1 Lohiabada ena hesiai tauna Mose ia mase murinai, Lohiabada ese Iosua Nunu, Mose ia durua tauna, ia hereva henia, ia gwau, 2 “Lauegu hesiai tauna Mose be ia mase vadaeni. Unai dainai oi toreisi, inai Ioridane Sinavai do oi hanaia, oi bona Israela taudia, idia dekenai lau ura do lau henia tanona do umui raka vareai. 3 Mose dekenai lau gwauhamata henia hegeregerena, oi bona lauegu bese taudia idia raka hanaia tanona ibounai be umui dekenai do lau henia. 4 Umui emui tano ena bada be inai bamona: Diho kahana ena taunimanima noho lasi tano ela bona Lebanona Ororo, mirigini kahana dekenai. Bona sinavai badana ladana Euperate, dina daekau kahana dekenai, Hiti taudia edia tano ibounai, ela bona Davara Badana, dina ia diho kahana dekenai.

5 “Iosua e, oiemu mauri dinadia ibounai lalonai tau ta ese oi do ia halusia diba lasi. Lau be oi dekenai do lau noho, Mose dekenai lau noho hegeregerena. Nega ibounai oi do lau bamoa, bona oi do lau rakatania lasi.

6 “Do oi goada, do oi gari lasi. Badina be oi ese inai bese do oi gunalaia, edia sene taudia dekenai lau gwauhamata henidia tanona do idia abia neganai. 7 To do oi goada bona boga auka. Lauegu hesiai tauna Mose umui dekenai ia henia taravatu ibounai do oi badinaia, bona ena kara do oi karaia. Unai taravatu ena kahana ta dekena amo do oi raka siri lasi. Unai neganai do oi lao gabudia ibounai dekenai oiemu kara ena anina do ia vara momokani. 8 Inai Taravatu Buka be nega ibounai emui guriguri heboudia lalonai do umui duahia. Dina bona hanuaboi do oi tahua, bona iena torea herevadia ibounai do oi kamonai henia. Unai neganai oiemu raka do ia namo, bona oiemu kara ena anina do ia vara momokani. 9 Oi lau hamaoroa vadaeni, ani, do oi goada bona do oi boga auka. Do oi gari lasi, bona oiemu lalona do ia manoka lasi, badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa noho.”

10 Vadaeni Iosua ese bese ena lohia taudia dekenai ia oda, ia gwau, 11 “Kamepa dekenai do umui raka hanaia, taunimanima inai bamona do umui hamaoroa, umui gwau, ‘Umui ese emui aniani do umui abia hegaegae, badina be dina toi do idia ore lasi lalonai, inai Ioridane Sinavai be do umui hanaia, Lohiabada, emui Dirava, ese umui ia henia tanona dekenai do umui raka vareai, bona do umui noholaia.”

12 Vadaeni Iosua ese Rubena iduhu taudia bona Gado iduhu taudia bona Manase iduhu kahana taudia dekenai ia hamaoroa, ia gwau, 13 “Lohiabada ena hesiai tauna Mose ese umui ia oda henia herevana do umui laloa, ia gwau, ‘Lohiabada emui Dirava, ese unai tano, Ioridane Sinavai ena dina daekau kahana be umui dekenai do ia henia, emui noho gabuna korikori.’ 14 Momokani inai tano be umui abia vadaeni, emui, to emui hahine bona emui natudia bona emui boromakau be iniseni, Ioridane Sinavai inai kahanai do idia noho. Bona umui tuari diba taudia ibounai ese emui tuari gaudia do umui abia, unai sinavai do umui raka hanaia, bona emui varavara taudia edia vairanai do umui lao, do umui durudia totona. 15 Inai bamona do umui karaia ela bona Israela taudia ese Ioridane Sinavai ena dina ia diho kahana tanona, Lohiabada ese ia henidia vadaeni tanona do idia abia. Israela iduhu ibounai be idia noho namo, tuari ta lasi neganai, umui be iniseni do umui giroa mai diba. Bona unai neganai emui tano, Mose ese Ioridane Sinavai ena dina daekau kahana, umui ia henia vadaeni tanona, do umui noholaia diba.”

16 Vadaeni idia ese Iosua dekenai idia haere, idia gwau, “Ai dekenai oi oda henia hereva ibounai do ai karaia, bona ai do oi siaia gabudia dekenai do ai lao. 17 Guna ai ese nega ibounai Mose ai kamonai henia hegeregerena, ai ese oi do ai kamonai henia. Bona ai diba Lohiabada, oiemu Dirava be oi dekenai ia noho, guna, Mose dekenai ia noho hegeregerena. 18 Daika ese oi dekenai ia hepapahuahu, bona oiemu oda do ia negea, unai tauna be do ai alaia mase. Do oi goada, bona do oi boga auka nega ibounai!”