1 Nia daangada huogodoo gi momoogo tenetene mo di haga hagaamu a God!

2 Goodou daahili gi nia madamada o dono ingoo.

Goodou hagaamu ina a Mee gi nia daahili hagaamu!

3 Helekai gi God boloo, “Au mee ala ne hai le e haga goboina huoloo!

Au mogobuna le e aamua huoloo

dela e hidi ai o hagadaumee e pala gi lala mmaadagu i oo mua.

4 Digau huogodoo i hongo henuailala e daumaha adu gi di Goe,

digaula e daahili adu gi di Goe i nia daahili hagaamu,

e daahili e hagaamu do ingoo.”

5 Lloomoi gii mmada goodou gi nia mee a God ala ne hai,

nia hegau haga goboina a Mee ala ne hai ang gi nia daangada.

6 Mee ne huli di moana gii hai tenua maangoo.* Exodus 14.21; Joshua 3.14-17

Tadau maadua mmaadua nogo taele i lala i lodo di monowai.

I di gowaa deelaa, gei gidaadou gu tenetene huoloo gi di mee a Mee dela ne hai.

7 Mee e dagi gi ono mogobuna gaa hana hua beelaa,

gei Mee e dadaumada nia henua llauehe.

Digau ala e de hiihai e hagalongo la gi hudee hai baahi gi Mee.

8 Goodou go nia daangada o nia henua huogodoo, hagaamu ina di madau God.

Nia lee o godou hagaamu gi heia gi longono gi nia madagowaa huogodoo.

9 Mee e benebene gidaadou gi dee mmade, ge hagalee hai gidaadou gii too gi lala.

10 Meenei God, Goe gu hagamada gimaadou,

gadoo be nia silber e haga madammaa gi di ahi,

deelaa dau hai gu hagamada gimaadou.

11 Goe guu hai gimaadou gi monnono gi lodo di hele,

ga haga uda gi hongo madau dua nia mee daamaha.

12 Goe guu hai gimaadou gi dagadagahi go madau hagadaumee.

Gimaadou guu hula i lodo di ahi mo di labagee,

gei dolomeenei gei Goe gu laha mai gimaadou

gi lodo di gowaa noho i di aumaalia.

13 Au ga gaamai dagu tigidaumaha dudu gi doo hale.

Au ga gowadu gi di Goe dagu mee dela ne hagababa.

14 Au ga gowadu gi di Goe agu mee ala ne hai iei au bolo e gowadu

i dogu madagoaa nogo i lodo di haingadaa.

15 Au ga gaamai agu siibi e dudu i hongo di gowaa dudu tigidaumaha,

gei au ga tigidaumaha adu gi di Goe nia kau daane mo nia kuudi,

gei nia huiahi o nia tigidaumaha aalaa gaa hula gi nua gi di langi.

16 Lloomoi hagalongo, go goodou huogodoo ala e hagalaamua a God,

gei au ga hagi adu di mee a Mee dela ne hai mai gi di au.

17 Au gu gahigahi a Mee belee hagamaamaa au.

Au gu daahili gu hagaamu a Mee.

18 Maa au gu haga de iloo eau ogu huaidu,

gei di Tagi hagalee hagalongo mai gi di au.

19 God gu longono Ia au, Mee gu longono Ia dagu dalodalo.

20 Au e hagaamu a God, idimaa Mee digi hudua gi daha dagu dalodalo,

be e dugu dono manawa aloho deemodu i di au.