132
Gibit preis blanga det Serramoni Pleis blanga God
1 YAWEI, yu nomo fogedabat Deibid,
en ola adtaim imbin abumbat.
2 YAWEI, yu jinggabat wanim imbin pramis langa yu, det haibalawan God blanga Jeikob,
3 “Ai kaan gobek langa kemp o gobek blanga leidan langa bed,
4 en ai kaan abum spel o silip,
5 raidap ai meigim haus blanga YAWEI, det haibalawan God blanga Jeikob.”
6 Wibin irrim stori langa Bethlahem blanga det Seikridwan Boks,
en wibin faindim im deya langa det pedik gulijap langa det taun gulum Jerim.
7 Melabat bin tok, “Kaman! Wi garra go deya langa det Serramoni Pleis blanga YAWEI
en wi garra nildan en weship im lida langa im speshalwan tjeya.”
8 YAWEI, kaman en jidan deya langa yu Serramoni Pleis garram det Seikridwan Boks, weya pipul sabi yu pawa oldei jidan.
9 Larram ol detlot serramonimen blanga yu oldei dum wanim rait olataim.
Larram ol yu pipul olabat jingat adbala gudbinjiwei.
10 YAWEI, yubin meigim pramis langa yu wekinmen Deibid.
Nomo gibit bekboun langa im, det king weya yubin pikimat.✡ 2 Kran 6:41,42
11 Yubin meigim brabli strongwan pramis langa Deibid, en yu garra oldei kipum det pramis.
“Ai garra oldei meigim wan san blanga yu femili lain jidan king.✡ 2 Sem 7:12-16; 1 Kran 17:11-14; Saam 89:3,4; Eks 2:30
12 If dei jidan trubalawei langa main strongbala pramis,
en if dei teiknodis langa wanim ai dalim olabat,
wal dei garra kipgon jidan king.”
13 YAWEI bin pikimat Saiyan,
en im wandim meigim tharran im kemp.
14 “Iya na ai garra jidan olagijawan,
en iya na ai wandim jidan bos.
15 Ai garra gibit Saiyan ebrijing im wandim,
en ai garra meigim ola powan pipul sedisfaid garram daga.
16 Ebrijing detlot serramonimen dum ai garra gudbinji langa olabat,
en ola pipul garra sing ola song gudbinjiwei.
17 Iya na ai garra meigim wanbala jidan haibala king brom det femili lain blanga Deibid,
en im garra jidan laiga lait weya im shain olagija.✡ 1 King 11:36
18 Ai garra meigim ol im enami olabat jidan sheim nomo lilbit,
bat det kantri weya im garra jidan bos garra abum detmatj ebrijing.”