29
Bummahs Fo Da Jerusalem Peopo!
(Matthew 15:8-9; Mark 7:6-7; Rome 9:20; 11:8; 1 Corint 1:19; Colosse 2:22)
1 Bummahs! fo da peopo inside Jerusalem town,
Da town dat get da spesho name Ariel!
Da town wea King David an his army guys
Wen make camp befo he take ova da town.
Year afta year, you Jerusalem peopo,
Still make da spesho religious kine time!
2 Still yet, I goin make hard
Fo da peopo inside Ariel town.
Dey goin stay sad an sore inside.
Bumbye Ariel town goin be fo me,
Jalike da kine town I like um fo be.
3 Jalike King David time,
I goin make army guys come make camp
An go circle aroun da town.
I goin put army guys wea dey stay ready
Fo fight you guys.
I goin tell um fo pile up dirt
Fo walk on top da wall.
4 Yoa peopo goin come notting.
Wen you guys go try fo talk, goin soun
Jalike you stay bury unda da groun.
Wateva you like tell,
Goin stay down inside da dirt.
You guys goin soun jalike one mahke guy
Talking from da groun an no can hear,
O jalike one small bird on top da dirt.
5 Goin get real plenny guys from anodda place
Dat stay agains you guys,
But dey goin come jalike da dirt on top da groun.
All da peopo dat like hurt you guys,
Dey goin come jalike da junk kine stuffs from da wheat
Dat stay blow way.
Goin come real fas,
6 From me, Da One In Charge,
Da God Ova All Da Armies,
Goin come time fo make eryting come good.
Goin get thunda,
An da groun goin shake, an get big noise.
Goin get strong wind, an storm,
An fire dat goin wipe out eryting.
7 Dat time, da Jerusalem peopo
Goin tink bout all da diffren armies
Dat wen fight dem,
An how dey wen try fo bus up
Da strong wall aroun da town,
An how dey wen make hard fo da peopo.
Wen da Jerusalem peopo tink bout all dat,
Goin be, jalike ony was one dream
Dat dey wen see nite time.
8 Az jalike wen one guy dream dat he hungry an stay eat,
But he wake up an he still yet hungry.
Jalike wen one guy dream dat he thirsty an stay drink,
But he wake up an he not strong,
An still yet he thirsty.
Same ting fo all da diffren peopos
Dat stay fight Jerusalem town.
Jalike dey dream dey take ova Mount Zion inside Jerusalem,
But dey wake up, an dey no can.
9 Hang aroun an no do notting,
An yoa jaws goin drop!
Cova yoa eyes,
Fo you no see notting!
Come jalike you stay piloot,
But not cuz you drink wine.
Walk aroun an stagga,
But not cuz you drink beer.
10 ✡ 29:10: Rome 11:8Cuz jalike Da One In Charge wen make you pass out an sleep!
You guys dat talk fo him,
He shut yoa eyes real good.
You guys dat can see wat goin come bumbye,
Jalike he wen cova yoa head wit one cloth.
11 Fo you guys, da tings dat God show
Wen come jalike one paypa dat get words on top
An somebody roll um up
An close um wit one wax kine seal.
If you give um to somebody dat know how fo read,
An tell um “Read um fo me,”
He goin tell, “I no can.
Get seal on top um.”
12 An if you guys give um to somebody dat donno how fo read,
An tell him fo read um,
He goin tell, “I no can.
I donno how fo read.”
13 ✡ 29:13: Matt 15:8-9; Mark 7:6-7My Boss tell:
“Dis peopo tell dey mines,
But dey ony mout!
Dey talk jalike dey get respeck fo me.
But ony mout dem!
Inside dey stay far from me.
Wen dey like show love an respeck fo me,
Dey ony copy da words dey wen learn
From da rules odda peopo tell um fo do.
14 ✡ 29:14: 1Cor 1:19Az why I goin do dis awesome ting
One mo time fo dis peopo,
All plenny kine stuff, ova an ova.
All da stuff dat da guys tell
Dat know wat fo do erytime,
Goin all come wipe out.
An all da stuff dat da guys tell
Dat undastan stuff,
Nobody goin know wat dey know, bumbye.”
15 Bummahs! fo da guys dat tink dey can hide dea plans
Inside one deep hole, so Da One In Charge donno bout um.
Bummahs! fo da guys dat do dea work in da dark an tink,
“Nobody goin see us! Nobody goin know!”
16 ✡ 29:16: Isa 45:9; Rome 9:20You guys make eryting all kapakahi!
You tink da guy dat make clay pots
He jalike da clay?
You tink da ting somebody make
Goin tell bout da guy dat make um,
“Eh! He neva make me!”?
You tink da pot goin tell bout da guy dat make um,
“Eh! He donno notting!”?
17 Pretty soon, Lebanon goin come
One place wea plenny tree grow.
Peopo goin tink dat place look jalike one fores.
18 Dat time, da peopo dat no can hear,
Dey goin hear wat one roll up paypa tell.
Da guys dat no can see, an see ony dark kine stuff now,
Dat time dey goin see
No matta dark all aroun dem.
19 Da peopo dat no need be numba one all da time
Dey stay feel good inside one mo time
Cuz dey stay tight wit Da One In Charge.
Da peopo dat no mo notting goin dance an sing
Cuz dey stay tight
Wit da God fo da Israel peopo,
Da One dat stay good an spesho.
20 Da mean kine guys goin disappea.
Da stupid head kine peopo wit attitude goin go too.
Erybody dat make plan
Fo do bad kine stuff,
God goin wipe dem out.
21 Da guys dat use words
Fo make some odda guy do someting bad,
Da guys dat trap one guy
Dat stay talk to da judge,
Da guys dat bulai bout one guy dat neva do notting bad,
No matta wat dey tell no mean notting,
Dey no goin stay.
22 Da One In Charge, da One dat wen get Abraham outa trouble, tell dis bout da Jacob peopo,
“Now, da Jacob peopo
No goin come shame no moa.
Dey no need get sked.
23 Wen da Jacob ohana peopo see dea kids aroun dem,
Da kids I wen make,
Dey goin know who me,
An ack pono cuz dey know
I stay good an spesho.
Dey goin show me respeck
Cuz I da Good an Spesho One
Dat Jacob wen pray to befo time.
Dey goin feel real sked in front me,
Da God fo da Israel peopo.
24 Da peopo dat stay all mix up inside,
Dey goin undastan.
Da peopo dat grumble,
Dey goin learn how fo figga out stuff.”