6
Dehet deng ata nol tuang
1 Muik tuang deeh ata kas parsai se Lamtua Yesus. Molam ata kas musti todan oen tuang ngas, le halin atuil in parsai lo ngas haup lalan le tao nahu Ama Lamtua Allah ngala ka lo, nol ngat kabaul kit in tui-tikang ngas lo. 2a Muik ata deeh tuang ngas kon parsai se Lamtua Yesus. Ta ata kas boel ngat kabaul oen tuang ngas deken, undeng tuang nas parsai Lamtua Yesus. Tiata oen musti lii-lau oen tuang ngas nol babanan dui pait, undeng ata kas nol tuang ngas, leo-leo atuil in parsai, man musti nuil namnau bali-bali apa.
In tui-tikang kula nol in kom duit
2b Timutius! Tui jemaat tas, le halin oen makoe in daek muid nias totoang. 3 Kit in tui man toma ka, daid peke deng lalan in nuli man tao Ama Lamtua dalen kolo. Mo atuil in tui didang deng nia ngas, hutun soleng Lamtua Yesus Kristus in tui man toma ngas. 4 Atuil tuladang ela ngas, koaok daat molota oen ngengon! Taom oen nuting lalan le kaen apa deng dasi-dehet deeh tukun. Nias totoang tao atuli li le idus, keng apa, tao didaa atuil didang ngaal banan, hidim idus-neo dadahut nol atuil didang. 5 Atuil in ela ngas, tao lobo-lau dadahut daat. Oen in nangan na ne daat tas si-sii. Oen nangan taan ol man in toma ka lo son. Nol oen kon nangan noan, eta oen osan banan in daek muid agama la kam, oen bisa daid atuil in muki.
6 Meman agama man in toma ka, tao kit le haup ontong tene, sadi kit nuil lolo nol nuil muid Ama Lamtua in koma ka. Hidim dalen kolo nol asa tukun man kit in hapu ngas.
7 Nangan babanan! Dedeng in hua kita ka, kit kil sa-saa mes lo kon maa se apan-kloma kia. Nol eta kit mateng ngam, kit kon kil puting sa-saa mes lo kon deng apan-kloma kia. 8 Tiata sadi muik in kaa, nol kai-baut in pake nola lam, dalen kolo tia!
9 Mo atuil in kom isi le daid atuil in muki ka, hlapat tom in neleng-diting bili-ngala, nol tom in nole kliu-kanan, undeng oen suma nangan deng in hmuki-nala tukun. In ela ngas bisa tao didaa, nol tao dudus oen in nuli ka. 10 Ta in kom duit isi ka, daid peke deng atuil in tao dadaat bili-ngala ngas. Muik atuli teng kom naseke in haup duit, didiin oen sisa katang son deng oen in parsai man toma ka. Undeng na le, oen tao didaan oen in nuli ka esan.
Kil dididi in tui man mi in sium son nas
11 Timutius! Ku niam mo Ama Lamtua Allah nena. Tiata ku bian kakatang deng in daat tas totoang. Nuil niu. Nuil le tao Ama Lamtua dalen kolo se totoang dasi las dalen. Parsai napiut se Yesus Kristus. Namnau papmes atuli lia. Tahang mumuun se in susa dalen. Nuil babanan nol totoang atuli lia. 12 Nuklek mumuun le bani-bating totoang in tui man kit in parsai son nas. Ama Lamtua haman tamang ku lako se in nuli man hidi nutus taan lo ka son. Tiata kil in nuli na dididi le sao deken. Ku kon tek ku in parsai Lamtua Yesus ela ka se atuil hut mamo silan son. 13-14 Tiata nol ni kon, auk nodan ku le but in hida elia: daek muid Lamtua Yesus in prenta ngas totoang. Boel kaliut in prenta ngas mes deken kon, le halin nam atuli li net ku in tao kula-sala lo ka. Daek muid nas totoang nol baktetebes, didiin kit Lamtuan Yesus Kristus in pait maa kia. Auk nodan le ku hid ela se Ama Lamtua Allah sila-mata. Ta Un man bel hngasa se totoang sa-saa in nuli kias. Auk kon nodan le ku hid ela, se Yesus Kristus sila-mata. Ta Un man tek langa-langa son deng Un apa ka, se gubernur Pontius Pilatus sila.✡ Yuhanis 18:37
15 Lamtua Yesus in muun isi ka, man kil kuasa.
Un nam mo, Laih Tene dui deng totoang lahi-lahi lias.
Nol Un kon nam, Tuang Tene dui totoang tuang-tuang ngias.
Tom nol un oras-lelon na lam,
Ama Lamtua tao langa dais nias.
16 Suma Un sii man mate net lo.
Un nuli ne langa dalen, man atuli ngat tam tahang bolen lo.
Muik tahan atuli mes lo kon man ngat net Una.
Totoang in todan ni taung Una.
Totoang in kuasa kia, muik ne Un ima ka, lako lius didiin!
Ela tuun tia. Tom baktetebes!
Dehet deng atuil in muki ngas
17 Tek atuli-atuil in muki ne apan-kloma ki ngias, le halin nam oen koaok le nahlae se oen hmukin nas deken. Ta mam hmuki-nal nas hidis totoang. Banan dui ka, oen holtain se Ama Lamtua Allah man in nuli ka. Ta Un man bel kit totoang, asa man kit in parlu ngas, le halin nam kit nuil babanan nol dael kolo. 18 Tek oen le pake oen hmuki-nalan nas, halin daek sa-saa banan nas. Oen musti makoe in daek banan. Oen kon musti iman kahan le hulung atuil tenga las, nol kom in bani-bating hangun man Ama Lamtua in bel one ngas. 19 Oen in tao oen hmuki-nalan nas ela ka, man daid peke taung oen in nuli, se leol ola bingin dua kia. Nini ela lam, oen in nuli ka muik nahin.
Paulus hep un surat ta
20 Timutius! Doh babanan totoang man Ama Lamtua Allah in parsai le bel ku son nas. Boel kutang nol dehet in nole-lilung ngas deken. Dehet tupang dais man kil in todan taung Ama Lamtua Allah lo ngas deken. Nangan ne! Ta muik atuli teng nataka apan nas le atuil in tana. Molota oen in ‘tana’ ka, muik peke lo. Laok kaen nolas deken. 21 Muik atuli teng parsai nol in tui nole-lilung ngas, didiin oen sisa deng oen in parsai baktetebes son se Ama Lamtua Allah ka.
Auk nodan le Ama Lamtua tulu Un dalen banan na bel mi totoang.
Boa-blingin,
Paulus