8
Da Lady Dat Know Wat Fo Do
1 ✡ 8:1: Smart 1:20-21Lissen up! Da kine stuff peopo get inside dem
Wen dey know wat fo do erytime,
Try tink bout um, jalike dass one lady,
Da kine Lady Dat Know Wat Fo Do Erytime
An dis lady, she make big noise in front erybody fo dem hear.
Her da Lady Dat Undastan Stuff,
An she talk fo erybody hear.
2 She go stan on diffren places wea peopo can see her
Inside da town, by da main streets,
An wea da odda roads cross da main ones,
3 An right outside da main gates fo go inside da town,
She tell importan stuff an talk fo erybody hear.
Dis wat she tell:
Da Lady Like Fo Erybody Hear
4 “Eh you guys ova dea! I stay talk to you!
Da tings I tell, fo erybody jalike you!
5 Eh, you guys dat donno notting an easy fo bulai!
Come learn how fo be akamai!
An you dumb buggahs dat tink you no need learn notting,
Come learn how fo tink strait!
6 So lissen up! Cuz I goin talk strait to you guys.
Wen I open my mout, you goin hear stuff dat stay right on.
7 Cuz you know, az right, eryting I tell.
No way I goin tell real bad kine stuff
An make my mout come all pilau.
8 Wateva I tell you,
I tell um cuz I ony do da right ting all da time,
No mo crooked kine stuff an no mo notting fo trick you.
9 Anybody dat tink bout um an undastan stuff,
Dey know dat I tell you fo real kine erytime.
Da peopo dat know stuff,
Dey know dat eryting I tell you stay fo real kine.
10 Learn from me wat stay right,
Dass mo betta den get plenny silva.
Learn plenny good stuff!
Dass mo betta den get da bestes kine gold.
11 Cuz mo betta, way betta,
If you know wat fo do erytime,
Mo betta den plenny red jewelry stone.
If you know wat fo do,
Dass mo betta den any kine stuff you like get.”
Good Tings Happen Fo Da Peopo
Dat Know Wat Fo Do
Dat Know Wat Fo Do
12 “Me, I da Wahine Dat Know Wat Fo Do.
I stay wea all da akamai peopo stay.
I show peopo wat dey gotta know fo make good plan.
13 (You know, if you sked wen you go
In front Da One In Charge
Cuz he so awesome,
Dat mean, wen somebody do bad kine stuff, you no like dat.)
Wen peopo get big head,
O wen dey come high makamaka,
O wen da way peopo live, dey ony like ack bad,
O wen dey tell stuff fo try trick you,
I no like dat too.
14 “Me, I da one dat can teach peopo how fo make plan
An fo tink real good bout eryting dey goin do.
Me, I da Wahine Dat Undastan Stuff,
An I get plenny powa.
15 If dey know who me,
Da king guys can do dea job real good,
An da big govmen guys can make good kine rules,
Az how peopo goin do da right ting.
16 If dey know me, da leada guys can do dea job real good.
An da alii kine guys can judge peopo da right way.
17 “I get love an aloha fo erybody dat get love an aloha fo me.
Erybody dat go look fo me, dey goin find me.
18 Wen peopo stay tight wit me,
Dey goin get plenny stuff,
An dey goin get respeck from erybody.
An all da good stuff dey get,
Dey goin get um da right way,
An goin keep um long time.
19 Da tings I give dem,
Mo betta den even da fancy kine gold.
Da stuff dat come from me
Mo betta den da bestes kine silva.
20 Erytime, I stay do da right ting.
No matta wea I go, I judge da right way.
21 I do dat, cuz I like give da peopo I love
Da kine stuff dey can keep long time.
I like make all da place
Wea dey put all dea stuff, come full.”
22 ✡ 8:22: JShow 3:14Da Wahine Dat Know Wat Fo Do, she tell dis too:
“Da One In Charge, he wen make me.
Az da firs ting he wen do,
Befo all da odda tings he was goin do,
Long time befo da time he wen start.
23 Befo eryting wen start, Da One In Charge wen put me togedda,
Firs ting, befo da world start.
24 “Neva have ocean an all da stuff undaneat, dat time,
Neva have pukas wea plenny watta come out,
Dass da time I wen born.
25 Befo God make da mountains an da hills
Da place wea dey stay,
Dass da time I wen born.
26 Still yet, God neva make da groun o da fields, dat time,
Neva even have dirt yet,
An me, I was dea.
27 Wen Da One In Charge put da sky up dea
An cut out one circle on top da deep ocean wea da sky stay,
Dass wea I was.
28 Dat time, Da One In Charge wen make da high clouds
Strong fo stay up so dey no fall down.
An he make plenny watta come outa da big pukas
Dat stay undaneat da ocean,
29 Wen he make some place fo keep da watta inside da ocean
So da watta no can come on top da land,
Da time he wen make one strong foundation fo put da earth on top.
30 “Az was me, right dea stay working nex to Da One In Charge,
Doing one good job fo help him make da world.
Weneva he see me, he feel good inside
Cuz good fun, I like work in front him!
31 Was like one party, inside God world,
Da part wea da peopo stay live,
An wat make me feel good inside,
Was da peopo.
32 “My kids, I tell dem, ‘You betta lissen good now!’
Da peopo dat do jalike how I stay do,
Dey can stay good inside!
33 You betta lissen wen I teach you how fo fix wat you stay do!
Come jalike da kine peopo dat know wat fo do!
No make jalike you no need hear wat fo do!
34 Whoeva lissen me all da time,
An come in front my door wait fo lissen ery day,
An come stay by da door,
Wea dey can spock me wen I come outside,
Dey can stay good inside!
35 Cuz whoeva find me,
Dey find da real kine life,
An Da One In Charge like do good tings fo dem.
36 But whoeva no can find me,
Dey ony come jam up.
Whoeva hate me,
Jalike dey like fo mahke.”