1 Leeme Silok, nenia a emi asu minu, atla nu uga lox asepsu ia. La uga rupe limixin munepen minia di goxo lok momo aksaksa ria. 2 O Leeme Silok, nia agang teng saparav u ri loklok tooro. Nenu ne Moroa rak, la uga lox aroo ia basinge lanmeres. 3 La uga lox asepsu ia basinge lamaaut atla ga auret kusu ana met. Nia aga mumu langas uto xa xopok at lemenemen at labarongan, ketla nenu uga lox asepsu ia basinge lanmet.

4 Nemi luvuttadi ruturun teren, minak pixan emi asu ri Leeme Silok! Mina doma lempanga silok Laradi Melemelengan gara lok pam i, la mina tong loklox avukat tin. 5 Lumukmusak teren kopmen nak lox abao, ketla loklok nunuan teren i nemen at levenaleng axap at lorooro rak. Kuren la levengkamkabili dan ba sesen su at luxatli rak at laxanimin, ketla lomomo naba ravasu maxantamak suubu.

6 Nia aga nemen avukat, la aga doma i do, tepanga noxo sev asi ia. 7 Leeme Silok, ugak lok lempanga nunuan tia. Uga rupe ia ngan loogu matmatkun to at lempatkaana silok. Ketla melemu uga lox alipe manga rak la nia aga marat.

8 Leeme Silok, gano aga ro ke ram. Aga ngising aleng u ri loklok tooro keretna. 9 O Leeme Silok, uba ruuna ka lavanga salai at lanmet tarak? Luunun salai uba ruuna ka i do nia ana si uto at lamaaut? Kereva, i epovo limixin diga met pam dina emi asu minu? I epovo bok dina tong asu lebelen tuntun lexen taram? 10 Leeme Silok, una ronga ia, la una lox asuusu lebelen tuntun tia! Lok tooro ia, Leeme Silok!

11 Ketla monga lingina ura lok kun pam lanbulu rak mi liriti momo. Ura lok kepe vam lumumuat at labalak, la ura lox aumsu ia mi lososoro. 12 Kuren la nia noxo vamngus, anak pixan emi asu minu. Leeme Silok, nenu ne Moroa rak. Anaba tong avukat amisik tu.