11
Yaubada ina bodao,
moe Isileli tubunao, geya ikataedita
moe Isileli tubunao, geya ikataedita
1 Tauna manakae? Yau abobóbwara bego Yaubada ina bodao ikataedi? Geya, geya toina!†a Vin 26:44; 1Sa 12:22; Sam 94:14; Yer 31:37, 33:24-26. Yau nakae Isileli tubuna tayamo nakae Eberamo tubuna tayamo, guna dala Beniyamina,‡ Guna dala Beniyamina: Yakobo natuna tayamo yoina Beniyamina. Niga Beniyamina tubunao adi dala yoina Beniyamina.†b 2Ko 11:22; Pil 3:5. e Yaubada geya ikataeguta. 2 Kai Yaubada ina bodao boi igimiyaagoima geya ikataemeta geya. Manakae? Geya koyagoiyeta Gínina Kimaasabaina manakaena ilatuwokoida Eliyau manuna? Eliyauyana Isileli tubunao ikaukulukuluidi Yaubada yaina, idigo kana,
3 ‘Yauwe, im tokabivalavalayao bogina sikaumatedi. Im kaba kasala bogina sitauwedi. Yau aguta akaaiyaka go, siluusalegu bego sikaumategu.’
1 Tolovina 19:10,14
4 Go moe nakae geya moitamo geya, go sem Yaubada manakaena ikatumapu? Tauyana kana,
‘Toinigu manugu koroto ana badabada ainima aiyuwo tausani (7,000) ayatoidi. Tauyadi geya sisakululuta yaubada polapola Baala‡ Baala: Ame yaubada polapola tayamo yoina. Boi toni kasa Kenani goi sikaaiyaka Baalayana yaina sisakululu. Idi nuwonúwana bego Baalayana ivaitedi, nakae kúwana be bou ietunedi sima. yaina goi.’
1 Tolovina 19:18
Moeko goi tagite Eliyau geya anetava ikaaiyaka geya, go sem boda gagaina nava sikaaiyaka Yaubada yaina sisaakululu. 5 Tauna ame tuta nakae; Yaubada ina bodao ama taiyuwomo kaakesaima nava kanumisa. Tauyama Yaubada ina kanuwóiya goi ikinavema. 6 Neta ina kanuwoiyayana goi ikinavema, e moe nakae geya ima guinuwa goi geya, govila bei anuwoiyayana moe geya anuwóiya toina geya.
7 Tauna moe manuna manakaeda? Isileli tubunao liliudi enao siilusale bego kidi kiboobosidi Yaubada matana goi go, geya sibabaneyeta. E kidi go kiinavaidi aditava sibabane. Kidi go madabokidiyadi sikesa, e Yaubada ikaukasedi.† Rom 9:30-31. 8 Moe nakae Gínina Kimaasabaina ana talavaita idige kana,
‘Yaubada nukotodi ikiwowonidi.’
Aiseya 29:10
Aiyuwoina kana,
‘Tuwo matadi geya itoboinedita sigita. Taiyadi geya itoboinedita sinove. Moe nakae ana kadókana ame tuta.’
Atukeda 29:4
9 Devida ina kawanoi Yaubada yaina tauyadi adi liuna manuna nakae, idigo kana,
‘Idi káika kuguinūwe go,
aikayana moe bei síkwana nakae yaidi,
o aba katumásina nakae yaidi,
o aba kapusi nakae yaidi,
o adi liuna nakae yaidi goi.
10 Nuwodi kukiwowonīdi,
bei geya itoboinedita siyagoi.
Go kukiwowonīdi.’
Same 69:22-23
Isileli tubunao idi kapipilova pasina
Totuyoyowo adi yava sibabane
Totuyoyowo adi yava sibabane
11 Tauna manakae? Yau abobóbwara Yaubada Diyuu isapakoidi bego sikapusi vata? Geya, geya toina! Go sem kidi idi kapipilova goi Totuyoyowo adi yava isowóduwo, e bei Diyuuyadi simatakikivedi. Tauna bei latuwodi Guyau sinumise. 12 E idi kapipilovayana goi da poyapoya adi dedevina sibabane o tadigo kada, ‘Diyuu idi sou Yaubada matana goi pasina Totuyoyowo adi dedevina sibabane.’ Tauna tutayana Diyuu adi badabada ana toboine sikaluvilamna sina Yaubada yaina, e adi dedevinayana gagaina toina bei sibabane!
13 E komi Totuyoyowo nuumisaimi alatuuwokoimi konōve. Yau Yeisu ina vamoléyana Totuyoyowo asa liliudi yaidi goi, tauna yau guna kawoi Yaubada iivinigu akilagasi. 14 Latuwogu neta itoboinegu, amo tauyadi toinigu ikaikaigu sigite kaga Yaubada iguuinuwe komi Totuyoyowoyami nuumisaimi yaimi, bei simatakikivemi be guna paisewayana pasina maniyedi adi yava sibabane. 15 Guna nuwonúwana ame nakae: Diyuu Yaubada sikatae. Ago idi kataeyana pasina da poyapoya ikabivekovekomneidi, tauna nava tutayana Diyuu iuyaonemneidi, moe ana kaigigita tauyadi tokámasa yaidi goi sitaoyamna maa yawoidi.
16 E aba gita tayamo aguinuwe bei koyagoi Yaubada ina bodao Diyuu bei iuyaonemneidi. Dibayoya ana tuta goi kai Diyuu ima witi kakauvetevete parawa kaodugu. Moe kakabi bego kagabu go, parawayana kanaapoivina giyaina vakuumgoina kakimasabe Yaubada umana. E moe nakae parawayana madabokina kimaasabaina Yaubada umana. Nakae neta alova lamna kimaasabaina Yaubada umana, e laonina nakae kimaasabaidi Yaubada umana. Ana yagoina moe Yaubada boi nimatu Diyuu ima tomoyamoyayao gagaidi‡ Diyuu ima tomoyamoyayao gagaidi: Ame nakona Eberamo, Aisake be Yakobo iidigedi. iuyaonedi, tauna ame tuta nakae kita tubudiyao iuyaoneda.
17 E alovayana oribe toina moe Isileli tubunao nakae go, laonina maniyedi Yaubada ikiguyalidi ikalavedi. Ago komi Totuyoyowo nuumisaimi oribe alovaina woiwoi laonina nakae ikabimi, e Yaubada ina kalovayana goi isavimi, tuwo komi nakae itoboinemi lamna bwaena dedevina toina konim. 18 Tauna taabu kogagāgasa láwana taguuyalidi yaidi! Go neta kogágasa, konuwāisi komi geya lam koovanim geya, go sem lamyana moe komi ivaanimmi.
19 E tuwo nakona komi Totuyoyowoyami nuumisaimi bei kogágasa, kodigo kami,
‘Yaubada ina kalova laonina maniyedi ikiguyalidi bego itoboine alovayana goi isavima.’
20 Nakae go, tauyadi geya idi numisamo pasina ikiguyalidi go, komi imi numisa goi kotaoyakavata. Taabu konuuwatūe, go sem koomatōita! 21 Neta alova laonina toidi ikiguyalidi unana geya sinumiseta, e komi saavinimi nakae. Neta geya konumiseta, bei ikiguyalimi.
22 Tauna Yaubada ina yabobona be nakae ina lovina moumouna manudi konuwolelēu. Ina lovinayana moumouna kidi bogina siikapusi bei silotowo. Go neta komi ina yabobona goi kokaaiyaka, e ina yabobonayana bei kolotowo. Ina yabobonayana goi kokaaiyāka, govila bei komi nakae italayaulemi. 23 E amo Diyuuyadi nakae. Yaubada bogina italaidi sisou go, neta Guyau sinumise, e aiyuwoina ina kalovayana goi isavidi. Moitamo. Tauyana itoboine aiyuwoina isavimneidi. 24 Neta itoboine komi Totuyoyowo nuumisaimi oribe alovaina woiwoi laonina nakae ikabimi, oribe alovaina toina goi isavimi, e tayagoi itoboine toina lawanayadi boi itaalaidi, ikabimneidi, toinidi idi kalovayana goi isavimneidi.
Yaubada aba numisa, e Isileli tubunao
mooitamoidi liliudi adi yava bei sibabane
mooitamoidi liliudi adi yava bei sibabane
25 Moitamo bei isavimneidi. Segowo, geya latuwogu bego Yaubada ina nuwogau ame kotamogemogeye, govila bei mami nuwatue toinimi imi nuwonúwana goi konuwonúwana komi tonanamsa. Nuwogauyana ame nakae: Bego Isileli tubunao maniyedi yaidi goi dabakasa ikaaiyaka ana kadókana Totuyoyowo adi duduwo bogina ikavava. 26 Moe nakae Isileli tubunao liliuudi bei adi yava sibabane nakae Gínina Kimaasabaina ina talavaita kana,
‘Toyavayana Saiyoni‡ Saiyoni: Nakona ame livalayana ana yagoina aiyuwo. Tayamo ana yagoina moe Diyuu. Tauna Toyava Diyuu goi bei ima. Aiyuwoina ana yagoina nakona moe yábana, tauna yabanayana goi bei ima. goi bei ima
Yakobo tubunao idi kaoliliwo Yaubada yaina ikabidi inavedi.
27 Ame yau guna kanasíuna yaidi goi
tutayana idi goyo akabidi anavedi.’† Yer 31:33-34.
Aiseya 27:9, 59:20-21
28 Nuwonúwana aiyuwo sisowóduwo. Kidi Diyuuyadi Vala Dedevina sikatae, tauna kidi Yaubada ina kaleyayao go, moe Totuyoyowo adi dedevina manuna. Aiyuwoina Diyuuyadi kina Yaubada ikinavedi ina bodao, e imatakoiyedi boi tubumao pasidi. 29 Kaga unana? Yaubada ina yabobona be ina duduwo geya itoboineyeta ikuliuyedi. 30 Guna nuwonúwana ataligei. Boi mainao komi Totuyoyowo nuumisaimi Yaubada kokapipilave go, ame tuta kidi Diyuu idi kapipilova pasina inuwokapisiyemi. 31 Diyuu nakae; ame tuta sikapipilova bego ami nuwokapisiyana pasina nakae Yaubada bei inuwokapisiyedi. 32 Ana kaigigita madabokida, Diyuu be Totuyoyowo, iyoisida, deri goi ivaisiuda go, deriyana moe ida kapipilova nakae. Moe iguinuwe bego tomota liliuuda inuwokapisiyeda.
33 O Yaubada ina nanamsa be ina yagoina sivakaigaga be nakae nikuunikudi! Ina takínona be nakae ina kenao geya itoboinedeta tayagoidokoidi!† Sam 92:5; Ais 40:28, 55:8; Kol 2:3. 34 Gínina Kimaasabaina nakae idige kana,
‘Avatau itoboine Yauwe nukotona iyagoi?
Geya vatau tayaamo!
Aiseya 40:13
Avatau itoboine Tauyana iliwole?
Geya vatau tayaamo!’
Iyobi 41:11
35 Tuwaina kana,
‘Avatau igimikaiguyau Yaubada yaina
bego itoboine Yaubadayana iyotuli?
Geya!’
Iyobi 41:11
36 Moe moitamo. Kaga liliuna Tauyana nimana goi sima, ina togaga goi sikaaiyaka be nakae dogoiyadi moe toinina manuna.†a 1Ko 8:6; Kol 1:1; Ibe 2:10. Tauyana aba taimámina ame tuta nakae tuta simamaima!†b Rom 16:27; Epe 3:21; 1Ti 1:17; Yud 1:25; Nuw 5:13.
E nakae!
†a11:1 Vin 26:44; 1Sa 12:22; Sam 94:14; Yer 31:37, 33:24-26.
‡11:1 Guna dala Beniyamina: Yakobo natuna tayamo yoina Beniyamina. Niga Beniyamina tubunao adi dala yoina Beniyamina.
‡11:4 Baala: Ame yaubada polapola tayamo yoina. Boi toni kasa Kenani goi sikaaiyaka Baalayana yaina sisakululu. Idi nuwonúwana bego Baalayana ivaitedi, nakae kúwana be bou ietunedi sima.
‡11:16 Diyuu ima tomoyamoyayao gagaidi: Ame nakona Eberamo, Aisake be Yakobo iidigedi.
‡11:26 Saiyoni: Nakona ame livalayana ana yagoina aiyuwo. Tayamo ana yagoina moe Diyuu. Tauna Toyava Diyuu goi bei ima. Aiyuwoina ana yagoina nakona moe yábana, tauna yabanayana goi bei ima.
†11:27 Yer 31:33-34.
†11:33 Sam 92:5; Ais 40:28, 55:8; Kol 2:3.
†a11:36 1Ko 8:6; Kol 1:1; Ibe 2:10.
†b11:36 Rom 16:27; Epe 3:21; 1Ti 1:17; Yud 1:25; Nuw 5:13.