མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌།
མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌སི༌ སྤེ༌ཆའེ༌ སྐོར༌།
གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌སི༌ སྐོར༌ལ༌ འི༌ སྤེ༌ཆ༌བོ༌ ལུ༌ཀའེ༌ བྲིའ༌ ཛད༌ཏེ༌ ཨིན༌ནོག༌, ཁོང༌ ནི༌ ལུ༌ཀའེ༌ གའ༌མོའེ༌ ནས༌ཚུལ༌ བྲིའ༌ ཛད༌ཁན༌ནི༌ ཏེན༌ན༌ མི༌བོ༌ ཨིན༌ནོག༌། ཁོང༌ངི༌ འི༌ སྤེ༌ཆ༌བོ༌ ཡེ༌ཤུ༌ མ༌ཤི༌ཀ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 34 ཉེ༌ཁོར༌ལ༌ བྲིའ༌ ཛདས༌། ལུ༌ཀའེ༌ འི༌ སྤེ༌ཆ༌བོ༌ ཐེའུ༌ཕེ༌ལུས༌ལ༌ བྲིའ༌ ཛདས༌ཏེ༌ ཨིན༌ནོག༌, ཀ༌བོའ༌ ཁོང༌ངི༌ སྔུན༌ལ༌ མ༌ཤི༌ཀའེ༌ མི༌ཚེ༌ སྐོར༌ལ༌ གའ༌མོའེ༌ ནས༌ཚུལ༌ལི༌ སྤེ༌ཆ༌བོའང༌ བྲིའ༌ ཛད༌ཏེ༌ ཨིན༌པིན༌།
འི༌ སྤེ༌ཆ༌བོ༌ ཁག༌ཅན༌ཞིག༌ ཨིན༌ནོག༌, ཅིའ༌ཟེར༌ན༌ འི༌བོ༌ གའ༌མོའེ༌ ནས༌ཚུལ༌ལི༌ སྤེ༌ཆ༌ ཞི༌ཀོ༌ ཉམ༌པོ༌ བྲེལ༌ཏེ༌ ཡོད༌ཏེ༌ ཨིན༌ནོག༌, ཀ༌གུན༌ནི༌ མ༌ཤི༌ཀའེ༌ ཆག༌ལས༌ དང༌ ལབ༌ཞ༌གུན༌ནི༌ སྐོར༌ལ༌ ཤད༌དད༌། ཡེ༌ཤུ༌ ནམ༌ཁའ༌ ལེན༌ན༌ ཛད༌ཏེ༌ སྟིང༌ནེ༌ ཆོས༌ཚོགས༌གུན༌ ཀ༌ཟུག༌གི༌ ལྡན༌, ཏེ༌བོའེ༌ སྐོར༌ ཤད༌ཅེས༌པོའེ༌ འི༌ སྤེ༌ཆ༌བོ༌ གའ༌མོའེ༌ ནས༌ཚུལ༌གུན༌ ཉམ༌པོ༌ བྲེལ༌ཏེ༌ ཨིན༌ནོག༌། འི༌ སྤེ༌ཆའེ༌ མ༌ཤི༌ཀའེ༌ ནང༌ང༌ ཏད༌པ༌ཅན༌གུན༌ ཀ༌ཟུག༌གི༌ ཡ༌ཧུ༌དཱའེ༌ ཡུལ༌ནེ༌ ཇིག༌རྟེན༌ གང༌པོའེ༌ མི༌རིགས༌སི༌ ནང༌ང༌ ཕེལ༌ཁན༌བོ༌ ལྟན༌ན༌ ཛད༌ད༌ནོག༌། གོ༌མའེ༌ ལོ༌ 34 ནང༌ང༌ ཆོས༌ཚོགས༌གུན༌ ཀ༌ཟུག༌གི༌ ལྡན༌ཏེ༌ ཕེལ༌ཁན༌བོའེ༌ སྐོར༌ལ༌ འི༌ ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌།
འི༌ སྤེ༌ཆའེ༌ ཡེ༌ཤུའི༌ སྐུ༌ཚབས༌གུན༌ནི༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ལི༌ སྐོར༌ལ༌ ལབ༌ཞའ༌ སལ༌ཅེས༌པོའེ༌, ཡེ༌ཤུ༌ མ༌ཤི༌ཀའེ༌ ཆག༌ལས༌གུན༌ ཏ༌རུང༌ངའང༌ ཅོའ༌ ཛད༌ཁན༌བོ༌ ལྟན༌ན༌ནོག༌། ཡང༌ དཀོན༌མཆོག༌གི༌ ཁོང༌གུན༌ནི༌ ཕྲོའ༌ ཛད༌པ༌ ཛད༌ཁན༌གུན༌ གྱུད༌ཏེ༌ ཁོང༌གུན༌ནི༌ ཤད༌ཁན༌གུན༌ དྲང༌པོ༌ ཨིན༌ཁན༌བོ༌ ལྟན༌ན༌ནོག༌, ཏེ༌གུན༌ མ༌ཚད༌ ཀ༌ཟུག༌གི༌ ཆོས༌ཚོགས༌གུན༌ལ༌ ནགས༌ ལྟན༌ཁན༌ནི༌ པ༌འུ༌ལུའི༌ ནང༌ང༌ གྱུར༌ཇ༌ ཡོངས༌ཏེ༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ ལབ༌ཅེས༌ དང༌ ཆོས༌ཤད༌ཅེས༌སི༌ ཕིའ༌ ནགས༌བར༌དོ༌ ནམས༌ཁན༌བོའང༌ ལྟན༌ན༌ནོག༌།
འི༌ སྤེ༌ཆའེ༌ ང༌དང༌ང༌ པ༌འུ༌ལུའི༌ ཀ༌ཟུག༌ ནས༌ལུག༌གི༌ ནང༌ང༌ ཆོས༌ཚོགས༌ སོ༌སོའ༌ ཆག༌བྲིས༌གུན༌ བྲིའ༌ ཛད༌ཁན༌བོ༌ ཧ༌གོ༌ཅེས༌ལ༌ རོགས༌ ཅོའ༌ནོག༌, ཏེ༌ ནས༌ལུག༌གུན༌ པ༌འུ༌ལུའ༌ ནགས༌ ཐོང༌ཁན༌ ཚང༌མ༌ ཡང༌ ཆོས༌ཚོགས༌གུན༌ནི༌ ནགས༌བར༌དོའེ༌ དོང༌ལེན༌ ཅོ༌ཁན༌གུན༌ ཨིན༌།།
1
དམ༌པའེ༌ ཐུག༌ཉིད༌དི༌ ཞལ༌ཆད༌།
1:1 ནེ༌ 5
1-2 ཅེས༌པའེ༌ ཐེའུ༌ཕེ༌ལུས༌ ངའེ༌ བྲིས༌ཁན༌ནི༌ སྤེ༌ཆ༌ ཏང༌པོའེ༌ ནང༌ང༌, གཙོ༌བོ༌ ཡེ༌ཤུ༌ དཀོན༌མཆོག༌གི༌ ནམ༌ཁའ༌ ལེན༌ལེན༌ ཚོག༌པ༌ ཁོང༌ངི༌ ལབ༌ཞ༌ སལ༌ཁན༌ དང༌ ཆག༌ལས༌ ཛད༌ཁན༌ ཚང༌མའེ༌ སྐོར༌ལ༌ བྲིས༌ཏེ༌ ཡོད༌། ནམ༌ཁའ༌ ལེན༌ན༌ ཛད༌དི༌ སང༌ སྔུན༌ལ༌, ཡེ༌ཤུའི༌ ཁོང༌རང༌ངི༌ ལྡམ༌མ༌ ཛད༌ཁན༌ནི༌ སྐུ༌ཚབས༌གུན༌ལ༌ དམ༌པའེ༌ ཐུག༌ཉིད༌ གྱུད༌ཏེ༌ ལབ༌ཞ༌ སལ༌ཏེ༌ ཨིན༌པིན༌། 3 རྡུག༌ངལ༌ ནམས༌ཏེ༌ སྟིང༌ནེ༌ ཡེ༌ཤུའི༌ ཁོང༌ སོན༌ཏེའ༌ ཞངས༌ཁན༌ནི༌ སྟགས༌ མང༌པོ༌ ཁོང༌གུན༌ལ༌ ལྟན༌ན༌ ཛད༌ཏེ༌, ཞག༌ 40 ཁོང༌གུན༌ལ༌ ཁོང༌རང༌ སྔོན༌ ཅུག༌ག༌ ཛདས༌ ཡང༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ད༌ ཛདས༌།
4 ལན༌ཅིག༌ ལོབ༌ཕྲུགས༌གུན༌ ཉམ༌པོ༌ དོན༌ཏང༌ དོན༌ནི༌ ཏུས༌ ཡེ༌ཤུའི༌ མོལས༌, "ངའེ༌ ཁྱོ༌ཞ༌གུན༌ལ༌ ཟེར༌ཁན༌ ནང༌ཞིན༌, ངའེ༌ ཡབ༌བི༌ ཞལ༌ཆད༌ ཛད༌ཁན༌བོ༌ ཐོབ༌ཐོབ༌ ཚག༌པ༌ ཁྱོ༌ཞའ༌ ཡེ༌རུ༌ཤ༌ལེམ༌ནེ༌ ཕི༌ལོག༌ག༌ མ༌ཆ༌། 5 ཡོ༌ཧཱ༌ནན༌ནི༌ མི༌གུན༌ལ༌ ཆུའི༌ཁྲུས༌ ཏངས༌ཏེ༌ ཨིན༌པིན༌, ཨིན༌ནའང༌ ཞག༌ ཁ༌ཅིག༌གི༌ ནང༌ང༌ ཁྱོ༌ཞ༌གུན༌ལ༌ དམ༌པའེ༌ ཐུག༌ཉིད༌དི༌ ཁྲུས༌ཐོབ༌ཨིན༌།"
དཀོན༌མཆོག༌གི༌ ཡེ༌ཤུ༌ ནམ༌ཁའ༌ ལེན༌ན༌ ཛདས༌།
1:6 ནེ༌ 11
6 སྐུ༌ཚབས༌གུན༌ ཡེ༌ཤུ༌ ཉམ༌པོ༌ ཛོམས༌ཏེ༌ ཡོད༌ ཟ༌ནེ༌ ཁོང༌གུན༌ནི༌ ཟེརས༌, "གཙོ༌བོ༌ལེ༌, ཉེ༌རང༌ངི༌ ཨིས༌ར༌ཨེལ༌པ༌གུན༌ལ༌ རོམ༌མི༌ ཝང༌ནེ༌ རང༌ཝང༌ སལ༌ཏེ༌ ང༌དང༌ངི༌ གྱལ༌སྲིད༌པོ༌ ལོགས༌ཏེ༌ ཁྱོང༌ང༌ ཛད༌ཅེས༌སི༌ ཏུས༌པོ༌ ཨིན༌ན༌?"
7 ཡེ༌ཤུའི༌ ཁོང༌གུན༌ལ༌ མོལས༌, "ཏེ༌ ཏུས༌སྐབས༌ དང༌ ནས༌ལུག༌ གུན༌ ལྡམ༌མ༌ ཛད༌ཅེས༌སི༌ ཝང༌བོ༌ ཡབ༌ ཅིག༌པོའ༌ ཡོད༌ཏེ༌ ཨིན༌ནོག༌, ཡང༌ ཁྱོ༌ཞའ༌ ཏེ༌གུན༌ ཤེས༌གོས༌ མེད༌པ༌ ཨིན༌ནོག༌། 8 དམ༌པའེ༌ ཐུག༌ཉིད༌ ཁྱོ༌ཞའེ༌ཀ༌ བབས༌སི༌ ཏུས༌, ཁྱོ༌ཞ༌གུན༌ལ༌ སྟོབས༌ ཐོབ༌ཏེ༌ ཁྱོ༌ཞ༌གུན༌ནི༌ ཡེ༌རུ༌ཤ༌ལེམ༌, ཡ༌ཧུ༌དཱ༌ ཡུལ༌ གང༌པོ༌, ས༌མར༌རི༌ཡཱ༌ ཡང༌ ཇིག༌རྟེན༌ གང༌པོའེ༌ ནང༌ང༌ ངའེ༌ སྤང༌པོ༌ ཏང༌ཨིན༌།"
9 ཏེ༌ ཚང༌མ༌ མོལ༌ཏེ༌ སྟིང༌ནེ༌ ཁོང༌གུན༌ནི༌ མིག༌གི༌ དུན༌ལ༌ གཙོ༌བོ༌ ཡེ༌ཤུ༌ ནམ༌ཁའ༌ ཁྱེར༌ར༌ ཛད༌ཏེ༌ སྲིན༌ནི༌ ཀབ༌བ༌ ཛདས༌ ཡང༌ ཁོང༌གུན༌ནི༌ ཁོང༌ ཇལ༌ མ༌ཐུབ༌། 10 ཁོང༌གུན༌ནི༌ ཡེ༌ཤུ༌ ནམ༌ཁའ༌ ལེན༌ན༌ ཛད༌ཁན༌བོའ༌ ལྟེན༌ དུགས༌ཏེ༌ ཡོད༌ ཟ༌ནེ༌, ཧུན༌མེད༌ལ༌ མི༌ ཀོས༌ ཀར༌པོ༌ གོན༌ཁན༌ ཉིས༌ ཁོང༌གུན༌ནི༌ དུན༌ལ༌ ཇལ༌ཏེ༌ 11 མོལས༌, "གཱ༌ལིལ༌ལི༌པ༌གུན༌, ཅི༌ཕིའ༌ ནམ༌ཁའ༌ ལྟས༌ཏེ༌ དུག༌གད༌? ཀ༌ཟུག༌ ཁྱོ༌ཞའེ༌ ཡེ༌ཤུ༌ ནམ༌ཁའ༌ ལེན༌ན༌ ཛད༌ཁན༌བོ༌ ཐོང༌, ཏེན༌ན༌ ཙོགས༌ལ༌ ཁོང༌ ཡང༌སྐྱར༌ ལོགས༌ཏེ༌ སྐྱོད༌ཨིན༌།"
ཡུ༌དཱའེ༌ ཚབས༌ལ༌ སྐུ༌ཚབས༌ སྐོའ༌ ཛདས༌།
1:12 ནེ༌ 26
12 ཏེ༌ སྟིང༌ནེ༌ ཁོང༌གུན༌ ཨོ༌ལིཝ༌ཝི༌ རི༌ * 1:12 འི༌ རི༌བོའི༌ཀ༌ ཨོ༌ལིཝ༌ཝི༌ ལྕང༌མ༌ མང༌པོ༌ སྐྱེས༌ཏེ༌ ཡོད༌པ༌ འི༌བོའ༌ ཨོ༌ལིཝ༌ཝི༌ རི༌ ཟེར༌རད༌པིན༌། ཀ༌ནེ༌ བབས༌ཏེ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོདས༌, ཀ༌བོ༌ གྱལ༌ས༌ནེ༌ ཀི༌ལོ༌མི༌ཀྲར༌ ཅིག༌ ཐག༌རིང༌ང༌ ཡོད༌པིན༌། 13 ཏེ༌རུ༌ ལེབ༌བ༌ཅིག༌, སྐུ༌ཚབས༌གུན༌ སྔུན༌ལ༌ དུགས༌ཏེ༌ ཡོད༌ཁན༌ནི༌ ཁང༌པའེ༌ སྟང༌ཐོག༌ག༌ སོང༌།
ཁོང༌གུན༌ པི༌ཏྲར༌, ཡོ༌ཧཱ༌ནན༌, ཡ༌ཀོབ༌, ཨེན༌གྲིརུ༌, ཕི༌ལིབ༌, ཐོ༌མཱས༌, བར༌ཐོལ༌མཱ༌, མད༌ཐཱ༌, ཨལ༌ཕཱི༌འུས༌སི༌ བུ༌ཚའ༌ ཡ༌ཀོབ༌, ཤི༌མོན༌ ཡུལ༌དད༌ཅན༌ དང༌ ཡ༌ཀོབ༌བི༌ བུ༌ཚའ༌ ཡུ༌དཱ༌ གུན༌ ཨིན༌པིན༌། 14 ཏེ༌ སྐུ༌ཚབས༌ ཚང༌མ༌ སེམས༌ ཅིག༌ སོང༌ཏེ༌ ཏུས༌གྱུན༌ མོས༌ལམ༌ ཞུའ༌ལ༌ ཛོམ༌མད༌པིན༌, ཞན༌ བུ༌མོ༌ ཁ༌ཅིག༌, ཡེ༌ཤུའི༌ ཨ༌མ༌ མིར༌ཡམ༌ དང༌, ཡེ༌ཤུའི༌ ནོ༌གུན༌ནའང༌, ཁོང༌གུན༌ ཉམ༌པོ༌ ཛོམ༌མད༌པིན༌།
15 ལན༌ ཅིག༌ ནམ༌ ཏད༌པ༌ཅན༌ནི༌ མི༌ 120 ཛོམས༌ཏེ༌ ཡོད༌དི༌ ཏུས༌, པི༌ཏྲར༌ ལངས༌ཏེ༌ མོལས༌, 16 "སྤུན༌གུན༌ ཀ༌ཟུག༌ དམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌ ནང༌ཞིན༌, དམ༌པའེ༌ ཐུག༌ཉིད༌དི༌ གྱལ༌པོ༌ དཱ༌བིད༌ གྱུད༌ཏེ༌ ཡུ༌དཱའེ༌ སྐོར༌ལ༌ ལུང༌སྟན༌ ཤད༌ཁན༌གུན༌ གྲུབ༌གོས༌ཏེ༌ ཨིན༌ནོག༌, ཀ༌བོ༌ ཡུ༌དཱ༌ ནི༌ ཡེ༌ཤུ༌ ཟུམ༌ཁན༌གུན༌ནི༌ ལམ༌ལྟན༌པ༌ གྱུར༌། 17 ཁོ༌ ང༌ཞའེ༌ ཕྲོ༌པ༌ ཡང༌ ཁོའེ༌ ང༌ཞའ༌ ཉམ༌པོ༌ ཞབ༌སྟོག༌ ཞུས༌ཏེ༌ ཨིན༌པིན༌།"
18 ༼ཨིན༌ནའང༌ ཁོའེ༌ ལས༌ངན༌བོའེ༌ རིན༌བོའ༌ ཞིང༌ཞིག༌ ཉོས༌, ཤི༌ཏེ༌ སའེ༌ཀ༌ བུད༌, ཁོའེ༌ གྲོད༌པ༌ ཆད༌ཏེ༌ ནང༌ཆ༌ ཚང༌མ༌ བིང༌། 19 ཡང༌ ཏེ༌ཟུག༌ བྱུང༌ཁན༌བོ༌ ཡེ༌རུ༌ཤ༌ལེམ༌པ༌ ཚང༌མའེ༌ ཚོར༌, ཏེ༌ ཞིང༌བོའེ༌ མིང༌ང༌ ཨིབ༌རི༌པའེ༌ སྐད༌དི༌ ནང༌ང༌ ཨ༌ཀེལ༌ད༌མ༌ ཏགས༌, ཀ༌བོའེ༌ ཏོན༌བོ༌ ཁྲག༌གི༌ ཞིང༌ ཨིན༌ནོག༌༽།
20 པི༌ཏྲར༌རི༌ མོལས༌, "སུང༌གུར༌རི༌ སྤེ༌ཆའེ༌ ནང༌ང༌ 'ཁོའེ༌ ཁང༌པའེ༌ ནང༌ང༌ སུའང༌ མ༌དུག༌ག༌ ནང༌སྟོང༌ ཆ༌ཤིག༌།'† 1:20 སུང༌གུར༌རི༌ སྤེ༌ཆའེ༌ 69:25 སུང༌གུར༌རི༌ ཞན༌ཡང༌ ནས༌ས༌ཞིག༌གི༌ཀ༌, 'ཁོའེ༌ ཝང༌སྲུལ༌ཅེས༌སི༌ ཀོ༌ས༌ ཞན༌ཞིག༌གི༌ ཁྱེར༌ཨིན༌'‡ 1:20 སུང༌གུར༌རི༌ སྤེ༌ཆའེ༌ 109:8 བྲིའ༌ ཛད༌ཏེ༌ ཨིན༌ནོག༌།"
21-22 "ཏེ༌བོའེ༌ཕིའ༌ གཙོ༌བོ༌ ཡེ༌ཤུ༌ ང༌དང༌གུན༌ ཉམ༌པོ༌ ཡོད༌ ཟ༌ནེ༌ ༼ཡོ༌ཧཱ༌ནན༌ནི༌ ཡེ༌ཤུའ༌ ཁྲུས༌སལ༌ལི༌ ཏུས༌ནེ༌ ཁོང༌ ནམ༌ཁའ༌ ལེན༌ལེན༌ ཚག༌པ༌༽ ཏུས༌གྱུན༌ ང༌དང༌ ཉམ༌པོ༌ ཡོད༌ཁན༌གུན༌ནི༌ ཕྲོ༌ནེ༌ ང༌དང༌ངི༌, ཡུ༌དཱའེ༌ ཚབས༌ཤིག༌ ལྡམ༌གོས༌། སུ༌ཞིག༌ ལྡམ༌ནའང༌ ཁོ༌ ང༌དང༌ ཉམ༌པོ༌ ཡེ༌ཤུ༌ སོན༌ཏེའ༌ ཞངས༌ཁན༌ནི༌ སྤང༌པོ༌ གྱུར༌གོས༌"
23 ཏེ༌ནེ༌ ཁོང༌གུན༌ནི༌ མི༌ ཉིས༌སི༌ མིང༌ ལྡམ༌མ༌ལ༌ ཁྱོངས༌, མིང༌ ཅིག༌པོ༌ ཡོ༌སེབ༌ ཡ༌ བཱར༌ས༌བས༌ ༼ཀ༌བོའ༌ ཡུས༌ཏུས༌སའང༌ ཟེར༌རད༌པིན༌༽ ཡང༌ མིང༌ ཅིག༌པོ༌ མད༌ཐི༌ཡས༌ ཨིན༌པིན༌། 24-25 ཏེ༌ནེ༌ ཁོང༌གུན༌ནི༌ མོས༌ལམ༌ ཞུས༌, "ཀྱེ༌ གཙོ༌བོ༌, ཉེ༌རང༌ངི༌ མི༌ཚང༌མའེ༌ སྙིང༌ ཁྱེན༌ན༌ནོག༌། སྐུ༌ཚབས༌སི༌ ལས༌ ཕངས༌ཏེ༌ འོས༌པ༌ ཨིན༌ཁན༌ནི༌ ཉལ༌ཝའེ༌ ནང༌ང༌ སོང༌ཁན༌ནི༌ ཡུ༌དཱའེ༌ ཚབས༌ལ༌, ཡེ༌ཤུའི༌ སྐུ༌ཚབས༌ དང༌ ཞབ༌སྟོག༌ ཞུ༌ཅེས༌སི༌ ཕིའ༌ འི༌ ཉིས༌ཀོའེ༌ ནང༌ནེ༌ ཉེ༌རང༌ངི༌ ལྡམ༌མ༌ ཛད༌ཁན༌བོ༌ ང༌ཞའ༌ ལྟན༌ན༌ ཛད༌།" 26 ཆོ༌ལོ༌ རིལ༌ཏེ༌ གྱན༌ གྱབས༌པ༌ མད༌ཐི༌ཡས༌སི༌ མིང༌ བིང༌, ཡང༌ ཁོ༌ སྐུ༌ཚབས༌ རྕུག༌ཤིག༌གི༌ ཕྲོའ༌ སྲེས༌།