1 Galasia kaluka꞉isale gio꞉ asugdo꞉ma dowab! Niliyo꞉ Ya꞉su Kelisowo꞉ gimo꞉wo꞉ kalaba wido꞉ ko꞉lo꞉, e i malan amilo꞉ alu a꞉no꞉ go꞉no꞉n siya꞉lo꞉ ba꞉ba꞉yo꞉ o꞉ngo꞉ dowo꞉. Ko꞉sega nolba꞉yo꞉ dikili wido꞉ ko꞉lo꞉, gio꞉ no꞉nolo alifa꞉ ko꞉lo꞉lab. 2 Gimo꞉lo꞉ dabu ba꞉ba꞉nigo꞉l we asuluma. Gio꞉ ele kudu ane ami Godeya꞉ Mamayo꞉ a꞉na diya꞉le? O꞉ gio꞉ to nafa a꞉no꞉ tilida꞉dab ami Godeya꞉ Mamayo꞉ a꞉na diya꞉le? 3 Gio꞉ asugdo꞉ma dowab. Gio꞉ mo꞉mo꞉dakiyo꞉, Mamaya꞉ halaido꞉wa a꞉la꞉ta꞉ga꞉ tilidabu ko꞉lo꞉, o꞉go꞉ go꞉no꞉n halaido꞉ a꞉ma꞉yo꞉ o꞉li halale kagayalikiyo꞉ egema꞉iba? 4 To nafa ko꞉lo꞉ gililo꞉ kudu ane amilo꞉ hida꞉yo꞉ dia꞉li ane a꞉no꞉ madali wala꞉ya꞉le? Niyo꞉ a꞉no꞉ madalilo꞉ mo꞉wala꞉ma꞉ki asulo꞉l. 5 Gode eyo꞉ ene Mamayo꞉ gimo꞉wo꞉ dimiabikiyo꞉, Mama a꞉ma꞉yo꞉ gi usamio꞉ molo ha꞉na꞉no꞉wo꞉ dimido꞉. Elo꞉ dimido꞉ a꞉no꞉, giyo꞉ Yuwa꞉ ele a꞉no꞉ ko꞉lo꞉ kudu ha꞉nabiki go꞉wa꞉le? O꞉ngo꞉ma. Ginido꞉ Ya꞉su Keliso amilo꞉ tilidabu a꞉na go꞉ ko꞉lo꞉lab.

6  Mo꞉mo꞉ 15.6Gio꞉ Ablahamo꞉ asuluma. Godeya꞉ to sa꞉sa꞉lo꞉ a꞉namio꞉ a꞉la꞉sio꞉, “Ablaham e Gode amio꞉ tilidabu ko꞉lo꞉, Gode eyo꞉ e digalo꞉ kalu a꞉la꞉bo꞉ a꞉na sio꞉.” 7 A꞉la꞉fo꞉ko꞉lo꞉ gio꞉ to we dinafa asuluma. Kaluka꞉isale abeyo꞉ Gode amilo꞉ tilida꞉dab a꞉no꞉, Ablahama꞉ ene inso꞉le dowab. 8  Mo꞉mo꞉ 12.3, Lom 4.3,16Gode eyo꞉ tif amio꞉ Yu kaluka꞉isalema ini tilidabu amio꞉ iyo꞉ digalo꞉ kalu a꞉la꞉sa꞉ma꞉no꞉ a꞉lakiyo꞉, Gode eyo꞉ tamina asula꞉sa꞉ga꞉yo꞉, Ablahambo꞉wo꞉ a꞉la꞉dinali sio꞉, “Henfelo꞉ amilo꞉ so꞉lo꞉ sab a꞉no꞉ tambo geya a꞉la꞉ta꞉ga꞉yo꞉, halaido꞉ nafale mesea꞉ki ta꞉fa꞉no꞉.” 9 A꞉la꞉fo꞉ko꞉lo꞉ Ablaham e tilida꞉dabikilo꞉ Gode eyo꞉ e nafale mesea꞉ki ta꞉fo꞉ o꞉leaumbo꞉, kaluka꞉isale abeyo꞉ Gode amilo꞉ tilida꞉dab a꞉no꞉ Gode eyo꞉ i a꞉no꞉lo꞉ nafale mesea꞉ki ta꞉fa꞉ib.

10  Lo 27.26Kaluka꞉isale abeyo꞉, Godeya꞉ si wa꞉l amio꞉ Mo꞉sa꞉sa꞉ ele saefa꞉lo꞉ kudu ha꞉nab a꞉namio꞉, iyo꞉ digalo꞉ doma꞉ib a꞉la꞉asulalega, Godeya꞉ gadio꞉ a꞉no꞉ imo꞉ dimia꞉no꞉ a꞉la꞉liki dinali saefa꞉ ko꞉lo꞉lab. Godeya꞉ bugo꞉ amio꞉ a꞉la꞉sa꞉sa꞉li alifa꞉ ko꞉lo꞉ da꞉lab, “Kaluka꞉isale abeyo꞉ ele ko꞉lo꞉ bugo꞉ amilo꞉ sa꞉sa꞉lo꞉ a꞉no꞉ tambowo꞉ mo꞉kudu ha꞉na꞉lalega, Godeya꞉ gadio꞉ a꞉no꞉ imo꞉ dimia꞉no꞉ a꞉la꞉liki dinali saefa꞉ ko꞉lo꞉lab.” 11  Hab 2.4, Gala 2.16Kalu nowo꞉ ele kudu ane a꞉na ilikiyo꞉, Gode eyo꞉ ge digalo꞉leka꞉ a꞉la꞉bo꞉ mada mo꞉sa꞉ma꞉ib. Mo꞉wo꞉ Godeya꞉ bugo꞉ amio꞉ a꞉la꞉sa꞉sa꞉lo꞉, “Kaluka꞉isale Godeya꞉lo꞉ digalo꞉ a꞉la꞉do꞉ sa꞉lab a꞉no꞉, ene tilidabu a꞉ma꞉yo꞉ ene mela꞉no꞉wo꞉ dinafa tili dofo꞉mela꞉ib.” 12  Wkp 18.5Elelo꞉ kudu ha꞉nan man a꞉no꞉ tilidabu man a꞉no꞉lia꞉yo꞉ mo꞉imilo꞉. A꞉la꞉ba, Godeya꞉ bugo꞉ amio꞉ a꞉la꞉sa꞉sa꞉lo꞉ da꞉lab, “Kaluka꞉isale abeyo꞉ Godeya꞉ ele saefa꞉lo꞉ tambolo꞉ kudu ha꞉na꞉lab a꞉no꞉ e mela꞉no꞉wo꞉ dia꞉ib.” 13  Lo 21.23, Lom 8.3Kaluka꞉isale nio꞉ Godeya꞉ eleyo꞉ tambo mo꞉kudu ane ko꞉lo꞉, Godeya꞉ gadio꞉ a꞉no꞉ nio꞉ dia꞉no꞉ elen ko꞉sega, gadio꞉ a꞉no꞉ Ya꞉su Keliso e diaki, nio꞉ sili alifa꞉. Godeya꞉ bugo꞉ amio꞉ a꞉la꞉sa꞉sa꞉lo꞉, “I malan amilo꞉ alulab kalu a꞉no꞉ Godeya꞉ gadio꞉ ha꞉g a꞉na dowab.” 14 Kelisowa꞉lo꞉ dimido꞉ a꞉ma꞉yo꞉, Godeya꞉lo꞉ Ablahambo꞉lo꞉ dinafa mesea꞉kilo꞉ dinali sio꞉ o꞉leaumbo꞉, Yu kaluka꞉isalema ilo꞉ amio꞉lo꞉ fa꞉la꞉doma꞉kiyo꞉, Ya꞉su e dimido꞉. A꞉la꞉ta꞉ga꞉ nio꞉ tilida꞉dabikiyo꞉, Mama Malilo꞉ a꞉no꞉ Godeya꞉lo꞉ dimia꞉no꞉ a꞉la꞉do꞉ dinali sio꞉ a꞉no꞉ dima꞉kiyo꞉, e dimido꞉.

15 Nao nado i, nili man dimidan a꞉na da꞉fe sa꞉ma꞉nigo꞉l. Kalu a꞉la꞉ nowo꞉ asulo꞉ imilig dowaki, towo꞉ dinali saetalega, dinali saefa꞉ a꞉no꞉ imilig noma꞉yo꞉ mo꞉wa꞉la꞉ sa꞉ma꞉ib, a꞉la꞉ta꞉ga꞉ to nowo꞉ mo꞉ba꞉ma꞉ib. Godeya꞉lo꞉ dinali saefa꞉ a꞉no꞉lo꞉ o꞉leo꞉ngo꞉ ko꞉lo꞉lab. 16  Mo꞉mo꞉ 12.7Godeya꞉lo꞉ dinali saefa꞉ a꞉no꞉ Ablaham o꞉lia꞉ e ma꞉mu imilig o꞉lia꞉mo꞉ sio꞉. Godeya꞉ bugo꞉ a꞉namilo꞉ to sa꞉sa꞉lo꞉ a꞉no꞉ “e ma꞉mu i” a꞉la꞉bo꞉ mo꞉sa꞉sa꞉lo꞉. “E ma꞉mu imilig” a꞉no꞉ ko꞉lo꞉ sa꞉sa꞉lo꞉. E ma꞉mu imilig a꞉la꞉do꞉ sa꞉sa꞉lo꞉ a꞉no꞉ Keliso a꞉no꞉ ko꞉lo꞉ sio꞉. 17  Kis 12.40To nilo꞉ so꞉lo꞉l wema꞉ ha꞉go꞉ we. Tamin amio꞉ Gode eyo꞉ Ablaham e o꞉lia꞉yo꞉ towo꞉ dinali saefa꞉. A꞉la꞉ta꞉ga꞉ donayo꞉ 430 a꞉la꞉fo꞉wo꞉ ta꞉ta꞉ga꞉yo꞉, Gode eyo꞉ Mo꞉sa꞉sbo꞉wo꞉ eleyo꞉ dimi. A꞉la꞉fo꞉ko꞉lo꞉ ele a꞉ma꞉yo꞉ Ablaham emo꞉lo꞉ to saefa꞉ a꞉no꞉ mo꞉dilaki, dinali saefa꞉ a꞉no꞉ mada mo꞉ko꞉lo꞉. 18  Lom 4.14Nio꞉ ele kudu ha꞉nab a꞉nami Godeya꞉lo꞉ boba kelego꞉wo꞉ a꞉na dia꞉no꞉ kibo꞉bowo꞉, nio꞉ Godeya꞉lo꞉ dinali sio꞉ a꞉namio꞉ mo꞉dimabe. Ko꞉sega Gode eyo꞉ Ablaham e o꞉lia꞉yo꞉ ha꞉fo꞉wo꞉ disa꞉laki dinali saefa꞉ ko꞉lo꞉, boba kelego꞉wo꞉ e a꞉na di.

19  Ilig 7.38, Lom 5.20A꞉la꞉fo꞉ko꞉lo꞉ Mo꞉sa꞉s emo꞉lo꞉ ele dimi a꞉no꞉ mo꞉wo꞉ ha꞉? Kaluka꞉isaleyo꞉ mogago꞉ dimidakilo꞉ hala ha꞉na꞉len a꞉no꞉ kalaba walama꞉ki, ele a꞉no꞉ dinali sio꞉ o꞉lia꞉ gasalifa꞉. Ele a꞉no꞉ dowa꞉i ya꞉la꞉ga꞉, Ablahama꞉ e ma꞉mu imilig, Godeya꞉lo꞉ tamin amilo꞉ dinali sio꞉ a꞉no꞉ ko꞉lo꞉ fa꞉la꞉dowabiki edo꞉. Ele a꞉no꞉ Gode eyo꞉ ma꞉mula꞉ kalumo꞉ a꞉la꞉ta꞉ga꞉yo꞉ us kalu Mo꞉sa꞉s emo꞉ dimi, ko꞉lo꞉ Mo꞉sa꞉s e Godeyo꞉ nol, kaluka꞉isaleyo꞉ nol, a꞉lo꞉ usa elen. 20 Usamilo꞉ dowab kalu a꞉ma꞉yo꞉, kalu a꞉la꞉ usa dowakilo꞉ asuwa꞉tano꞉ o꞉m. Ko꞉sega Godeyo꞉ imilise e ko꞉lo꞉, eyo꞉ Ablahambo꞉ dinali sa꞉lakiyo꞉, ene ka sio꞉.

21  Lom 8.2-4A꞉la꞉go꞉ko꞉lo꞉ ele difa꞉ a꞉ma꞉yo꞉ dinali sio꞉ o꞉lia꞉yo꞉ giso꞉ dowaba꞉le? A a꞉la꞉bo꞉ mo꞉gab. Ele difa꞉ a꞉ma꞉yo꞉ ko꞉ngo꞉ mela꞉no꞉le dimian kibabeyo꞉, kaluwo꞉ ele kudu ha꞉nab a꞉namio꞉, Gode eyo꞉ e digalo꞉ kalu dowab a꞉la꞉bo꞉ o꞉li sa꞉mabe. 22 Ko꞉sega Godeya꞉ to sa꞉sa꞉lo꞉ a꞉ma꞉yo꞉ nimo꞉wo꞉ a꞉la꞉sio꞉, “Henfelo꞉ kaluka꞉isale tambowo꞉ man mogago꞉ a꞉ma꞉ ha꞉ga iliki, dibolowa disa꞉fo꞉len.” A꞉la꞉fo꞉ko꞉lo꞉ kaluka꞉isale abeyo꞉ Ya꞉su Keliso amilo꞉ tilida꞉dab a꞉ma꞉yo꞉, Godeya꞉lo꞉ tamin amilo꞉ dinali sio꞉ a꞉no꞉ tilidabu enedo꞉ a꞉na ilikiyo꞉, o꞉li dia꞉ib. 23  Gala 4.3Keliso e amilo꞉ tilida꞉ba꞉no꞉ man a꞉no꞉ kalab amio꞉ o꞉fa꞉la꞉doma꞉no꞉ a꞉lab a꞉namio꞉, ele a꞉ma꞉yo꞉ nio꞉ mela꞉sa꞉ga꞉ dibolowa to꞉lo alifo꞉len. 24  Lom 10.4A꞉la꞉fo꞉ko꞉lo꞉ Keliso e o꞉mia꞉no꞉ a꞉labikiyo꞉, ele a꞉ma꞉yo꞉ nio꞉ bo꞉fo꞉len. Nio꞉ tilida꞉da꞉sa꞉ga꞉ digalo꞉ kalu doma꞉kiyo꞉, ele a꞉ma꞉yo꞉ nio꞉ tililia꞉ga꞉ Ya꞉sulo꞉wa ta꞉fo꞉. 25 O꞉go꞉ tilidabu man a꞉no꞉ mio꞉ ko꞉lo꞉, nio꞉ eleya꞉ ha꞉g amio꞉ mo꞉doma꞉no꞉. Ele a꞉ma꞉yo꞉ nio꞉ mo꞉bo꞉fo꞉mela꞉ib.

26  Yo꞉n 1.12Gio꞉ tambo Ya꞉su Kelisowa tilidabu ko꞉lo꞉, Godeya꞉ ene so꞉wale dowab. 27  Lom 6.3Gio꞉ ho꞉n ami to꞉lolabikilo꞉ Ya꞉su Kelisowa dowab a꞉ma꞉yo꞉, Kelisowa꞉ helebeso꞉g ho꞉gi o꞉ngo꞉ma꞉ momade alifa꞉ ko꞉lo꞉lab. 28  Lom 10.12A꞉la꞉fo꞉ko꞉lo꞉ Ya꞉su Keliso amilo꞉ dowo꞉ gi a꞉no꞉, tambowo꞉ imilise ko꞉lo꞉ a꞉lab. Yu kalu o꞉lia꞉ Gilig kalu o꞉lia꞉yo꞉ imilig dowo꞉ ko꞉lo꞉lab. Da꞉ibo꞉ kaluwo꞉lo꞉, ga꞉lilo꞉ sab kaluwo꞉lo꞉ imilig dowo꞉ ko꞉lo꞉lab. Kaluwo꞉lo꞉, gayo꞉lo꞉ imilig dowo꞉ ko꞉lo꞉lab. 29  Lom 4.13Kelisowa꞉ eno꞉le dowab gio꞉, Ablahama꞉ ene so꞉wale dowo꞉ ko꞉lo꞉, Godeya꞉lo꞉ dinali sio꞉ a꞉no꞉ gio꞉lo꞉ dia꞉ib.