1 Kaman God! Yu album melabat.

Nomo jidan kwaitbala.

2 Yu luk detlot hu nomo laigim yu!

Yu enami olabat gidap redi blanga fait.

3 Olabat meigimbat ola sigridwan plen blanga yu pipul.

Olabat toktokbat blanga dum nogud ting langa yu pipul hu yu laigim brabliwei en yu oldei lukaftumbat.

4 Olabat tok, “Kaman. Wi garra binijimap olabat wulijim nobodi kaan jinggabat detlot Isreil pipul enimo.”

5 Olabat ol agri gija blanga olabat plen,

en blanga fait langa yu.

6 Dislot pipul brom ol dislot traib na bin meigim dijan plen.

Ola pipul brom Idam, en ola Ishmeil pipul, en ola pipul brom Moweb en ol detlot Heigrait pipul,

7 en ol detlot pipul brom det kantri Gebal, en ola Eman pipul en ola Amalek pipul, en ol detlot pipul brom Filistiya en brom Taya.

8 Detlot pipul brom det kantri Asiriya bin joinap garram olabat du.

Olabat bin jidan brabli gud fren blanga album ol detlot Eman pipul, en ol detlot Moweb pipul hubin brom det femili lain blanga det men neim Lot.

9 God, yu panishim olabat seimwei jis laik yubin dum langa ola Midiyan pipul.

Yu binijimap olabat jis laik yubin binijimap Sisera en im king Jeibin, deya langa det Kishan Riba,✡ Jadj 4:6-22; 7:1-23

10 gulijap langa det taun gulum Endowa.

Deya na yubin bidim olabat en olabat bodi bin jidan nogudwan langa graun.

11 Yu bidim ola boswan blanga olabat jis laik yubin dum langa Oreb en Sib en langa Seba en Seilmuna.✡ Jadj 7:25; 8:12

12 Olabat na bin tok, “Nomeda det kantri blanga God, melabat garra teikoba en meigim im blanga melabat ronwan kantri na.”

13 God, yu spredimat olabat jis laiga das,

en jis laiga draiwan gras weya det win oldei blowimweibat.

14 Jis laik faiya wen im barnimap ola tri,

en jis laik lilwan faiya wen im stadimap bigwan faiya langa ola hil,

15 wal yu andimwei olabat garram yu strongwan win,

en yu meigim olabat bradin garram yu jigiwan win en laitining.

16 YAWEI, yu meigim olabat jidan sheimwan,

en yu meigim olabat sabi det pawa blanga yu.

17 Nomo larram olabat win en meigim olabat jidan brabli bradinwan olagijawan.

Larram olabat sheim brabliwei en dai.

18 YAWEI, meigim olabat sabi oni yu na wanbala det trubala God,

en oni yu na jidan det brabli haibala boswan blanga dijan wel.