21
Lamtua Yesus tama lako kota Yerusalem, banansila el Lahi ka
(Markus 11:1-11; Lukas 19:28-40; Yuhanis 12:12-19)
1 Hidi nam Yesus nol Un ima-ii las napiut, lakos lius se ingu mes ngala Betfage, ne leten Saitun peke ka.* Oen ngali leten na ‘Saitun’, undeng se ua lam, muik klaap saitun mamo. Taom oen lee saitun isin le kat un mina ka. Leten Saitun na katang nga nataka le, kilu mes deng kota Yerusalem. Iung na dadani nol kota Yerusalem son. Ti oen tenes tahang se las. Kon Un tadu Un ima-ii las at dua, le lakos muna. 2 Un tadu oen duas noan, “Mi duam lakom se iung nua. Eta mi taam lakom se ingu la lam, mi net keledai ina mes nol ana ka butun se na. Mi laok loat oen talin nas, le pel nolas maa bel Au. 3 Mo eta atuli keket mi noan, ‘Tasao le mi pel lai-niin atuli keledai kia?’ Lam mi siut noan, ‘Tuang le pake. Hidi le lam Un tunang pait maa.’
4 Totoang nias musti dadi, muid asa man Ama Lamtua Allah mee-baha la in dul meman son noan,
5 ‘Hoe mi atuil Yerusalem me!† Alkitab dais Yunanin dul mo bango ni noan, “Sion ana bihata la”. Sion nam Yerusalem ngaal didang nga. Ta buk Sakarias sa aa nini dais duda, le haman tek kota Yerusalem atulin nas.
Ngat laok bus elu le!
Ta mi Lahin na maa nuan!
Un maa nol in tao dalen deng dadale.
Un saek keledai ana le maa.’ ”✡ Sakarias 9:9
6 Kon nam ima-ii las duas lakos, le daek muid asa man Yesus in tadu oen le dake ka. 7 Oen pel nol keledai ina ka nol ana ka laok bel Yesus. Hidim oen lekat hlimut se dapa, halin Un saek keledai la, le oen taam lakos bus el kota la. 8 Oras oen le taam lakos bus el kota la ka, atuli hut mamo kat oen hlimut tas, nol oen seman hlendang ngas, le lekat laok se lalan na. Muik atuli teng pait lakos dait kai klehen,‡ Matius in dula esa ka, dul noan, ‘kai bango ngas’. Mo kit tanan son deng Yuhanis peke 12 bango 13 ka noan, palam klehen. le hehan laok se lalan na. Nini ela lam, oen tulu bel noan, oen sodo-sium Un banansila el atuil tene ka. 9 Muik atuli teng pait lakos muna Yesus se hmunan, nol tenga las pait muid deng klupu. Le oen leo-leo nakaa kleba-kleba noan,
“Hosana! Kaim naka-naka Ama Lamtua Allah!§ Oen dais Aram mam noan, ‘Hosana’. Un nahin hmunan hesa ka noan, ‘un bel boa-blingin atuli’. Oras Lamtua Yesus nuli nabael se apan-kloma kia ka, dais na taom oen pake le naka-halit Ama Lamtua Allah.
Undeng Daud in hua-koet ta maa lius son!
Hosana! Kaim naka-naka Ama Lamtua Allah!
Undeng Ama Lamtua nutus Atuling ni le maa son.
Hosana! Kaim naka-naka Ama Lamtua Allah!
Man daad le kil bandu meman son, ne apan man lapa dudui kua!”✡ Buk in Naka-nahalit 118:26
10 Dedeng Yesus tama lako kota Yerusalem nol in lupu-nakaa ela la, kota la isin na putis totoang, le keket apa noan, “Inaa! Asii in maa nia le?”
11 Atuil hut mamo kas siut noan, “Un niam, Ama Lamtua Allah mee-baha. Un ngala Yesus, atuil Nasaret deng propinsi Galilea.”
Lamtua Yesus taam lako se Um in Kohe-kanas Tene ka, le sukun didaan maan in sosa-hee se na ka
(Markus 11:15-19; Lukas 19:45-48; Yuhanis 2:13-22)
12 Kon Yesus nol Un ima-ii las taam lakos napiut se Ama Lamtua Allah Um in Kohe-kanas Tene ka. Se Um in Kohe-kanas sa kintal la, atuli las taon daid maan in sosa-hee son, le hee tiul-tuan. Taom atuli las pake tiul-tuan taung in tunu-dadung le kohe-kanas. Net ela kon, Yesus laok nulut puting one. Un late soleng mija-mija man oen pakes le silin duit tas, nol late bali bangku-bangku man oen pakes le hee tiul-tuan nas. 13 Hidim Un tek atuli las noan, “Ama Lamtua mee-baha la dul son noan,
‘Auk bangun-pii Um nia,
le halin totoang atuli li maa kohe-kanas se nia.’
Ama Lamtua in koma ka ela, mo Um ni mi taon daid atuil in nakong ngas maan in nakbua son!”✡ Yesaya 56:7; Yermia 7:11
14 Yesus bii nabael se Ama Lamtua Allah Um in Kohe-kanas sa lam, atuil tedo kas nol atuil hlukut-hkait tas maas se Una. Kon Un tao banan oen totoang. 15 Se na kon, muik tulu agama Yahudi las tene-tenen nas, nol guru-guru agama las. Nikit oen net Yesus in tao taad herang ela ka kon, oen koon-mali. Dudui pait ta, nikit oen ming tana-anang in se Um in Kohe-kanas sas, nakaa mumuun noan,
“Hosana! Kaim naka-naka Ama Lamtua Allah!
Undeng laih Daud in hua-koet ta maa son!”
16 Kon oen tek Yesus noan, “Hoeh! Ku ming tana-anang nas in nakaa ka tam? Na tom lo tetetas!”
Mo Yesus siut oen noan, “Hao, Auk ming. Mo tasao ka? Mi les net se Buk Niu ka deng tana-ana ngas in naka Ama Lamtua Allah ka lo bii ke? Ta muik dulan ne na noan,
‘Ama Lamtua Allah tui tana-ana mea, nol tana-ana blutu kas meman son,
le oen naka-naka Una.’ ”✡ Buk in Naka-nahalit 8:3
17 Hidi deng nam, Yesus nol Un ima-ii las putis deng kota na, le lakos ninis se iung Betanias.
Lamtua Yesus kaing kai ina mes le isin pait lo
(Markus 11:12-14, 20-24)
18 Ola ka oskaong bii, kon Yesus nol ima-ii las pait le taam lakos kota Yerusalem. Mo se lalan hlala kam, Un lubu. 19 Un ngat net kai ina mes se lalan suut ta, man taom atuli las kaa un isin na.* Dais Blain pake ‘pohon ara’ deng dais Yunanin συκῆ (sukei). Lam ‘pohon ara’ la se dais Helong ngam, ‘aebloa’. Mo ne Ama Lamtua Allah Buk Niu ka, tulu bel kai ina mes ne ua, man taom atuli mulan, nol kaa isin na. Se Indonesia halin leol-saken niam, atuli kaa kai aebloa isin lo. Tiata ‘aebloa’ in ne Ama Lamtua Allah Buk Niu ka ka, banansila el ‘aebloa’ in ne kita li ngias lo. Tiata Un lako dadani kai ina na, halin tinang nanan le muik isin tam lo ka. Mo Un lako lius se kai ina na lam, Un net isin mes lo kon, undeng kai ina na halas-sam klehen. Kon Un tek kai ina na noan, “Undeng ku puting isin bel Auk lo, tiata ku isin pait lo ka!” Un aa hidi ela kon, kai ina na tuu meman.
20 Un ima-ii las net ela kon, oen nahkitu. Oen keket noan, “Tasao le nahkiut tuun nam, kai ina ni tuu meman nia?”
21 Kon Yesus siut noan, “Hii babanan ne! Eta mi parsai baktetebes se Ama Lamtua, nol dalen hduan bubuit lo kon nam, mi tao nal banansila el Auk in tao son nia. Mi kon tao nal muun dui deng na. Tuladang el: mi bisa tadu leten mes lako se tasi kua, lam taon elola ko Ama Lamtua Allah pekot leten na lako tasi ku meman, sadi mi parsai baktetebes se Una!✡ Matius 17:20; Korintus mesa la 13:2 22 Ta totoang asa man mi in nodan se Ama Lamtua Allah ngas, mam mi simus, sadi mi parsai baktetebes se Una.”
Tuang-tuang ngas ketan apa nol Lamtua Yesus hak ka
(Markus 11:27-33; Lukas 20:1-8)
23 Hidi na kon, Yesus nol ima-ii las laok napiut. Lius se Yerusalem kon, oen taam lakos pait se Um in Kohe-kanas Tene ka kintal la. Dedeng Yesus tui atuli las deng Ama Lamtua Allah lalan in nuli ka mamasu lam, tulu agama Yahudi las tene-tenen nas, nol blalan-blalan hadat tas maas le keket-ketan nol Yesus noan, “Asii tadu Ku maa tao lobo-lau se ni lahin nia? Asii man bel ku hak ka?”
24 Mo Un taan noan, oen nuting lalan le kiu nahu Una. Tiata Un situs noan, “Auk kon le keket mia. Mi siut Auk muna le, halas-sam Auk siut mia. 25 Auk le keket elia: mi totoang taan Yuhanis In Sarain Atuli ka, ta lo? Elam, asii man belen hak le sarain atuli lia? Ama Lamtua Allah, tamlom atuli lia?”
Kon nam oen nangan lako-pait le huli-bali noan, “Idah! Kit tom hkate son nia mo! Eta kit siut noan, ‘Ama Lamtua Allah man belen hak kam’, Un siut bali kit noan, ‘Eta ela lam, tasao le mi parsai Yuhanis lo kia?’ 26 Mo kit kon bisa tek lo noan, ‘Atuli li man belen hak’, ta lo kam atuli las totoang haung keng nol kita. Undeng oen parsai noan, Yuhanis na mo, mee-baah deng Ama Lamtua Allah.” 27 Tiata oen siut Yesus noan, “Kaim tanan lo.”
Kon Yesus siut balis noan, “Eta ela lam, Auk kon tek mi lo noan asii man bel Auk hak kia.”
Lamtua Yesus bel kleta deng, ama mes nol un anan biklobe at dua
28 Yesus aa napiut nol tene-tene agama nas noan, “Mi nangan nam elol nol kleta nia la. Blalan biklobeng mes nol un anan biklobe at dua. Un lok ana hmunan na noan, ‘Ana, leol ni ku laok daek se klapa lu le.’
29 Mo tana na siut noan, ‘Eh, auk laok lo.’ Mo nesang lo kon un sabail apa ka, tiata un lako.† In mo bango nia ki, Alkitab dais Blain, Terjemahan Baru (TB1) la, dul didang son, deng in dula dais Yunanin man blaan dui, nol banan dui ngas.
30 Kon nam blalan biklobeng na tadu ana hmudin na lolen, noan, ‘Ana, leol ni ku laok daek se klapa lu le.’
Kon tana na siut noan, ‘Hao papa. Hidi lem auk lako.’ Molota un laok lo.”
31 Dehet hidi ela kon, Yesus keket oen noan, “Auk le keket elia: deng tana-anang dua nas, ol man tao muid oen aman na in prenta ka la?”
Kon oen siut noan, “Ana hmunan na!”
Ta Yesus tekas noan, “Hao. Mo hii babanan, ta Auk in teka ni toma. Mi noken atuil in sium bea ngas nol bihaat hmama kas noan, atuil daat, mo mam oen tamas lakos daid Ama Lamtua Allah atulin muna deng mia. Undeng mi suma hao Ama Lamtua tuun, mo daek muid Un in koma ka lo. 32 Hmunan nu, Yuhanis in Sarain Atuli ka tui mi son, noan, taon elol le halin mi haup in nuil lolo ka. Mo mi dai parsai un lo. Molota nikit atuil daat tas ming Yuhanis in teka ka tukun nam, oen nang soleng oen in kula-sala ngas, le daek muid un in tui ka. Mi kon taan nas totoang son. Mo mi dai tenem deng mi in kula-sala ngas, le muid se Ama Lamtua Allah in koma ka lo.”✡ Lukas 3:12; 7:29-30
Lamtua Yesus bel kleta deng atuil daat man in seb klaap anggor ras
(Markus 12:1-12; Lukas 20:9-19)
33 Hidi nam, Yesus dehet kleta mes pait noan, “Dale lamtua mes lako dait hlean balu, le taung in hai anggor. Hidim un paah pukiun. Nol un daek bak le taung in lee anggor isin na. Un kon koet mana mes lalapa, le taung in doha. Hidi kon un bel atuil didang le seb klaap na, halin nam mam oen bating apa klapa la in hapu ngas. Mo un boka lako nusa likun nuas.✡ Yesaya 5:1-2
34 Lius oras in nui-noel anggor isin kon, klaap lamtua ka tadu un ima-ii las laok nodan un nena las, se atuil in seb klapa la ngas. 35 Mo oen toe muid ima-ii nas lo. Oen diuk-papas ima-ii tenga las, teng tom in keo tele, nol tenga las pait tom in pasang nini batu. 36 Kon nam klaap lamtua ka lok un ima-ii hut mamo dui pait deng buan hmunan nas. Mo atuil in seb klapa la ngas, diku-puang oen totoang el ima-ii hmunan nas kon.
37 Nesang lo kon, klaap lamtua ka tadu un ana in hua ka esa. Lole un nangan noan, ‘Eta auk tadu auk anang ngi esa kam, taon elola ko oen sium un nol babanan, hidim hii-ming se una.’
38 Mo nikit atuil in seb klapa la ngas net tana na laok maa kon, oen tek apa noan, ‘Hoe, mi ngat le! Ta blalan na tadu un ana ka esa maa son nuan. Mam un man haup blalan na pusaka las totoang. Tiata maa le kit keo tele un tia, le halin nam kit man haup klaap nia.’ 39 Kon oen daek tana na, hidim pel puting lako klapa likun na, le keo tele.”
40 Yesus nahdeh hidi ela kon, Un keket oen noan, “Auk le keket elia: eta klaap lamtua ka pait tam, un tao elol nol atuil in seb klapa la ngas sa?”
41 Kon atuil Yahudi las tene-tenen nas siut noan, “Taon elola ko un keo tele totoang atuil daat nas. Hidim un bel atuil didang le seb klapa la lolen, man mam bating klapa la in hapu ngas tom nol oras sa.”
42 Hidim Yesus aa nolas noan, “Bet mi les net asa man dulan son ne Ama Lamtua Allah Buk Niu ka ka lo, man noan,
‘Muik batu mesa, man tukang batu las kat soleng son,
mo halas ni baut na daid baut netes, le taung in tian nini uma!
Ama Lamtua Allah esa man huil baut na le todo se na.
Undeng na le kit ngat net un in leko-banan isi ka!’ ”✡ Buk in Naka-nahalit 118:22-23
43 Hidim Yesus tupang napiut Un in aa ka noan, “Tiata mi nangan babanan ne. Hmunan nu Ama Lamtua huil kit atuil Yahudi li le daid Un atulin son. Mo undeng mi dai muid Auk lo, tiata mam Ama Lamtua huil atuil didang lolen. Ta atuil man nuil muid Ama Lamtua in koma ngas siis, man tamas nal le daid Un atulin. 44 [Auk tek mi nahlolool tuun. Auk niam, baut netes sa. Atuil man nahi tom baut na ka, mam dudu-dudus. Nol eta baut na nahi tom atuli lam, atuling na kon dudu-dudus.]”‡ In dula dais Yunanin tenga las dul bango 44 ti lo.
45 Nikit tulu agama Yahudi las tene-tenen nas, nol atuil Farisi las ming Yesus in dehet ela ka kon, oen tana noan, Un in aa na hai bus one. Oen hnika mes el atuil in seb klapa la ngas, tamlom tukang baut man kat soleng baut netes sa ngas. 46 Tiata oen koon-mali isi. Hidim oen nuting lalan le daek Una. Mo oen siin-tiud nol atuil hut mamo man parsai noan, Yesus nam Ama Lamtua Allah mee-baha ngas. Ta oen tao saa Un lo.
*21:1 Oen ngali leten na ‘Saitun’, undeng se ua lam, muik klaap saitun mamo. Taom oen lee saitun isin le kat un mina ka. Leten Saitun na katang nga nataka le, kilu mes deng kota Yerusalem.
†21:5 Alkitab dais Yunanin dul mo bango ni noan, “Sion ana bihata la”. Sion nam Yerusalem ngaal didang nga. Ta buk Sakarias sa aa nini dais duda, le haman tek kota Yerusalem atulin nas.
✡21:5 Sakarias 9:9
‡21:8 Matius in dula esa ka, dul noan, ‘kai bango ngas’. Mo kit tanan son deng Yuhanis peke 12 bango 13 ka noan, palam klehen.
§21:9 Oen dais Aram mam noan, ‘Hosana’. Un nahin hmunan hesa ka noan, ‘un bel boa-blingin atuli’. Oras Lamtua Yesus nuli nabael se apan-kloma kia ka, dais na taom oen pake le naka-halit Ama Lamtua Allah.
✡21:9 Buk in Naka-nahalit 118:26
✡21:13 Yesaya 56:7; Yermia 7:11
✡21:16 Buk in Naka-nahalit 8:3
*21:19 Dais Blain pake ‘pohon ara’ deng dais Yunanin συκῆ (sukei). Lam ‘pohon ara’ la se dais Helong ngam, ‘aebloa’. Mo ne Ama Lamtua Allah Buk Niu ka, tulu bel kai ina mes ne ua, man taom atuli mulan, nol kaa isin na. Se Indonesia halin leol-saken niam, atuli kaa kai aebloa isin lo. Tiata ‘aebloa’ in ne Ama Lamtua Allah Buk Niu ka ka, banansila el ‘aebloa’ in ne kita li ngias lo.
✡21:21 Matius 17:20; Korintus mesa la 13:2
†21:29 In mo bango nia ki, Alkitab dais Blain, Terjemahan Baru (TB1) la, dul didang son, deng in dula dais Yunanin man blaan dui, nol banan dui ngas.
✡21:33 Yesaya 5:1-2
✡21:42 Buk in Naka-nahalit 118:22-23
‡21:44 In dula dais Yunanin tenga las dul bango 44 ti lo.