18
Wat God Tell Isaiah
Bout Da Far Away Countries Inside Africa
Bout Da Far Away Countries Inside Africa
1 ✡ 18:1: Zef 2:12Bummahs! fo da peopo inside da land
Wea da bugs stay dat make noise wit dea wings all da time,
Dat land mo far from hea den Sudan,
Wea da big rivas come togedda.
2 Dea govmen sen dea messenja guys on top da watta.
Dey go inside da kine boat dey make wit papyrus kine reed.
Eh, you messenja guys!
Go fas to dat odda country far away.
To da peopo ova dea,
Da tall guys wit smooth skin,
Erybody sked dem.
Den go from dea, go even mo far still yet.
Get one real strong peopo ova dea
Dat stay bus up erybody,
Ova dea wea da big rivas cut thru dea land.
3 God tell dis:
“All you peopo dat stay live inside da world,
Wen I put up my war flag on top da mountains,
You goin see um.
An wen da trumpet make noise,
You goin hear um.”
4 Dis da ting Da One In Charge tell me:
“I goin look down from wea I stay,
But I goin stay quiet,
Jalike da hot air look jalike stay move wit da light,
But no mo noise notting,
An jalike da watta dat stay on top da grass make one cloud
Wen come real hot wen dey cut da plants,
But stay quiet.
5 Jalike befo dey harves da food,
Wen no mo flowa awready
An da grape start fo come ripe litto bit,
God goin cut off da small branch dat no mo grape
Jalike he use da pruning shear,
Den he throw um away,
6 Eh, I stay talking bout Assyria, you know!
All dea army guys goin mahke an dea bodies stay dea,
Jalike God wen prune um.
All thru da summa time, da scavenja birds from da mountains goin eat dea bodies,
An all thru da winta time, da wild animals goin eat um.
7 “Dat time, peopo goin bring gifs
Fo Da One In Charge, Da God Ova All Da Armies.
An who goin bring da gifs?
Fo shua, dose same peopo from far places,
Da tall guys dat get smooth skin,
Dat erybody sked dem.
An from da land even mo far still yet,
Da real strong kine peopo ova dea
Dat stay bus up erybody,
Ova dea wea da big rivas cut thru dea land.
“Dey da ones goin bring gifs to Jerusalem town fo him, cuz dass da place fo find out wat kine god Da One In Charge.”