1 Da property fo da Judah ohana, fo da small Judah ohanas, start nex to da Edom land. Dass da Zin Boonies, south side.

2 Da south edge a dea land start from da bay dass da south edge a da Big Salt Lake. 3 Da property go from dea to da south side a da Scorpion Pass, an by da Zin Boonies, an ova by da south side a Kadesh-Barnea town, den ova to Hezron town an up to Addar town an aroun Karka town. 4 Den pass Azmon town, an from dea go to da stream dass da Egypt borda, an from dea to da Mediterranean Sea. Dis da south edge.

5 Da east edge a da Judah land, az da Big Salt Lake all da way to da end a da Jordan Riva.

Da north side edge a da Judah land go from da bay wea da Jordan Riva reach da end a da Big Salt Lake. 6 Den go up by Bet-Hoglah town an den da north side a Bet-Arabah town to da Bohan Stone dat dey name fo Bohan, Reuben boy. 7 Den go up to da odda Debir town from Trouble Valley. Den turn an go north to Gilgal town, dat face da Adummim Pass da odda side a da canyon, den by da watta En-Shemesh side, an from dea to En-Rogel. 8 Den from da edge a da Judah land go up da Ben Hinnom Valley, da south side a da hill dat get Jerusalem on top side, da main town fo da Jebus peopo. Den go da top a da hill dat make da west side a da Hinnom Valley, by da north end a da Refaim Valley. 9 From da top a dat hill, go aroun to da Neftoah puka fo watta, den to da Mount Efron towns, an den down by Baalah town, dat get da name Kiriat-Jearim too. 10 Den go west from Baalah to da Seir Range, an aroun da north side a Mount Jearim (dass Kesalon), an down to Bet-Shemesh, an go across to Timnah. 11 Den da borda go da north side a da hill nea Ekron town, an turn to Shikkeron town, an pass Mount Baalah, an reach Jabneel town. From dea, end by da Mediterranean Sea. Dis da north edge.

12 Da west edge, az da coast a da Mediterranean Sea.

Dis da land fo da Judah ohana.

13  ✡ 15:13: Local 1:20Jalike Da One In Charge tell Joshua fo do, he give Caleb, Jefunneh boy, one place inside Judah. Az was Hebron town, dat befo time dey call Kiriat-Arba (Arba, he da ancesta fo da Anak peopo). 14 Caleb take away da land from da three Anak ohanas from Hebron: az da Sheshai, Ahiman, an Talmai ohanas. 15 From dea, Caleb go agains da peopo dat live inside Debir town. Peopo wen call Debir “Kiriat-Sefer” befo time. 16 Caleb tell, “Whoeva attack Kiriat-Sefer town an take um ova, I goin give um my girl Aksah fo marry.” 17 Otniel guys wen go attack Kiriat-Sefer an take um ova. He Caleb braddah Kenaz boy. So Caleb give Otniel his girl Aksah fo marry.

18 Da same day Otniel marry Aksah, she talk nice to him an tell him az good if he aks her faddah fo give dem some property country side. Wen she get down from her donkey, her faddah aks her, “Wat you like me do fo you?”

19 She tell um, “I like you do someting spesho fo me. You awready wen give me land inside da dry Negev boonies. So den, try give me some watta springs too.” So Caleb give her da high an low springs dea.

20 Dis da property dat da small ohanas in da Judah ohana get. 21 Da south side towns fo da Judah ohana stay far away, inside da Negev boonies to da edge a Edom: Kabzeel, Eder, Jagur, 22 Kinah, Dimonah, Adadah, 23 Kedesh, Hazor, Itnan, 24 Zif, Telem, Bealot, 25 Hazor-Hadattah, Keriot-Hezron (dass Hazor town), 26 Amam, Shema, Moladah, 27 Hazar-Gaddah, Heshmon, Bet-Pelet, 28 Hazar-Shual, Beer-Sheba, Biziotiah, 29 Baalah, Iim, Ezem, 30 Eltolad, Kesil, Hormah, 31 Ziklag, Madmannah, Sansannah, 32 Lebaot, Shillhim, Ain, an Rimmon. Dass 29 towns an small towns aroun dem.

33 Da towns fo da Judah ohana inside da west side hills: Eshtaol, Zorah, Ashnah, 34 Zanoah, En-Gannim, Tappuah, Enam, 35 Jarmut, Adullam, Sokoh, Azekah, 36 Shaarayim, Aditayim, an Gederah (dat dey call Gederotaim too). Get fourteen towns an small towns aroun dem.

37 Odda towns fo da Judah ohana inside da west side hills: Zenan, Hadashah, Migdal-Gad, 38 Dilean, Mizpah, Jokteel, 39 Lakish, Bozkat, Eglon, 40 Kabbon, Lahmas, Kitlish, 41 Gederot, Bet-Dagon, Naamah, an Makkedah. Dass sixteen towns an small towns aroun dem.

42 Odda towns fo da Judah ohana in da middo a da west side hills: Libnah, Eter, Ashan, 43 Iftah, Ashnah, Nezib, 44 Keilah, Akzib, an Mareshah. Dass nine towns an small towns aroun dem.

45 Towns fo da Judah ohana wea da Filisha peopo live: Ekron, an small towns aroun dea, 46 from da west side a Ekron, eryting nea Ashdod, an small towns aroun um, 47 Ashdod, an da small towns aroun dea, an Gaza an dea small towns, all da way to da stream dass da Egypt borda, an den to da coast a da Mediterranean Sea.

48 Towns fo da Judah ohana up country: Shamir, Jattir, Sokoh, 49 Dannah, Kiriat-Sannah (dass anodda name fo Debir), 50 Anab, Eshtemoh, Anim, 51 Goshen, Holon, an Giloh. Dass eleven towns an small towns aroun um.

52 Odda up country towns fo da Judah ohana: Arab, Dumah, Eshan, 53 Janim, Bet-Tappuah, Afekah, 54 Humtah, Kiriat-Arba (dass da ol name fo Hebron), an Zior. Dass nine towns an small towns aroun dem.

55 Up country Judah towns, southeast from Hebron: Maon, Carmel, Zif, Juttah, 56 Jezreel, Jokdeam, Zanoah, 57 Cain, Gibeah, an Timnah. Dass ten towns an small towns aroun dem.

58 Up country Judah towns north from Hebron: Halhul, Bet-Zur, Gedor, 59 Maarat, Bet-Anot, an Eltekon. Dass six towns an small towns aroun um.

60 Kiriat-Baal (dass Kiriat-Jearim), an Rabbah. Dass two towns an small towns aroun dem.

61 Judah towns inside da boonies: Bet-Arabah, Middin, Sekakah, 62 Nibshan, Salt Town, an En-Gedi. Dass six towns an small towns aroun dem.

63  ✡ 15:63: Local 1:21; 2Sam 5:6; 1Rec 11:4Da Judah ohana no can push out da Jebus peopo dat live inside Jerusalem, an dey still yet stay dea today wit da Judah peopo.