1  1Kol 9.24-25Tilidabu kaluka꞉isale modo꞉ tamin amilo꞉ elen a꞉no꞉ iyo꞉ iwa dibido꞉ o꞉ngo꞉ma꞉ hegea꞉fo꞉liki, tilidabu man a꞉no꞉ nimo꞉ wida꞉lab. A꞉la꞉fo꞉ko꞉lo꞉ nilo꞉ nai ha꞉na꞉no꞉ tog amilo꞉ ka꞉la꞉lab a꞉no꞉lia꞉, man mogago꞉ ni amilo꞉ ta꞉li dosdo꞉ a꞉lab a꞉no꞉lia꞉yo꞉ gegedela꞉sa꞉ga꞉ ta꞉fa꞉niki. Godeya꞉lo꞉ tog nilino꞉ da꞉fefa꞉ a꞉namio꞉, nio꞉ halalelia꞉sa꞉ga꞉ nai ha꞉na꞉niki. 2 Nio꞉ nai ha꞉na꞉likiyo꞉, nili siyo꞉ Ya꞉suwo꞉ ko꞉lo꞉ si kudu bo꞉fo꞉liki nai ha꞉na꞉niki. Ya꞉su e nili tilidabu wema꞉ mo꞉wo꞉ e ko꞉lo꞉ a꞉lab, a꞉la꞉ta꞉ga꞉ nili tilidabuwo꞉ mada ilili alitaki, nafalelo꞉ ta꞉fa꞉lano꞉ e. Ya꞉su elo꞉ sendelowo꞉ dia꞉nigab a꞉no꞉ eyo꞉ o꞉ngo꞉malo꞉ngo꞉ ba꞉daki, tif amilo꞉ sagalo꞉ dia꞉no꞉ a꞉no꞉leko꞉ asulakiyo꞉, e nagalo꞉wo꞉ odo꞉ ba꞉da꞉i ha꞉na꞉la꞉ga꞉, i malana sowo꞉. Eyo꞉ a꞉la꞉dimida꞉sa꞉ga꞉yo꞉, e ha꞉na꞉sa꞉ga꞉ Godeya꞉ ene dagi ililiba asifo꞉lab. 3 Ya꞉suwa꞉lo꞉ dimido꞉ a꞉no꞉ ko꞉lo꞉ asuluma. Mogago꞉ kalu iliyo꞉ Ya꞉sumo꞉wo꞉ hida꞉yo꞉ nagalo꞉wo꞉ dimiabiki, Ya꞉su e mo꞉ta꞉taki halale kagayo꞉. Gio꞉ tilida꞉da꞉sa꞉ga꞉ ha꞉na꞉ga꞉ ha꞉nakiyo꞉, bo꞉eyaki ta꞉tabena꞉ki, Ya꞉suwo꞉ dinafa fanda asula꞉lubi. 4 Hendele gio꞉ man mogago꞉ o꞉lia꞉ buba꞉li ha꞉na꞉lab ko꞉sega, gi amio꞉ ho꞉bo꞉wo꞉ semo꞉mio꞉ ko꞉lo꞉lab.

5  Job 5.17, Sndn 3.11-12, Kala 3.19Godeya꞉ ene to sa꞉sa꞉lo꞉ a꞉namio꞉, gi ko꞉lo꞉ halale alitakiyo꞉ ene so꞉wale a꞉la꞉sio꞉ ko꞉lo꞉lab ko꞉sega, gio꞉ to a꞉no꞉ ga꞉lila꞉ fo꞉laba꞉le? To a꞉no꞉ a꞉la꞉sio꞉,

7  Lo 8.5Gode eyo꞉ gio꞉ digalalikiyo꞉, gio꞉ mo꞉iligaki, halale kagaya꞉bi. Gode eyo꞉ ge digalalega, ge ene so꞉wale a꞉la꞉li widakigab. Mo꞉wo꞉ henfelo꞉ wenamio꞉, iya a꞉ma꞉yo꞉ ene so꞉waleyo꞉ tambo digala꞉sen. 8 O꞉leaumbo꞉ Gode eyo꞉lo꞉ ene so꞉wale dowab a꞉no꞉ tambo digala꞉sen ko꞉lo꞉, ge mo꞉digalalega, Godeya꞉ ene so꞉walema, gio꞉ uwo꞉ so꞉wa o꞉ngo꞉ ko꞉lo꞉ gab. 9 To nowo꞉ we ko꞉lo꞉ asuluma. Henfelo꞉ wenamio꞉ nili dowa꞉yo꞉ digalab amio꞉, niliyo꞉ e ha꞉ga dowaki, ene wiyo꞉ wabuda꞉sen. O꞉leaumbo꞉ niliyo꞉ Do Hebenelo꞉ a꞉lab a꞉ma꞉ ene ha꞉ga dowaki, mada kudu ha꞉na꞉mela꞉niki. A꞉la꞉galikiyo꞉ nio꞉ mela꞉no꞉ mela꞉no꞉ mela꞉ib. 10 Ho꞉len abolda꞉su wenamio꞉, do i henfelo꞉ wenamilo꞉ma꞉yo꞉ inido꞉ asulab au kudu ha꞉naki nio꞉ digala꞉sen. Ko꞉sega nio꞉ Gode malilo꞉ enen o꞉ngo꞉ doma꞉ki, eyo꞉ nio꞉ asuwa꞉taki digala꞉lab. 11  Ya꞉m 3.17-18Nio꞉ digalab amio꞉, nagalo꞉wo꞉ bo꞉do꞉l ko꞉lo꞉ mo꞉sagalema꞉no꞉. Ko꞉sega nio꞉ digalab amio꞉ kudu ha꞉na꞉no꞉ man a꞉no꞉ asulalikiyo꞉, digalab a꞉ma꞉ fowo꞉ helema꞉ib ko꞉lo꞉, nio꞉ man digalo꞉ dimidaki ha꞉sa mesa꞉no꞉.

12  Ais 35.3Gio꞉ halaido꞉lo꞉ma dowo꞉ ko꞉lo꞉, gili dagiyo꞉ sondofa꞉le hesedab a꞉no꞉lia꞉ gido꞉fo꞉wo꞉ bibisodab a꞉no꞉lia꞉yo꞉ halaido꞉wo꞉ diaki alu wa꞉la꞉ma. 13  Sndn 4.26Tog gilo꞉ ha꞉na꞉no꞉ a꞉no꞉ digale fadama. A꞉la꞉dimidalikiyo꞉ giligisen kaluka꞉isale i a꞉no꞉ mo꞉mogagilaki, falele alifa꞉ib.

14 Gio꞉ kaluka꞉isale nol o꞉lia꞉yo꞉ ha꞉sa doma꞉nikiyo꞉, halale asulaki keda꞉bi. A꞉la꞉ta꞉ga꞉ gio꞉ malilo꞉ doma꞉nikiyo꞉, nanogo꞉ halaido꞉ dia꞉bi. Kaluka꞉isale abeyo꞉ malilo꞉lo꞉ mo꞉dowab a꞉no꞉, e Alano꞉ mo꞉ba꞉ba꞉ib. 15 Kaluka꞉isale nol a꞉no꞉ Godeya꞉lo꞉ ha꞉fo꞉ disa꞉lan man a꞉no꞉ mo꞉diabena꞉ki, dinafa tili dowa꞉bi. Kaluka꞉isale gi usamio꞉ fo halan o꞉leo꞉ngo꞉ dowabena꞉ki, dinafa tili dowa꞉bi. Fo halan a꞉no꞉ giya dowalega, hida꞉yo꞉wo꞉ alan dowaki, kaluka꞉isale gio꞉lo꞉, nolo꞉lo꞉ Godeya꞉ siwa꞉l amio꞉ heyo꞉ mogago꞉ doma꞉ib. 16  Mo꞉mo꞉ 25.29-34Kaluka꞉isale nolo꞉ uwo꞉ dian man a꞉no꞉ dimidabena꞉ki, dinafa tili dowa꞉bi. Iso꞉ e Godeya꞉ kelego꞉ nafa a꞉no꞉ o꞉ngo꞉malo꞉ngo꞉ ba꞉ba꞉ ko꞉lo꞉, giliyo꞉ a꞉la꞉bo꞉ dimida꞉so꞉bo. Iso꞉ eyo꞉ ma꞉nda꞉su a꞉no꞉ alan asulaki, ene wi nafa wa꞉la꞉b di a꞉no꞉ a꞉ma꞉ kililiaki wala꞉. 17  Mo꞉mo꞉ 27.30-40Iso꞉ elo꞉ dimido꞉ man a꞉no꞉ gio꞉ asulo꞉. Wi elo꞉ a꞉no꞉ ma꞉no꞉wa kililia꞉sa꞉ga꞉, iyaya꞉yo꞉ e nafa mesea꞉kiyo꞉, dulugu sama꞉ki asulo꞉ ko꞉sega, iyaya꞉yo꞉ e gola ba꞉ba꞉. Eyo꞉ iyamo꞉wo꞉ ya꞉laki susi ha꞉iyo꞉ ko꞉sega, asulo꞉ ho꞉gi nowo꞉ a꞉dia꞉no꞉wo꞉, fogo꞉ aundo꞉ma dowo꞉.

18  Kis 19.16-20, Lo 4.11-12Gio꞉ Godelo꞉wa yalikiyo꞉, hen gi siya꞉lo꞉ ba꞉da꞉sa꞉ga꞉lo꞉ dagiya꞉lo꞉ goma꞉no꞉ a꞉no꞉ mo꞉fa꞉la꞉dowo꞉. Mo꞉luwo꞉ Isolael kaluka꞉isale iyo꞉ Sainai misio꞉ aniba fa꞉la꞉dowakiyo꞉, kelego꞉ fa꞉la꞉dowab a꞉no꞉ ini siya꞉yo꞉ ba꞉ba꞉. De alan wa꞉sowala꞉lab a꞉no꞉lia꞉, sololi a꞉no꞉lo꞉, tagima꞉no꞉ kelego꞉ a꞉no꞉lo꞉, fufa alano꞉lo꞉ ba꞉ba꞉. 19  Kis 20.18-21, Lo 5.22-27A꞉la꞉ta꞉ga꞉ iyo꞉ olo bulu amilo꞉ folo꞉ a꞉no꞉ da꞉da꞉sa꞉ga꞉yo꞉, Godeya꞉ towo꞉lo꞉ a꞉na dabu. To a꞉no꞉ dabu amio꞉, iyo꞉ tagi alan dowaki, Mo꞉sa꞉sbo꞉wo꞉ a꞉la꞉sio꞉, “Gode eyo꞉ nimo꞉wo꞉ wa꞉kabiyo꞉ towo꞉ sa꞉labena꞉ki, ge towo꞉ sama” a꞉la꞉sio꞉. 20  Kis 19.12-13Iliyo꞉ to a꞉no꞉ ko꞉lo꞉ sio꞉wo꞉ mo꞉wo꞉ we. Tamin amio꞉ Gode eyo꞉ imo꞉wo꞉ a꞉la꞉sio꞉, “Kaluwa꞉le, no꞉wa꞉le misio꞉ a꞉no꞉ golalega, giliyo꞉ e uwa꞉ agodaki sanala꞉bi.” A꞉la꞉sio꞉ ko꞉lo꞉ to a꞉no꞉ kudu ha꞉na꞉no꞉wo꞉ mada halaido꞉lo꞉biki iyo꞉ tagi dowo꞉. 21  Lo 9.19Sainai misio꞉ amilo꞉ fa꞉la꞉dosotab a꞉ma꞉yo꞉ kaluka꞉isaleyo꞉ tambo tagi alitabiki, Mo꞉sa꞉s eyo꞉lo꞉ a꞉la꞉sio꞉, “Ne tagio꞉ alan dowaki, kiyo꞉ bibisodab.”

22 Gio꞉ Sainai misio꞉ a꞉namio꞉ mo꞉ane ko꞉sega, gio꞉ Saion misio꞉, Hebenelo꞉ a꞉lab a꞉na mio꞉. Ya꞉lusalem amisa꞉n, Mela꞉no꞉lo꞉ A꞉lab Godeya꞉ enedo꞉leyo꞉ o꞉m. Amisa꞉n a꞉namio꞉, ma꞉mula꞉ kaluwo꞉ daosen daosen a꞉la꞉lowo꞉wo꞉ modo꞉ ko꞉lo꞉ sagala꞉liki kegenefo꞉lena, gio꞉ a꞉na fa꞉la꞉dowo꞉. 23 Tilidabu kaluka꞉isaleyo꞉ Godeya꞉ ene wa꞉la꞉b so꞉wa ko꞉lo꞉, ili wiyo꞉ Hebeneyo꞉ o꞉ma sa꞉sa꞉li alifa꞉. Ilido꞉ kegeab a꞉namio꞉ gio꞉lo꞉ mio꞉. Henfelo꞉ kaluka꞉isale tambolo꞉ mo꞉walilima꞉no꞉ Gode, elo꞉wa mio꞉. Godeya꞉lo꞉ digalo꞉ kaluka꞉isale nafalelo꞉ ta꞉fo꞉ a꞉ma꞉ Mamalo꞉wa, gio꞉ a꞉na fa꞉la꞉dowo꞉. 24  Mo꞉mo꞉ 4.10, Hibu 8.6A꞉la꞉ta꞉ga꞉ Gode amilo꞉ ege doma꞉no꞉ tog ho꞉gi a꞉ma꞉ us kaluwo꞉ Ya꞉su ko꞉lo꞉, gio꞉ elo꞉wa mio꞉. Godeya꞉lo꞉ to dinali sio꞉wo꞉ halale alifoma꞉kiyo꞉ Ya꞉suwa꞉ ene ho꞉bo꞉ a꞉ma꞉ fuga a꞉la꞉alifa꞉ ko꞉lo꞉, gio꞉ elo꞉wa mio꞉. Ho꞉bo꞉ a꞉no꞉ Ya꞉suwa꞉ eneno꞉ o꞉m ko꞉lo꞉, Ya꞉suwa꞉ ho꞉bo꞉wa꞉lo꞉ to sa꞉lab a꞉ma꞉yo꞉, A꞉ibola꞉ ho꞉bo꞉wa꞉lo꞉ to sio꞉ a꞉no꞉ e tinio꞉ ko꞉lo꞉lab.* A꞉ibola꞉ ho꞉bo꞉ a꞉no꞉ Godelo꞉wa fa꞉la꞉dowakiyo꞉, “Wa꞉dema” a꞉la꞉sio꞉. Ko꞉sega Ya꞉suwa꞉ ho꞉bo꞉ a꞉ma꞉yo꞉ “Wa꞉deso꞉bo” a꞉la꞉sa꞉lakiyo꞉, nili mogago꞉wo꞉ hala꞉sa꞉ga꞉, ga꞉li mesea꞉ki ta꞉fo꞉.

25  Hibu 2.1-3, 10.26-29Gio꞉ dinafa dowa꞉bi. Godeya꞉lo꞉ to sa꞉labo꞉ gola ba꞉da꞉so꞉bo. Mo꞉sa꞉s e henfelo꞉ wena silikiyo꞉, eya a꞉la꞉ta꞉ga꞉yo꞉, hagugo꞉ to sio꞉wo꞉ fa꞉la꞉dowo꞉ ko꞉sega, kaluka꞉isaleya꞉yo꞉ to a꞉no꞉ gola ba꞉ba꞉ ko꞉lo꞉, iyo꞉ Godeya꞉ gadio꞉ a꞉ma꞉yo꞉ sili alita꞉ga꞉yo꞉, mo꞉begele alifo꞉gane. A꞉la꞉go꞉ko꞉lo꞉ niliyo꞉ Hebene a꞉la꞉ta꞉ga꞉lo꞉ to sa꞉lab a꞉no꞉ gola ba꞉dalega, nio꞉lo꞉ mada mo꞉sili alita꞉ga꞉ ha꞉na꞉ib. 26  Hag 2.6Gode eyo꞉ towo꞉ Sainai misio꞉wa sio꞉ a꞉namio꞉, ene to a꞉ma꞉yo꞉ henfelo꞉wo꞉ ida꞉lo꞉. Ko꞉sega o꞉go꞉ eyo꞉ a꞉la꞉dinali safo꞉lab, “Niyo꞉ ho꞉len no amio꞉ henfelo꞉ we nowo꞉ wa꞉ka ida꞉li alifa꞉no꞉ ko꞉sega, henfelo꞉ imilig yo꞉mba. Henfelo꞉ o꞉lia꞉ akin o꞉lia꞉ tambo ida꞉li alifa꞉no꞉.” 27 Nowo꞉ wa꞉ka ida꞉li alifa꞉no꞉ a꞉la꞉do꞉ sa꞉lab a꞉ma꞉ ha꞉go꞉ we. Kelego꞉ ko꞉li ko꞉lilo꞉ Godeya꞉ enedo꞉ dimido꞉ da꞉lab we ida꞉lalikiyo꞉, tambo dila꞉ma꞉ib. Ko꞉sega kelego꞉ mo꞉ida꞉lema꞉no꞉ dowo꞉ a꞉no꞉ko꞉ dofo꞉mela꞉ib.

28 Godeya꞉lo꞉ bo꞉fo꞉mela꞉no꞉ hen nililo꞉ dio꞉l we halaido꞉ ko꞉lo꞉ mo꞉ida꞉lema꞉ib. A꞉la꞉fo꞉ko꞉lo꞉ niliyo꞉ sagalaki, mada o꞉m a꞉la꞉sa꞉ma꞉niki. A꞉la꞉ta꞉ga꞉ niliyo꞉ e tagila꞉sa꞉ga꞉ ha꞉ga dowakiyo꞉, elo꞉ asulab au dimidaki, Godeyo꞉ wabulu sa꞉ma꞉niki. 29  Lo 4.24, 9.3Mo꞉wo꞉ Gode nilido꞉ a꞉no꞉ de wa꞉sowa halaido꞉ ko꞉lo꞉, kelego꞉ mogago꞉wo꞉ tambo ma꞉ib.