2
1 I goin go stan on top da place
Az my kuleana fo guard.
An stay dea on top da Jerusalem town wall.
I goin watch dea fo find out
Wat Da One In Charge goin tell me,
An how I can ansa him,
Cuz I wen tell him az not good wat he stay do.
Wat Da One In Charge Tell Habakkuk
(Rome 1:17; Galatia 3:11; Hebrews 10:38)
2 Den Da One In Charge tell me:
“Write down wat I goin show you.
Write big alphabets on top flat boards,
Fo one messenja guy carry da message
An run fo read um to da peopo.
3 ✡ 2:3: Heb 10:37Wat I goin show you,
Gotta wait fo da right time.
Az da trut bout da end.
No matta how slow, wait fo um.
Goin happen fo shua, but not late.
Goin come wen come.
4 ✡ 2:4: Rome 1:17; Gal 3:11; Heb 10:38“You know wat?! Da Babylon peopo get big head.
Wat dey like get, az not right.
But whoeva do wass right erytime,
He goin live fo real kine, cuz he trus me.
5 Still yet, da big head Babylon army guys no res eva.
Dey rich, az why no can trus um.
Dey greedy, jalike no mo enuff mahke guys
Fo fill up da Mahke Peopo Place.
Az why dey catch all da nations fo ony dem,
An bring um togedda fo come dea prisonas.
6 “All da nations dat da Babylon army guys take ova, dey goin start fo make fun a da big head Babylon army guys. Dey goin laugh at dem, cuz dey no mo respeck fo dem. Dey goin sing to dem dis mean kine song erybody know:
“ ‘Bummahs, fo you Babylon guys!
Dat rip off odda peopos property!
You guys wen put presha on peopo fo give you stuffs!
How long you goin make lidat an no lose um, aah?!’ ”
7 “Plenny guys owe you Babylon guys money.
An wen you tink eryting okay,
Right den an dea dey goin wake up an get mad!
Dey goin grab you guys an shake you up.
Den you goin come da ones dat get rip off!
8 Cuz you guys wen rip off plenny nations,
All da peopos dat still stay alive goin rip off you guys.
Az cuz you guys wen make peopo bleed an mahke.
An wen wipe out lands an towns an erybody inside um.
9 “Bummahs fo da Babylon guys dat build fancy houses fo dem,
But dey rip off odda peopo fo do um!
Jalike dey one bird dat put dea nes up high,
Fo make shua nobody hurt him!
10 You wen make one plan dat goin make shame fo yoa ohana.
You plan fo wipe out plenny peopos,
But you ony goin jam up yoa life!
11 Jalike da stones inside da wall goin yell fo poin finga you.
An da raftas inside yoa ceiling goin tell same ting.
12 “Bummahs, fo you guys dat kill peopo
Fo grab da powa fo build one town.
You guys do crooked kine stuff
Fo put yoa town togedda how you like!
13 Look! Fo shua, Da One In Charge, da God Ova All Da Armies,
He make dis happen:
Da peopos bus ass,
But wat dey build ony goin burn up.
Dey goin come real tired fo notting!
14 ✡ 2:14: Isa 11:9Cuz jalike da watta fill up all da oceans,
All da peopo dat fill up da world goin know
How awesome me Da One In Charge stay!
15 “Bummahs, you guys dat make
Da nations aroun you drink yoa wine!
You make um come piloot,
Fo show um how huhu you stay.
Cuz you like look dea naked bodies!
16 You da ones goin lose face!
No way wat you do
Goin make you guys look awesome!
Now az time fo you guys suffa!
So drink, an show erybody
Dat you no mo da cut skin mark
Dat da peopo a Da One In Charge get!
Da One In Charge goin use his powa
Fo make you drink from his cup.
Dat mean you goin get plenny trouble!
Befo time, you guys was awesome, but now you shame ony!
17 You guys was wrong
Da time you wen cut down da Lebanon trees!
Now peopo goin cut down you guys.
An cuz you guys wen wipe out da wild animals ova dea,
You guys goin come real sked, jalike da animals was sked.
Cuz you wen make peopo bleed an mahke,
An wen wipe out lands an towns an erybody inside um.
18 “Peopo carve tiki kine gods,
But da idols no can do notting fo dem!
One metal kine god ony can bulai!
Da guy dat make um trus da ting he wen make!
He make idol kine gods dat no can even talk.
19 Bummahs, fo da guy dat tell one piece wood, ‘Go come alive!’
O tell one stone dat no can talk, ‘Wake up!’
You tink da wood can tell you wass good fo you do?!
Da idol get gold an silva all ova, but no mo life inside.
20 But Da One In Charge, he stay inside da Temple dat stay spesho fo him.
Shhh! Eryting on top da earth gotta stay quiet in front him.”