10
God An Da Idol Kine Gods
(2 Tessalonika 1:8)
1 Lissen wat Da One In Charge tell you Israel peopo. 2 Dis da message from Da One In Charge. Dis wat he tell:
“No go learn how fo do stuff
Da way da odda peopos do um.
Dose peopos come all sked
Wen dey see da star pichas inside da sky,
But you guys, no let dat kine stuff make you guys sked.
3 Cuz da way dose odda peopos show respeck fo dea gods,
Ony wase time!
Dey go inside da fores an cut down one tree,
So one guy dat know how fo cut da wood fo make someting,
An he make one idol kine god wit his tools.
4 Dey put silva an gold fo make um look nice.
Dey use hamma an nails on top um,
So no goin fall down.
5 Dey jalike one skecrow inside one cucumba garden,
Dea idol kine gods no can talk.
Fo shua, somebody gotta carry dem
Cuz dey no can walk.
No sked a dem!
Dey no can hurt nobody
An dey no can help nobody.”
6 Da One In Charge, no mo nobody stay jalike you.
You da bestes!
Wen peopo know wat kine god you,
Dey know you strong an can do awesome kine stuff!
7 ✡ 10:7: JShow 15:4Erybody gotta get choke respeck fo you!
Cuz you da king fo all da peopos. Az who you!
Da diffren peopos get dea guys dat know wat fo do erytime,
An dey get dea kings,
But still yet no mo nobody stay jalike you!
8 Dea smart guys, dey no can tink mo betta den da animals,
An dey do stupid kine stuff.
Fo shua, no can learn wat fo do
From da idol kine gods dey make from wood!
9 Dey bring thin kine silva from Tarshish in Spain,
An gold from Ufaz.
Da guys dat know how fo make idol kine gods
An put gold on top um,
An put blue an purple clotheses on top um too.
10 But Da One In Charge, he da ony god dass fo real.
He da God dat stay alive an stay da king foeva.
Wen he come huhu, da earth shake.
Da diffren peopos no can handle
Wen he no like wat dey do.
11 Da One In Charge tell, “Tell dose peopos dis: ‘Dese idol kine gods, dat neva make da sky o da earth, dey goin come all wipe out from da earth an unda da sky.’ ”
12 Da One wen make da earth, was Da One In Charge,
Cuz he get powa.
He da One make da world stay how stay
Cuz he know wat fo do erytime.
Jalike he spread out da sky
Cuz he know da bestes way fo make um lidat.
13 Wen he talk, da thunda, jalike az his voice,
An make da watta inside da sky make big noise too.
He make da clouds come up
From da mos far places on top da earth.
He make da lightning come wit da rain.
He bring da wind outa his storage places.
14 Peopo, dey stupid.
Dey donno notting.
Da guys dat make stuff from gold come shame cuz a da idols dey make.
Da idol kine gods dey make, dey not da real kine God.
Dey no can breave!
15 Dey no worth notting.
Can ony make fun a dem.
Wen dey go stan in front da Judge,
He goin wipe dem out.
16 Da One da Jacob peopo get fo be dea God,
He not jalike dose idol kine gods!
Cuz he da One wen make eryting.
He make da Israel ohana peopo fo come his peopo.
Da One In Charge, he Da God Ova All Da Armies,
Az wat kine god him!
God Goin Wipe Out Jerusalem
17 Grab wateva you can carry wen you go way from da land,
You Jerusalem peopo dat get armies all aroun you!
18 Cuz dis da message from Da One In Charge:
“Dis wat I goin do right now.
I goin throw out you peopo dat live inside dis land.
I goin make you guys suffa plenny
Fo da odda army guys capcha you.”
19 Da Jerusalem peopo yell:
“Bummahs! I stay sore big time!
Wea dey wen wack me stay mo worse.
But I tink,
‘Fo shua, dass how sick I stay,
An I gotta try handle.’
20 My tent stay all bus up.
All da tent ropes stay broke.
My kids stay gone from me awready.
No mo dem.
No mo nobody stay hea fo help me put up my tent one mo time
An stretch out da tent cova.
21 Da leada guys dat suppose to help da peopo,
Dey jalike sheep guys
Dat donno notting.
Dey no go find out from Da One In Charge wat fo do.
Az why dey no ack jalike peopo dat know wat dey stay do.
Da peopo dey suppose to lead
Go all ova da place, jalike sheeps.
22 You know wat?!
Get news:
One big army stay coming
From da land north side!
Soun jalike one earthquake!
Da army stay come
Fo bus up all da Judah towns,
Fo ony da jackal kine wild dogs live hea.”
Jeremiah Pray
23 “You, Da One In Charge,
I know fo shua peopo no own dea life.
No mo nobody can make dea own plan
Fo da nex ting dey goin do.
24 Show me wat da right ting fo me do
Wen I stay do da wrong kine ting,
But judge me da right way!
No come huhu wit me wen you judge me,
Cuz no good you make me come wipe out!
25 Mo betta you throw yoa huhu
On top da nations dat donno you,
An wit da ohanas dat donno wat kine god you,
An dey no call you fo help dem.
Cuz dem, dey kill us peopo dat get Jacob fo oua ancesta,
An dey bus up da land wea we live.”