baigan geuma gumbe degadega kokavitwa ge watmemeyam kokavitwa tamtu, kuiyawa ge iyayapan iyakaisi nonowa yusiwa munana.

8 Ne oma ane divi atan oya yusipamit dirukna Keriso gumbe. 9 Megara ne imunap baigan gumbe nun genan watna. Ne Poru tayawa da, sira gare mame Iesu Keriso oya nog abnawa eni. 10  ✡ 1Ko 4:9,15Ne nog danave wakeeni kumiwa apa utunwa Onesimas* Me Pirimon ankwatave nau aivi abnawa, sira me Iesu gumbe anotumat aune Poru gumbe. barauna. Me oya ne imunap genan nun watna. 11 Namu me oma den ane nau genan ane, megara gare me oma ane ge ge nenan nau ape.

12 Ne me genan baraueni taig gungap onivi. Me nonenmagawa di. 13 Ne gae oraiwa oya nog danave wakeeni kumiwa apa, ne me aupopo gunap wakepa genanwa oya nau apa. 14 Megara ne yaug anona divi da gwangap den atna. Kuiyawa baigan oya bira da yusipamit den dirukpe, megara ge nonegmagawa gumbe a. 15 Me dud kum koni kusi da gungap painau aig wakene. Ne anoeniwa, natawa me anten ge me sira taig aug gungap wakeigimpe yaibobot viripusiwa onan. 16  ✡ 1Ti 6:2Gare me ankwatave nau aivi abnawa mina onan, me ankwatave nau aivi abnawa egavewa, nu gwanunwa nonunmagawa. Me natawa, ne gunap, sira anoeni me di egaviren ge gungap, kwapiwa gumbe sira Ayapan gumbe.

17 Ge yaug anoa ne evegwa oraiwa ipewa, ne baigan negege mina me baiganiya. 18 Me ge watkukam gennewa, sira garawa gentanit di, me oya wa anotna. 19 Ne Poru naninap gigirum mame teeni. Ne garawa me oya gentna.

—Gare mame wakewake geuma ne gunap onne, megara me oya ne divi da den watna.— 20 E, ne evenwa, ne imunap Ayapan gumbe garawa ge gungap autan anoeni. Ne nonenmagawa yusiwa Keriso gumbe wana. 21 Ne anotumat eniwa ge nonwa auwa, meoya gigirum mame genan tena. Kuiyawa ne yaug anona, ne ano veniwa me kusikaren go ge awa me kokavit.

22  ✡ Pir 1:25; 2:24Da sira, vintan arawa tamibarip nenan aya. Ne anotumat eni nun yeuma gumbe ne oma ane guniyap onetna.

23  ✡ 1Ko 1:7Epapuras me ne gaibu nog abnawa Keriso Iesu oya, me kaiwa guniyap waivi. 24  ✡ 1Ko 4:10-14Ne nau desiroma Mak, Aristarukas, Demas ge Ruk mu kaiwa guniyap veme.

25 Ayapan Iesu Keriso ano oraiwa meuma guwewa gaibu wakeigimpe.