112
Wali agali bayale bu karume turu holene ngago ogo
1 Anduane Homogonaga mini yaraga holene nga.
Mbirali ibu Anduane Homogo mitangi bialu mo dunini haga kago
ibu turuore ho haga ka.
Anduane Homogonaga bi mana talialu bulene hamelo haga kago
ibu turuore ho ka.
2 Agali bayale biaga kagonaga waneiginiru
ti wali agali maru bu karuha howa mini lene haga bulebira.
Agali ogoninaga aguane holebiraru
Ngode Datagaliwabehanda ti biamogo bialu bayale biaabo holebira.
3 Ibu damene ti muni mbiraleru dewawi howa
ibu homogo bayale haabo holebira.
4 Arumaho ngagoha wali agali bayaleru✡ Yob 11.17, Iba 97.11
biamogo bulenaga wá holene tagira ibaga.
Wali agali mendeali dara howa biamogo biagabi
maruhondo bayale biagabi tigatiga hangu biagabi
ti kagoha wá haabo holebira.
5 Mbirali ibu mbirale dewawi kagome ibunaga mbirale ngaru
maru karume dano helo turu howa miagabi
ibunaga biyinaya birago tigabi hangu biagabi howa
ibu turubiore haga ka.
6 Wali agali bayale biaga kago ibu pinale mini bilinahe kagola
wali agali marume ibu embeda nahe mitangi bu haabo holebira.
7 Genda timbuni mbira yu anda ibira larago hale howa✡ Iba 57.7, 64.10
ogoni ibugua gi nahe haga ka.
Ibugua Anduane Homogohondo mini mbiraore hongo ho wu haga ka.
8 Ibugua mbirale biraru hondowa mogolalu gi nahaga ka.
Waitigi ibirarume wai bialu wayali nahe
bame degedane ibu de hondolebira.
9 Ibugua yagibano karuhondo mbirale dewa talebu miaga ka.✡ 2 Ko 9.9
Ibugua wali agali maru dara howa biamogo biagago wiaaboore holebira.
Ibu dindini mini lene mbira kagola
wali agalime ibunaga mini yaraga halu holebira.
10 Wali agali ko biaga karume bayale biaga o biago hondowa
ti keba ho holebira.
Tigua wali agali bayale o biagobi handabe manga haragome
mani tinibi mo ko holebira.
Ko biaga karu ti mbirale bayale mo yule hamelo hayaruni
nayi dege howa pu ereba holebira.