10
God Da Judge Goin Do Da Right Ting
1 Eh! You Da One In Charge! How come you no stay close to me?!
How come, weneva tings come bad, you stay hide?!
2 Da guys dat do wass wrong,
An get big head bout dat,
Dey go afta da peopo
Dat stay pooa.
I like fo da bad tings dey plan fo do,
Happen to dem!
3 Cuz dem bad guys talk big
Bout da bad tings dey like do.
Dey talk real good
Bout da ones dat take stuff away from odda peopo,
Same time, dey talk pilau bout Da One In Charge,
Jalike he no mean notting.
4 Dese big head guys,
Dey no like know God.
All da time dey tink,
“Weneva us guys make one plan fo do bad kine stuff,
No need tink bout God!”
5 Dese bad guys, da way dey live,
Eryting come out good fo dem.
But wen God judge dem,
Dey no can undastan
How come he judge um lidat.
Dass why dey make fun
A da peopo dat stay agains dem.
6 Dem buggahs, dey tink in dea head,
“Me, I stay solid,
Notting goin throw me off!
Me, I not goin get trouble,
Me, an all my ohana, foevas!”
7 ✡ 10:7: Rome 3:13-18Dey put kahuna on top peopo,
Dey bulai,
Dey put presha on peopo.
Dey ony mout, so pilau wat dey tell,
Dey talk ony bout how fo do bad kine stuff.
8 Dey hide inside da small towns
Fo wait fo jump peopo
Dat neva do notting an kill um.
Dey look an look
Fo somebody dat no can fight back.
9 Jalike one lion hide inside da bushes,
Dey wait
Fo grab da peopo dat stay pooa ting,
Jalike dey catch um wit dea net.
10 Dey strong, an dey jump da peopo
Dat donno wass happening,
An take um down,
An bus um up,
Cuz dey donno how fo fight back.
11 Da bad guys, dey tink,
“God, he foget awready!
God look da odda way,
Fo make jalike he neva see notting.”
12 Eh! You Da One In Charge! Go fo broke!
Eh God! Bus um up dem bad guys!
No foget da peopo dat stay suffa!
13 Eh God! How come da bad guys tink you notting?!
Dey even tink you no goin pay dem back!
14 But you, erytime dey do humbug kine stuff
You see um an make trouble.
You know wass happening fo real kine!
You get da powa fo pay dem back.
Dass why da peopo dat no can fight back
Trus you fo take kea dem.
You da One dat take kea
Da peopo dat no mo faddah o muddah.
15 Go take away da powa
Dat da bad peopo get.
Den, wen you pay um back
Fo da bad tings dey do,
You no goin let um go till dey all come wipe out.
16 Eh! You Da One In Charge! You da King foeva!
All da odda peopos dat donno you,
You goin hemo dem from yoa land foeva!
17 But wen da peopo dat suffa
Like fo you help dem,
You, Da One In Charge, lissen dem real good.
You goin make dem come all solid inside.
You goin hear wat dey tell
An goin do um.
18 Wen da peopo dat no mo muddah an faddah yell fo help,
An da peopo dat da oddas make any kine to,
You goin stan up fo dem.
You goin make lidis
Fo da bad guys in da world
No make nobody sked no moa!