1 I look one mo time, an dea in front me get one roll up paypa dat stay fly!

2 Da angel messenja guy aks me, “Wat you see?”

I tell him, “I see one roll up paypa dat stay flying. Da paypa thirty feet long, an fifteen feet wide.”

3 An he tell me, “Dis paypa tell wass da kahuna dat Da One In Charge goin put on top all da peopo in da whole land. Da paypa tell on top one side dat erybody dat rip off stuff gotta get outa da land. An on top da odda side tell dat erybody dat bulai wen dey make one strong promise, dey gotta get outa da land.” 4 Da One In Charge, da God Ova All Da Armies, tell, “I wen sen out dis paypa fo put kahuna on top da house a erybody dat rip off stuff, an erybody dat bulai wen dey make one strong promise an use my name. Da kahuna goin stay on top dose houses an wipe um out, even da wood an da stones.”

5 Den da angel guy dat stay talk wit me come out an tell me, “Look up! See wass dis, dat stay show up!”

6 I aks, “Wass dat?”

He tell, “Az one big basket fo measure stuff. Dis show you da bad kine stuff dat da peopo all ova da land stay do.”

7 Den da angel guy lif up da lead cova, an inside dea, get one wahine stay sit inside da basket! 8 He tell, “Dis one, her name, ‘Do Wass Wrong.’ ” Den he push her back inside da basket, an push da heavy lead cova down on top um.

9 Den I look, an dea in front me get two wahines dat stay flying an da wind stay blowing thru dea wings. (Dey get wings jalike da stork bird.) Dey lif up da basket wit da earth undaneat um an da sky ova um.

10 Den I aks da angel guy dat stay talk to me, “Wea dey goin take da basket?”

11 He tell, “Dey stay take um da Babylon land. Ova dea, dey goin build one temple fo um. Wen stay ready, dey goin put da basket on top one base.”