47
Agains Da Filisha Peopo
1 ✡ 47:1: Isa 14:29-31; Ezek 25:15-17; Joel 3:4-8; Amos 1:6-8; Zef 2:4-7; Zek 9:5-7Dis anodda message from Da One In Charge fo Jeremiah, da guy dat talk fo Da One In Charge, bout da Filisha peopo. Dis message come befo da Egypt king guy Pharaoh attack Gaza town. 2 Dis wat Da One In Charge tell:
“Look! da army guys stay come from da north side!
Jalike one flash flood stay come!
Danger, da stream goin come,
Cuz goin run all ova da place!
Goin run all ova da land an eryting inside um,
All ova da towns, an da peopo dat live inside um.
Da peopo goin yell loud cuz dey no can handle.
Erybody inside da land goin cry jalike somebody mahke!
3 Wen da peopo hear da horses running, dey goin yell,
Wen da war wagons come, da groun goin shake an da peopo goin feel um.
Da muddah-faddah guys no goin do notting fo help dea kids.
Dey lose fight cuz dey no can do notting.
4 Cuz dis da time awready
Fo wipe out da Filisha guys.
Fo wipe out all dea guys dat still stay alive,
So dey no can help da Tyre peopo an da Sidon peopo.
Da One In Charge stay ready fo wipe out da Filisha peopo,
Da ones dat come from Crete Islan. 5 Da Gaza peopo goin shave dea head cuz dey stay sad inside.
Da Ashkelon peopo goin come wipe out.
You odda Filisha peopo
Dat still stay alive inside yoa valley,
How long you goin cut yoa body
Fo show you stay sad inside?”
6 Da Filisha guys tell,
“Ho! Da armies dat stay come,
Dey jalike one sword Da One In Charge use.
How long da sword goin kill peopo?
Da sword no goin go back inside da sword bag.
No go kill nobody no moa!
You no like res, o wat?!”
7 But no way dat sword goin res,
Cuz Da One In Charge still get work fo um do.
Da sword goin go afta da peopo inside Ashkelon
An odda seaside towns.