16
1 Peopo, dey make dea plan howeva dey tink,
But da right words come from Da One In Charge.
2 Erybody tink notting wrong
Wit da way dey live.
But Da One In Charge, he know eryting inside peopo,
How come dey tink how dey tink,
An he know if good o bad.
3 Eryting you do, turn um ova to Da One In Charge fo help you.
Den all da tings you make plan fo do
Goin come out okay.
4 Eryting dat Da One In Charge make,
He know fo shua how come he make um.
He even make da bad kine peopo
Fo da bad kine tings happen to dem
Wen da right time come.
5 Erybody dat ack high makamaka kine,
Dey pilau, da way Da One In Charge see um!
Fo shua dey goin get punish bumbye.
6 Wen you stay real tight wit peopo,
An you da kine guy dey can trus,
Fo shua, peopo goin know
Dat God let you go awready
Fo da tings you wen do agains him.
Wen you stay sked a Da One In Charge,
Fo shua, you goin change
An no do bad kine stuff no moa.
7 Wen Da One In Charge like da way you live,
Even wen peopo stay agains you,
Da One In Charge goin make dem tink diffren bout you
So eryting goin come good wit you an dem.
8 If you ony get litto bit stuffs,
But you stay do da right ting,
Dass mo betta den wen you make plenny money
An no do wass right fo peopo.
9 Peopo make plan
Fo how dey goin live.
But Da One In Charge, he da One
Make da real plan, wat dey goin do.
10 Wen da king talk,
Az cuz he know wat God like um fo do.
Dass why no good he jam up
An no judge peopo da right way.
11 Da scales you use fo weigh stuff,
Fo Da One In Charge, dey gotta be right.
Eryting you use fo measure stuff,
Az his kuleana.
12 Wen peopo do bad kine stuff,
Da king know az pilau.
Fo his govmen stay long time,
Erybody gotta do wass right.
13 Wen peopo talk to king guys bout da right tings,
Dat make da king guys stay good inside.
Anybody talk fo real kine to da king guys,
Da king guys get love an aloha fo dat kine guy.
14 Wen da king come huhu,
Az jalike he stay sen messenja guys
Fo tell you, you gotta mahke.
But if you da kine guy dat know wat fo do erytime,
You goin make da king come so notting bodda him.
15 Wen da king face look nice,
Dat mean he like you an you goin live long time.
Wen he like wat you do,
Az good fo you, az jalike da clouds
Dat bring rain jus da right time.
16 Fo learn how fo know wat fo do erytime,
Fo shua, az mo betta den get plenny gold!
Fo find out how fo undastan stuff,
Az mo betta den fo get silva.
17 Da peopo dat stay do wass right,
Dey no do bad kine stuff.
Jalike dey walk on top one road
An go aroun so dey no go by one bad place.
Whoeva stay watch how he live
He take good kea his life.
18 You ack big head,
Den, you goin come wipe out.
You tink high makamaka kine,
Den, you goin fall down.
19 Mo betta be da kine guy
Dat can hang out wit peopo dat no mo notting,
Cuz he know inside, he no gotta be Numba One.
No good, be da kine guy
Dat hang out wit da guys dat ack high makamaka,
An share all da stuffs dey rip off from odda peopo.
20 Anybody lissen real good
To da guys dat know wat fo do erytime,
Dey goin come out okay.
Anybody stay trus Da One In Charge,
Dey can stay good inside.
21 Wen one guy tink good
An know wat fo do erytime,
Peopo goin tell, “Eh, dat guy undastan plenny!”
Da guy know how fo talk nice kine,
Peopo goin lissen him.
22 Da kine peopo dat tink befo dey do stuff,
Dey get good kine life all da time,
Jalike wen da spring watta come outa da groun all da time.
But fo da stupid head kine peopo wit attitude,
Fo punish dem, God make um stay stupid.
23 Da kine guy dat tink befo he talk,
He know wat fo do erytime,
An cuz he undastan how come tings happen,
He goin tell da right ting.
Wen one guy know how fo talk good lidat,
Mo plenny peopo goin lissen wat he tell um.
24 Wen you talk to peopo
An make um feel real good inside,
Dass jalike fresh honey.
Taste sweet
An make da body come good.
25 ✡ 16:25: Smart 14:12Get some way dat look jalike az da right way fo all dem go,
But bumbye dey goin end up inside da Mahke Peopo Place.
26 If da worka guys feel hungry, den help dem,
Cuz den dey work mo hard fo pau da job,
Fo dem eat.
27 Da good fo notting kine guys,
Dey like dig up bad kine stuff bout odda peopo.
Den dey tell wat dey wen find out,
An dat hurt da odda peopo, jalike fire dat burn!
28 Da kine guy dat like jam up eryting,
He make erybody like beef each odda.
Da kine guy ony grumble an talk bad,
He split up good frenz.
29 Da kine guy dat like bus up peopo,
He trick odda peopo fo make dem come jalike him,
An make um go da way dass not good fo dem.
30 Somebody dat make sly kine eyes,
Show he make one plan fo rip off somebody.
Somebody dat make chocho lip,
Show he stay ready fo do one bad ting he tink bout.
31 Gray hair, az jalike one nice haku lei fo da head
Fo da ol peopo, fo show how awesome dem.
Fo get um,
Az good you do wass right erytime!
32 If you can stay so notting bodda you,
Az mo betta den be one guy dat can fight good.
If you can come so notting bodda you wen you stay mad,
Az mo betta den take ova one big town.
33 Wen you pull straw
Fo find out wat fo do,
Az Da One In Charge make um come out
Da way dey come out.