MATIU
Ñetï garosikao
Matiu ñetï epovoz ñetï kapot ev. Met ñetï epov menah-pop Matiu Iesuz mañairooh-abanari 12 porihanañ nap, met pim abat modao Livai. Met pi mamog Roma gavman poriz takes monis bovai emoohan Iesuhö pinañ honeo parup sapanez piin mañahan gog garos tooh-pov betet pim gog abanap ravah.
Met batam Godihö Zuda añarabon epat mañovai emooh, “Tokat Kristo ari eñizohopanez pop meeman erat eñizapanepuh arim ahop ravat hepan.” Met pot mañoohaek Zuda pori hatevetehot pot homeoh, Kristo pop ham eparah meepanen erat ahop ravat het dari eñizohot Roma añarab patari ritou metat bat hor batat meepanen parum zeisik maot sapan, pot ganö homeoh. Povoz Iesu Kristo erahapuh ham eparah ahop narav, oñ erat tovai ñomahan paru pimaz barotap navat het, “Betezap ok,” pot haoh. Met pot Zuda pimeri pimaz ganö homet haohavoz hat aban Matiu pop, pimeri Iesu pi Kristo meepanen erapanez hah-tapup ok, pot homeo badae batat hepan hatahoh, Iesuz ñetï epov menah.
Met añarab Godiz masakavoz roketak hepanez Iesu borë ñetï hah-poñ amun Matiu ev menahan hez.
Met Iesu hañomat maot birirï ravat abarah hasahan krismasañ 30-iz zut bon tah-porah pi tep epat red menah.
Aban Matiu Iesuz ñetiv menahat ev
1
Iesuz iz mimiholoz ñetiv ev
Ruka 3:23-38
1 Met garos aban Abraam heh, met pim ro iz mimip Devid, met Devidiz ro iz mimip Iesu, met Iesu Kristoz iz mimiholoz abatañ ev.
2 Met Abraamiz rop Aisak,
met Aisakiz rop Zekop,
met Zekopoz rohol Zudar pim naner bos,
3 met Zudaz roñariv Peresir Sera,
met parupim nonopuz abatao Tama.
Met Peresiz rop Esron,
met Esroniz rop Ram,
4 met Ramiz rop Aminadap,
met Aminadapiz rop Nason,
met Nasoniz rop Salmon,
5 met Salmoniz rop Boas,
met Boasiz nonopuz abatao Reap.
Met Boasiz rop Obet, met Obetiz nonopuz abatao Rut.
Met Obetiz rop Zesi,
6 met Zesiz rop Devid.
Met Devid pi, Zudaholoz kiñ ahop ravat hehap.
Met Devidiz rop Solomon.
Met ro popuz nonop pi garos Uraia bat heh.
7 Met Solomoniz rop Reaboam,
met Reaboamiz rop Abaia,
met Abaiaz rop Asa,
8 met Asaz rop Zeosapat,
met Zeosapatiz rop Zoram,
met Zoramiz rop Us,
9 met Usaz rop Zotam,
met Zotamiz rop Eas,
met Easiz rop Esekaia,
10 met Esekaiaz rop Manasa,
met Manasaz rop Emon,
met Emoniz rop Zosaia,
11 met Zosaiaz rohol Zeoakinir naner bos.
Met Zeoakin heh-porah aban patarihö Israel añarab basat Babilon zeisik meñehan het añarab poriz mañoohat tovai sooh.
12 Met Babilon poek sat hehapuh Zeoakin pim rop Sialtiel batah.
Met Sialtieliz rop Serubabel,
13 met Serubabeliz rop Abiut,
met Abiutiz rop Elaiakim,
met Elaiakimiz rop Asor,
14 met Asoriz rop Sadok,
met Sadokiz rop Akim,
met Akimiz rop Eliut,
15 met Eliutaz rop Eleasa,
met Eleasaz rop Matan,
met Matanez rop Zekop.
16 Met Zekopoz rop Zosep.
Met Zosep pi Maria Iesu batahapuz abup ravat heh. Met Iesu pop, pi Kristo, batam Godihö pi erat eñizapanez au hahan hehap ok.
17 Met Abraamiz iz mimihol batovai emoohan emohot Devid batahan 14 ravah. Met Devidiz iz mimihol batovai emoohan emohot Zosaia batahan 14 ravah. Met Babilon zeisik Israel añarab basat meñehan het am batovai emoohan emohot Kristo batahan 14 ravah.
Enzolip Zosepen mañah-ñetiv
Ruka 2:1-7
18 Met Iesu Kristo batahavoz ñetiv pot hez. Pim nonop Maria Zosep bapanez au hahan heh, oñ parup nav hehan Godiz Pul Tinapuhö Mariaz ñekevok rop ba ou batah. 19 Tahan Mariaz abü auep Zosep pi aban tinap, povoz Maria ñekevonañ hez-ñetï pov hatevetehapuh Marian tu ravapanez ñetï horï nao namañ, oñ pi, Ne añ okop navotü, pot pi kilam homeoh. 20 Met Zosep pot homehot orat hehan Godiz eenzolip auakavok erat pot mañah, “Zosep, ni Devidiz iz mimip, ni tovai Maria bat hekez kaev ravotun, oñ ni hatevet. Godiz Pul Tinapuhö Mariaz loporih ro okop ba ou batah, 21 povoz batapanen pim abatao Iesu mañ. Met abat potaz kapot epat haom, Piuhö añarab horï tohot hezaek maot pimeri bavatapan.” Pot Zosepen mañah.
22 Met batam propet aban Godihö hahan hatevetet haoh-nap añarabon pot mañooh, 23 “Met tokat ñari añ tohai abup nav-nap ñekevonañ ravat ro nap batapanen añarab pim abatao Imanuel mañohopan,” pot hah. Oñ abat mañapanez hah-potaz kapot epat hez, God darinañ honeo hez. Met Maria ñekevonañ ravahan Aisaiaz batam hahan heh-povoz rotapuv ou haravah.
24 Enzolip auakavok Zosepen pot mañahan Zosep etañ elat bal hahapuh mañahat tat Maria pimamakeh basat meñehan heh, 25 oñ parup honeo naor hehapuh tokat rop batat pim abatao Iesu mañah.