5
God Da Judge Fo Da Israel Peopo
1 Da One In Charge tell,
“Lissen, you pries guys!
Lissen good, all you Israel ohana peopo!
An lissen, you king an yoa ohana!
Wat da judge tell stay agains you guys:
You guys wen lead peopo to one trap Mizpah side.
An az jalike you spread out one net fo catch peopo at Mount Tabor.
2 Da guys dat like fight me,
Dey kill plenny peopo.
But I goin punish all a dem.
3 I know eryting bout you Efraim peopo.
You Israel peopo,
You guys no can hide notting from me.
You Efraim peopo, you fool aroun plenny.
You Israel peopo do plenny pilau kine stuff.
4 Da Israel peopo stay do bad kine stuff,
An dat make um so dey no come back by me, dea God.
Cuz inside, dey ony like fool aroun wit odda gods.
Dey donno me, Da One In Charge.
5 “Da Israel peopo get big head,
Dat show dat dey get da blame.
Da Efraim peopo an da odda Israel peopo,
Jalike dey trip an fall down wen dey do bad kine stuff.
An da Judah peopo trip an fall down wit dem.
6 Wen dey go wit dea sheeps, goats, an cows,
Fo find me, Da One In Charge,
Dey no goin find me.
Cuz I wen bag from dem awready.
7 Me, Da One In Charge, I no trus dem,
Cuz dey go agains me.
Dey born kids dat no mo da right fo be my kids.
Cuz a dat, wen dey make da spesho religious kine ceremony fo da new moon,
Dey goin come wipe out, an dea property too.
8 “Blow da sheep horn trumpet inside Gibeah!
Blow da metal trumpet inside Ramah!
Yell fo fight inside Bet-Aven!
Lead da army guys, you Benjamin guys!
9 Da Efraim land goin come all wasted
Wen I punish dem.
I goin tell da Israel ohanas
Wat fo shua goin happen.
10 Da Judah leada guys ack jalike da steala guys
Dat move da stones dat show wea da edge a one field stay.
I goin come real huhu wit dem
I goin hit um
Jalike one wattafall.
11 Da Efraim peopo goin get plenny presha.
Jalike I walk all ova dem wen I judge um.
Dey make up dea mind fo do wat da idol kine gods tell um fo do.
12 Me, Da One In Charge goin wipe out da Efraim peopo,
Jalike da moth wipe out one wool blanket.
An I goin make da Judah peopo come weak
Jalike rotten wood.
13 “Wen da Efraim peopo an da Judah peopo
Wen see dey sick,
Den da Efraim peopo wen go Assyria side
Fo tell da strong Assyria king help dem.
But he no can help you guys.
He no can make yoa sores come pau.
14 Cuz az me, Da One In Charge,
Dat punish Israel an Judah.
I goin be jalike one lion dat attack da Efraim peopo.
Jalike one lion dat go agains da Judah ohana.
I goin bus dem up, den go way.
I goin drag dem wit me, an no mo nobody goin free um up.
15 Den I goin go back my place,
Till dey know dat dey da ones get da blame.
Den dey goin turn to me.
Cuz dey get trouble, dey goin try real hard fo come tight wit me.”