1 YAWEI, yu irrim main preya.

Dumaji yu jidan trubala en raitwei,

yu irrim main preya en ensim mi.

2 Nomo jadjim mi, yu wekinmen,

dumaji yu sabi nobodi iya jidan gudbala, najing.✡ Rom 3:20; Galei 2:16

3 Main bedfren olabat bin tjeisimbat mi en deibin gajim mi.

Deibin pudum mi langa dakwan jeil,

en mi jidanbat jis laik detlot pipul hubin dai longtaim.

4 Wal mi redi blanga gibap.

Mi filim miselp brabli nogudbinji.

5 Mi jinggabat ol detlot dei weya bin binij,

en mi jinggabat ebrijing weya yubin dum.

6 Mi lidimap main bingga blanga prei langa yu.

Jis laik draiwan graun main spirit insaid jidan thestiwan blanga yu.

7 Kwikbala na YAWEI, yu ensim main preya.

Ai kaan dum enijing.

Nomo libum mi iya miselp bambai mi dai en godan langa det pleis blanga ola dedbala pipul.

8 Ebridei yu meigim mi jinggabat blanga yu filing weya yu laigim mi olagijawan,

dumaji mi bilib langa yu.

Main preya gowap langa yu.

Yu shoum mi wujei blanga go.

9 YAWEI mi kaman langa yu blanga kipum mi seif.

Yu seibum mi brom main enami olabat.

10 Yu na main God.

Shoum mi wanim yu wandim mi blanga dum.

Yu jidan gudbala langa mi en yu deigim mi langa det seifwan roud.

11 YAWEI, yu seibum mi jis laik yubin pramis.

Garram yu gudwan filing yu seibum mi brom ol main trabul.

12 YAWEI, dumaji yu laigim mi detmatj,

yu binijimap ol main enami olabat,

dumaji mi na yu wekinmen.