1 Nagra Pita'na Jisas Kraisi aposol ne'mo'na, Anumzamo'ma huhampri tamente'nea nagamotma, mopatmi atretma panini hutma Pontusi kazigane, Galesia kazigane, Kapodosia kazigane, Esia kazigane, Bitinia kazigama fretma vu'naza nagamotarega ama avona kreneramue. 2 Anumzana Nafatimo'a, ko antahino keno hu'nea kante, Ruotge Avamumo tamazeri agru hu'nea nagamota, Jisas Kraisi amage'ma antageno, korama'a tagitreno sese huramante'nea nagamotma, asunku'zane rimpa fruzamo'a tamagrane aviteno mesie.

3 Ranti Jisasi Kraisi Nefa Anumzamofo agi'a erisaga hanune, Agri'a tusi'a asunkuzamo higeta, tagu'a rukrehe hunkeno kasefa tasimura tamigeta, Jisasi'ma friteno oti'nea zankura amuhara nehune. 4 Ana kasefa tasimu erisanti harenunana, vga oreno, havizana osuno, fnanene osaniaza monafinka Anumzamo'a anteramante'ne. 5 Tamagra Anumzamofonte tamentinti hazageno, Anumzamo'a hanave'areti kegva huramante'neankita, so'e hutma manigahaze. Tamagri tamahokeno tamaza hunaku retro huntegeno me'neankino, e'i anazama haniana mona mopa vgamare'nea knazupa eama hugahie. 6 Anazama erisaza zankura muse nehazanagi, ama atupa knafina ruzahu ruzahu knazama e'nerisageno, 7 ana knazamo'a tamentintimofona azeri ama huno, kolima tevefi kre agru huno azeri henteofaza hiankna nehiankino, tamentintimo'a koli'a agaterene. E'ina hu'negu ruzahu ruzahu knazama e'nerisageno, tamentintimo'ma hanavematino mesiana, Jisasi'ma eama hania knazupa, husga huramanteno, ra tamagia tamigahie. 8 Hanki tamagra Agrira onke'nazanagi avesinentetma, menina Agrira onkenazanagi, Agritera tamentinti nehuta, tusi musenkase hunteta agi'a erisaga nehaze. 9 Tamagrama tamentintima hanaza zamofo mizama'a, Anumzamo'a tamagu tamamena tamagu vazigahie.

10 Hagi ama ana tahokeno taguvazizana, korapara mago'a kasnampa vahe'mo'za asunkuzamo'ma tamagrite'ma esigura kasnampa kea nehu'za, antahige'za rezagane so'e hu'za ke'naze. 11 Kraisi Avamumo zamagripi mni'neno, Kraisi'ma atama eriteno, ra agima erisia zankura zmasamine. Ana nehige'za zmagra Kraisi'a inankna Ne'mo, ina zupa efore hugahie hu'za hu'naze. 12 Zamagrite'ma eriamama hiana zmagra'a zamaza nosazanagi, tamagriku knare musenkema huama hazafina, monafinti'ma e'nea Ruotge Avamumofo hanavere huama nehaze. Ankero vahe'mo'za anama huamama hzazama kesagura, tusiza huno zmavesi'ne.

13 E'ina hu'negu retro huta antahintahitamia nemanita, tamavufgamofo avesizana kegva negritma, ana miko amuha zantamia, Jisasi'ma eama hanigeno, Anumzamo'a tamaza hania asunkuzante anteho. 14 Ke amage'ante mofavremoza nehazaza nehutma, koma ontahinetma hu'naza tamavutamavamofo avesizana ovaririho. 15 Hianagi Ruotge Hu'nemo'ma tamagima hu'nea ne'kna nehuta, makazama hanafina mni ruotge hiho. 16 Na'ankure anage huno avontafepina krentene, tamagra ruotge huta maniho, na'ankure Nagra ruotge hu'noe. (Lev-Pri 11:44-45) 17 Tamagrama hutma nerafa'e nehaza Anumzamo'a, Agra magokemofonkuke osu Anumzankino, maka vahe'mo'za zamavuzmavama nehazare refkoa huzmantegahie. Ana hu'negu, ama mopafima zoka vahekna huta atupa knafima mni'nenarera, Anumzamofonku kore hunentetma ra agi amiho. 18 Na'ankure tamagrama ketma antahitma hanazana, korapa tamagehe'za zamaza osu zamavuzmava nehaza kante nevazagu, anampinti miza seramantene. Miza seramante'neana haviza nehiazanu, silvane kolireti miza seoramantene. 19 Hianagi haviza osuno afuhe omne sipisipi anenta, Kraisi mrerisa koranu miza seramante'ne. 20 Na'ankure korapa Anumzamo'a, monane mopane tro osu'neno, tazama hanigura Kraisina huhamprinte'ne. Hianagi menina vgare knafina tamagri'ma tamaza hanigu efore hu'ne. 21 Kraisi taza higeta, fripinti azeri otino husga hunte'nea Anumzamofontera tamentintia nehune. E'ina hu'negu tamagra Anumzamofontera tamentinti'a nehutma, amuhara nehaze.

22 Tamagrama tamage kerema amagema antetma nevazazamo, tamazeri agru tamagu tamena higetma, neramafuma ovesinte avesinte tamagu'areti nehutma, tamaguareti hutma mago magomota ovesinte avesintea nehaze. 23 Na'ankure tamagra kasefama hu'nazana, haviza nehia avimazanteti rompage, haviza osu avimzama Anumzamofo mevava kea asimu me'nea ke'areti kasefara hu'naze. (Jon 3:1-9) 24 E'ina hu'negu avontafepina anage hu'ne, maka vahe'mo'za trazankna hunazankino, maka konariri zmimo'a trazamofo amosregna higeno, ana trazamo hagege higeno, amosre'amo evuramiankna hugahaze.

25  Hianagi Anumzamofo nanekemo'a mevava hugahiankiza, ama'i ana naneke huama hu'za tamasami'naze. (Ais 40:6-8)