7
Bummahs!
(Matthew 10:35-36; Luke 12:53)
1 Den Micah tell:
“Bummahs! I feel jalike one guy dat like go pick up fruits summa time,
Afta da harves guys harves um awready.
An I no find grapes fo eat,
An no mo early figs dat I plenny ono fo eat.
2 Cuz no mo nobody ova hea inside da land
Dat stay tight wit God.
No mo nobody hea do da right kine stuff!
Erybody like kill somebody.
Dey even like set up dea braddahs,
Jalike wit one trap fo wipe um out.
3 Fo do bad kine stuff, dey go all out!
Da alii guys aks fo gifs fo make dem come rich.
Da judge guys aks fo unda da table kine money fo do dea job.
Da importan guys tell wat dey like erytime.
Dey all make plan togedda fo do um.
4 Even da bestes kine guy dea,
He jalike one bush wit thorns all ova um.
Da guy wit dem dat do da mos right kine stuff,
He still mo worse den one plant wit thorns!
“Dis, da time yoa guys dat watch fo messages from God
Wen talk bout awready.
Az time awready fo God punish you guys.
Now erybody stay all mix up.
5 No lissen da guy dat stay close to you.
No trus yoa fren.
Watch out bout wat you tell,
Even to yoa wife.
6 ✡ 7:6: Matt 10:35-36; Luke 12:53Da boys even talk jalike dea faddahs stupid.
Da girls go agains dea muddahs.
Da daughtah-in-laws go agains dea muddah-in-laws.
Da guys dat go agains you
Dey come from yoa ohana.
7 “But me, I watch fo Da One In Charge.
I wait fo God cuz he goin get me outa all dis trouble.
My God goin lissen me.
8 You guys dat stay agains me,
No laugh bout me!
No matta I fall down,
I goin stan up one mo time.
No matta jalike I sit inside one dark place,
Da One In Charge goin stay jalike one light fo me.
9 I gotta hang in dea now,
Cuz Da One In Charge stay huhu an goin punish me,
Cuz I wen do bad kine stuff agains him.
But afta dat, he goin talk fo me in front da judge,
An make right all da bad kine stuff
Dat da guys dat stay agains me wen do.
Jalike he goin bring me out wea get light,
An I goin see dat he stay do wass right.
10 Den da peopo from odda lands dat stay agains me goin see dat,
An dey goin come plenny shame in front erybody.
Cuz dey wen make fun a me an tell,
‘Eh! Yoa God, Da One In Charge, wea he stay?!’
But I goin see dem lose face!
Dey goin come jalike da mud dat get on top da streets,
Wen peopo walk all ova um.
11 “Den Da One In Charge tell:
‘Bumbye, goin come time fo make yoa town walls good one mo time,
An make yoa land mo big.
12 Dat time da peopo goin come
Fo show you respeck
From Assyria an da Eufrates Riva east side,
An all da way from da Egypt towns south side,
From seas all ova,
An from mountains all ova.
13 All dose countries goin come empty jalike da boonies,
Cuz a all da bad kine stuff
Da peopo dat live dea stay do.’ ”
Micah Pray To God
14 Den da peopo tell:
“You Da One In Charge!
Carry yoa club an come
Jalike one sheep guy proteck his sheeps.
Lead yoa peopo jalike dey yoa sheeps,
Dey da peopo I wen give you jalike dey yoa property.
Some a dem live wit nobody inside da fores,
But now, give um fields wit green grass fo eat all aroun.
I like dem make jalike sheeps
Dat eat da green grass Bashan an Gilead side,
Jalike befo time.”
15 Den Da One In Charge tell:
“I goin show you guys awesome kine stuff I goin do,
Jalike da time you guys wen come outa Egypt.
16 Wen da odda peopos see dat happen, dey goin come shame,
Cuz dey no mo powa.
Dey goin put dea hand on top dea mout
Cuz dey donno wat fo do.
Dey no can hear notting dat time.
17 Dey goin eat dirt jalike da snake,
An odda tings dat crawl on top da groun.
Dey goin come from dea places wea dey live
To oua God, dass Da One In Charge a us,
An dey goin shake cuz dey stay plenny sked a you guys.”
18 Den Micah tell:
“No mo anodda god jalike you!
You let go da peopo dat still stay alive,
No matta dey wen do bad kine stuff.
You hemo all da shame dey get cuz dey wen go agains you,
An you no stay huhu long time.
You take da peopo dat stay come back by you,
Cuz you stay good inside wen you stay tight wit dem.
19 You goin take us back one mo time,
Cuz you get love an pity fo us.
You goin hemo all da bad kine stuff we wen do,
Jalike you goin throw all da bad kine stuff us guys wen do
Down inside da mos deep ocean.
20 You goin hang in dea wit da Jacob ohana peopo,
An stay tight wit da Abraham ohana peopo,
Jalike you wen make one strong promise to oua ancesta guys fo do,
Long time befo time.”