1 Nagra Poli'na aposol ne'mo'na, ama eri'zana mago'a vahe'mo hunantege, mago'a naga'mo'za erio hazagena e'norue. Hianagi Anumza Nafatimo Jisas Kraisi fri'nefinti azeri otinemo'ene, 2 maka nagrane mni'naza nafuhezanena, Galesia mani'naza mono nagamotarega musenkea atreneramantone.

3 Anumza Nafatimofone Ranti Jisas Kraisi asunkuzamo'ene rimpa fruzamo'a tamagrane mesie. 4 Jisasi asimu'a atreno kumitia atrerante'ne. E'inama hu'neana Anumza Nafatimofo avesi avaririno, mopafima amama meni mni'nona kefo avu'avazampinti tahokeno tazahunaku anara hu'ne. 5 Ana hu'negu Anumzamo ra agia, Agra'a eri vava hugahie! Tamage.

6 Nagra antri hue, Anumzamo'a Jisasi asunkuzanteti tamagi hu'nea nagamota netretma, ruzahu musenkemofo amage nentaze. 7 Hanki ru knare musenkea omnene, mago'amo'za tmazeri savri hu'za Jisas Kraisi knare musenkea erisavri hunaku nehaze. 8 Hianagi tagraneno, monafinti ankero vahe'mo, ko'ma tamasmi'nona knare musenke atre'za, ru kema tmasamisazana, kazusifi manigahaze! 9 Ko'ma tmasmi'nona ke menina mago'ene neramasamue, Ko'ma knare musenkema huama hunketa antahi'naza kemofoma ha'ma rente kazigatima kema hanimo'a, kazusifi manigahie!

10 Na'ankure nagrama e'inagema nehuana, vahe'mo'za antahi so'e hunantege, Anumzamo antahi so'e hunantenogu nehufi? Hifi nagrama mraguzamanetuana vahe'mo'za antahi muse hunantehogupi? Nagrama vahe'mo'za antahi muse hunante'nazegu'ma nehanuna, Nagra Kraisi kazokzo eri'za vahera omni'noe.

11 Na'ankure nenafugata nagri'ma navesiana, knare musenkema huama nehuana, vahe'mofo antahintahireti hunoramie huta antahi ama hnazegu nehue. 12 Na'ankure ama ana kea vahepinti e'orina, vahe'mo'za rempia huonami'naze. Hianagi oku'a frakinea kea Jisasi eriama huno nami'ne.

13 Na'ankure korapama Jiu vahe'mota avu'avaza nehua knafina, Anumzamofo avu'ava nehue nehu'na, mono nagama nezmahena, zmazeri havizama hu'noana tamagra ko antahi'naze. (Apo 8:3) 14 Nagra tusi hanaveti'na tagehe'mokizmi zamuzmara amage'nentogeno, anama huazamo'a nagri navuma mni'naza, Jiu vahe'mokizmia zamuzmamofona zmagatere'noe. Nagra tusi hanavetina nagehemofo avu'avara avaririnoe. 15 Hianagi nagra nenrera rimpafina forera osu'nogeno, korapa Anumzamo Agra'a asunkuzanteti huhamprinantenemo muse hunanteno, 16 Agra'a nemofona naveri hige'na, megi'a vahepina knare musenkea huama nehue. Mago vahe'mokizmia ame hu'na nagra zmantahi'onke'noe. 17 Jerusale kumate nagra mareorina, ko'ma mni'naza aposol nagara ome ozmage'noe. Hianagi nagra Arabia kumate vute'na, ete mago'ene Damasakas kumate vu'noe. 18 Ana hute'na, 3'a kafu evige'na, Jerusale kumate vu'na, Pita'ene kea ome nehu'na, 15ni'agna anante mni'noe. 19 Hianagi mago'a mono nenafugizmia ozmage'noanki, Ramofo negna Jemisinke ke'noe. (Apo 9:26-30, 11:29-30)

20 Nagrama amama kreneramuana, Anumzamofo avufina tamage hu'na reramatga nosue. 21 Ana hute'na Jerusale kumara atre'na Siriane, Silisia kaziga vu'noe. 22 Judia kazigama mono nagama Kraisimpi mni'namo'za, nagrira navufina onage'naze. 23 Hianagi tagrama tamentintima nehunkeno, nerahegeta agenke'a nentahuna ne'mo'a, amentintimofo kea huama nehie hu'za nagrikura hu'naze. 24 Na'ankure nagrite'ma fore'ma hu'neazankura, Anumzamofo agi erisaga hu'naze.