2
Kit in muid Kristus sias in nuli ka musti banansila el tentara las in muid napiut komendan na ka
1 Ana Timutius man auk in namnau! Lamtua Yesus Kristus nam mo dalen na banan isi. Halas ni ku daid mes nol Un son. Nol Un tade le bel kuat-tes ku. Tiata ku musti sium tuun! 2 Hmunan nu, auk tui ku son se atuil hut mamo kas silan, deng Ama Lamtua lalan in nuli man lolo ka. Tiata halas ni, auk nodan le ku laok tui atuil man ku in parsai son nas, asa man ku in ming son deng au ngas. Hidim atuil nas kon musti laok tui bel atuil didang lolen.
3 Kit totoang niam banansila el Lamtua Yesus Kristus tentaran nas. Tiata kit leo-leo lepa-haal susa-daat banansila el Una. Undeng ku nam mo tentara banan, tiata ku kon musti muid le lepa-haal ku nenang nga. 4 Tentara in lako-daek Un osa la ka, laok kutang nol atuil didang osa pait lo. Nini ela lam, un tao un komendan na dalen kolo.
5 Kat kleta didang pait deng in kuti-lii. Eta muid in sukat apa deng in kuti-lii ola lam, musti muid un atorang nga. Eta lo kam, ku puti tuun tia! Ta ku nal lo blaan. Ela kon nol eta ku lako-daek Ama Lamtua osa la lam, daek muid un atorang nga.
6 Tinang se atuil in daek klapa ngas. Un daek hiti-late se un klapa la. Tiata un man haup klapa la isin na muna. 7 Nangan kleta apin nas nol babanan. Mam Ama Lamtua Allah tao ku le nangan taan nas totoang.
8 Nangan babanan deng Yesus Kristus. Un nam laih Daud in hua-koet. Un mate son mo Ama Lamtua Allah belen le nuli pait. Na man daid Dehet Banan, man auk kilan le laok tek atuli las se ola-ola. 9 Undeng auk tek beles Dehet Banan na, tiata auk haup susa-daat elia. Dudui pait ta, oen but auk nini ranteng, hnika noan auk niam mo atuil daat. Mo ela kon no, oen tukan nal Ama Lamtua Allah Dehet Dais Banan na lo. 10 Undeng na le auk tade in lepa-haal susa-daat bili-ngala. Sadi Ama Lamtua atulin man Un in huil nal son nas, haup boa-blingin. Ta mam Ama Lamtua Allah nikit sakeng oen lapa-lapa, undeng oen daid Yesus Kristus atulin. 11 In teka-tekang nias tom baktetebes:
“Eta kit sium noan Kristus mate seda kita lam,
na banansila el kit kon mateng le nang soleng in nuli blaan na,
hidim mam kit kon nuling leo-leo nol Una.
12 Eta kit keeh nal se susa-daat dalen nam,
mam kit kon daad le kil prenta leo-leo nol Una.
Mo eta kit kaen Una lam,
Un kon kaen kita.✡ Matius 10:33; Lukas 12:9
13 Kit muid napiut Un lo kon,
Un nang kit lo,
undeng Un nole lo. Un tek elola lam, Un daek muid ela.”
Atuil in dake, man Ama Lamtua naka
14 Tek nuting atuil in parsai ngas, le halin oen nadidingun dais nias totoang deken. Lok oen nini Ama Lamtua Allah ngala ka, le oen teen in kaen apa deng dasi las nahin na tia. Ta nas totoang muik nahin saa lo. Suma tao didaan atuil in hii-ming deng one ngas tuun. 15 Nuklek babanan le tao ku apam ma banansila el atuil in dake, man haup in naka deng Ama Lamtua Allah. Atuil in ela ngas mae deken, undeng un daek un osa la nol babanan son. Ku musti daid atuil in tui lolo-lolo, deng Ama Lamtua in Teka-teka ngas. Ta Un in Teka-teka ngas nam, toma! 16 Hoen nodat ku apam ma kakatang deng dehet man muik tula-pekeng lo ngas, nol deng dehet man in todan Ama Lamtua lo ngas. Ta nas suma tao atuli li le daat taplaeng. 17 Oen in aa dadaat tas, lohang heo-heon banansila el iil kangker ra. Himeneus nol Filetus in aa ngas kon, parsis ela. 18 Oen duas tui kula noan, totoang atuil in maet son nas, nulis pait son. Mo na tom lo! Nini ela lam, oen sisa katang son deng asa man in toma ka. Asa man oen in tui na, tao didaa atuil tenga las in parsai ka.
19 Mo netes man Ama Lamtua Allah in bangun-pii son na, pepeko lo. Se netes na, muik in dula noan, “Ama Lamtua taan Un atulin nas”, nol “Asii man todan-lahing se Ama Lamtua Allah lam, un musti nuli katang deng daat tas.”✡ Buk in Kahi 16:5
20-21 Kat kleta deng atuil in muki ngas uma. Se um na dalen na, muik sa-saa bili-ngala. Tenga las dakes deng lil-mea nol lil-muti. Mo muik teng pait dakes deng kai nol dale taba. Sa-saa in leko-banan dui ngas, um lamtua ka kom in pake laok se fesat tene. Mo sa-saa in biaas tuun nas sam, uma lamtua ka mae in pakes se atuil hut mamo sila. Ela kon nol atuli lia. Etan un tao apa ka le katang deng in daat tas sam, un daid banansila el sa-saa in leko-banan isi ngas. Um lamtua ka dalen kolo in pake one, undeng bisa pake oen le daek os banan bili-ngala.
22 Atuil muda kas hlapat nahis, undeng oen in kom naseke ka. Mo Timutius, ku musti doh ku apam ma babanan, le tao muid ku in kom naseke ka deken. Nuting le daek in banan na tutungus. Parsai napiut se Ama Lamtua. Nuil nol in namnau, hidim nuil babanan nol totoang atuli lia. Totoang atuil man in parsai se Ama Lamtua, man nulis nol dalen niu ngas, daek in banan na tutungus. Tiata Timutius, ku in nuli ka musti banansila el one! 23 Auk tek ulang ku pait! Laok dehet tupang nol dais man muik tula-pekeng lo ngas deken. Ta nas totoang suma tao atuli li le keng apa tukun. 24 Atuil in daek taung Ama Lamtua ngas, daid atuil in hode-lokot tam, tom lo! Oen musti nuil leko-banan saol atuli li totoang. Tui taan atuli, nol keeh nal apa nas, eta atuli daek daat saol one. 25 Oen musti tui-tikang atuil in labang daat tas nol babanan. Halin nam oen sabail apan nas le tenes deng oen in kula-sala ngas, nol sium asa man in toma ka. 26 Nini ela lam, uikjale kas lahin tuan na kiu nal oen le daek muid un in koma ka pait lo.