9
Yeisu topem ikideedevine tetelina:
Mana lovina tomota idi goyo inuwootaoidi tetelina
Mana lovina tomota idi goyo inuwootaoidi tetelina
(Maki 2:1-12; Luke 5:17-26)
1 Tuwo Yeisu mana tovatotowanayao oga goi sisowoyamna sisaidámana sina toinina ina kasa goi‡ Toinina ina kasa goi: Ame Kapaneumi. sivaiu sisou. 2 Go topem tayamo liyaliyaka goi iimasisi, e boda sikavale sime Yeisu yaina. Sime go, Yeisu idi numisa igite, tuwo topemyana ilatuwoko idigo kana,
‘Natugu, kwatepātu. Yau adigo kom im goyo adi nuwotao bogina kubabane.’
3 Go Yaubada ina Katukeda ana tovatulukwanayao maniyedi sikaaiyaka taudiva sibobóbwara kadi,
‘Iyaa! Amo korotoyana idigopopóita. Tauyana bego ieyaubada!’
4 Go idi nuwonuwanayana kina Yeisu bogina iyagoi, tuwo idigo kana,
‘Kaga unana nuwomi goi nuwonúwana goyogoyoidi koonuwedi bego geya itoboineguta goyo anuwotao? 5 Moitamo. Gobe ava livala ikakapu ame tauyana alatuwoko? Kagu, “Kom im goyo ana nuwotao bogina kubabane”, gea kagu, “Kutāoya, kuketōiya”? Nako ikakapu? 6 E itoboine koyagoi Tomalatomota mana lovina poyapoya goi tomota idi goyo inuwootaoidi.’
Yeisu itugavila topemyana ilatuwoko idigo kana,
‘Kutāoya, im baseko kwābi, kwaluvīla kūna im kasa!’
7 Tuwo moitamo itaoya, ina ina kasa. 8 E amo guinuwayana boda sigite, madi matoita wowooinina Yaubada ina togaga ana káeyana sikamoitamoe unana tomota togaga iivinidi.
Yeisu Madiu iiduduwe tetelina
(Maki 2:13-17; Luke 5:27-32)
9 Yeisu amo dadavayana ikalave, iketoiya inonoina go, yau Madiu‡ Madiu: Ame tauyana youyuwoina moe Livai (Luk 5:26). da Roma adi takisi ana togogo igitegu, takisi ana kaba gogo goi aatusobu apaaisewa. Tuwo Yeisu ilatuwokoigu idigo kana,
‘Madiu, kūma, kusabokuliyēgu.’
Tuwo moitamo ataoya Tauyana asabokuliye.
10 Niga Yeisu mana tovatotowanayao taiyao sima guna vada goi áika manuna. Amoko goi takisi ana togogoyao be ituli ta toogoyoidi badabadaidi sima Tauyana mana tovatotowanayao yau taiyao kakáika. 11 E kakakáika go, kidi Parisi amoko goi sikaaiyaka kai ina tovatotowanayao sigitema silatuwokoima sidigo kadi,
‘Kaga unana imi tovatulúkwana go, takisi ana togogoyao be ituli ta toogoyoidi taiyao sikakáika?’† Luk 15:1-2.
12 Go Tauyana inovedi, e idigo kana,
‘Gwa. Tauyadi madi deedevina geya latuwodi doketa, go sem kidi tokatówana latuwodi doketa. 13 E Yaubada ina livala ame kogitedōko bei koyagoi kaga ana yagoina. Livalayana kana,
“Latuwogu yoguyogu kokasaledi yau yaigu,
go sem latuwogu toina moe konuwokapisi.Ӡ Mad 12:7.
Oseya 6:6
Moe moitamo. Yau ama geya tauyadi toinidi sinuwonúwana bego kidi tokibóbwata aduduwedi geya, go sem ama toogoyoidi aduduwedi bei situgavila.’
Lumadádana diyakímwana manuna:
Lava vau sinapu vau
Lava vau sinapu vau
(Maki 2:18-22; Luke 5:33-39)
14 E Iyoni ina tovatotowanayao sima Yeisu silumadade sidigo kadi,
‘Kai be nakae kidi Parisi kadiiyakímwana Yaubada manuna go, kom im tovatotowanayao manakae geya sidiyakimoneta?’
15 Go kina Yeisu idigo kana,
‘Neta nai ana káika goi tonai koroto nava yaimi ikaaiyaka, manakae? Nai ana toyokoyao itoboinedi bei madi diyakímwana sinuwomou? Geya ae? Go sem itoboinedi madi uyáwana sikakáika ae? E diyakímwana ana tuta nava imamaima. Amo tutayana tonaiyana bei siyoisi sinave namliyeta baige tauyadi madi nuwomou sidiyakímwana. 16 E livalakaibala tayamo vatulukwana bogo be vatulukwana vau manudi avatulukoimi bei koyagoi. Ame nakae: Geya vatau tayaamo boboda vau ikabi, ana kwama bogo taaporaina goi igilumipatuko. Ame moitamo. Bobodayana bei ikatumásina, e kwama bogoyana itaisa go, ina taisayana bei gagaina. 17 Aiyuwoina geya itoboinedeta oine vau takabi, opo bogo goi tasaligogo, govila bei oine vauyana ana togaga pasina opo itapao, e oineyana idau besobeso be nakae opoyana igoyo. Go sem oine vau takabi, opo vau goi tasiwoi, e bei oine maa opoina dedevidi.’
Yeisu vevina adi taiyuwo ikidedeevinedi tetelina,
tayamo kaamasina, tayamo mana katówana
tayamo kaamasina, tayamo mana katówana
(Maki 5:21-43; Luke 8:40-56)
18 Nava amo livalayadi ilatuuwokoidi go, tayamo Diyuu idi kaba tugúguna ana tolovina ima Yeisu matana goi aena ivatugúyala idigo kana,
‘Tomoya, natugu vavina makaitaga ikámasa go, neta kūma gomanayana dabana goi nimam kuyāto, bei ma yawoina itaoyamna.’
19 Tuwo moitamo Yeisu itaoya kai ina tovatotowanayao taiyao tolovinayana kasabokuliye. 20 Kanonoina go, tayamo vavina ima. Vavinayana tala yawou aiyuwo goi ikaikaina idaudau go, nava idaudau. E tauyana ivalabelabena Yeisu mlina goi ibisibala ana kwama kikina ibisikone. 21 Ina nuwonúwana kana,
‘Neta ana kwama abisikoneyamo, bei aboboina.’
22 E kina go Yeisuyana itugavila, vavinayana igite, idigo kana,
‘Natugu, kwatepātu! Im numisa bogina ikidedevinem.’
Tuwo moitamo lava amo goi vavinayana iboboina. 23 Yeisu ivataoduwe tolovinayana ina vada goi isiu tomota igitedi kokopi siiuwedi be nakae boda simgemge sitaitáiya, 24 tuwo idigo kana,
‘Kosowōduwo kōna! Gómana geya ikamaseta, go sem ikanaamatáiya.’
Tuwo kidi tomotayadi sivaanamae go, Yeisu ivalilivedi. 25 E tutayana ivalilivedi ikavava, isiu ina vabodaupa goi gomanayana nimana iyoisi, e ikaitáoe. 26 Tuwo ame valayana boda sisanunui ina amo dadavayana ana madabokina goi tomota sinove.
Yeisu tokebo adi taiyuwo ikidedeevinedi tetelina
27 Yeisu itaoya, amo dadavayana ikalave inonoina go, tokebo adi taiyuwo sima Yeisu sisakurikuriye. Idi sakurikuriyana goi siiduduwo kadi,
‘Devida tubuna, kunuwokapisiyēma!’
28 E Yeisu vada goi isiu go, tokeboyadi nakae sisiu sima Tauyana yaina. Tuwo ilatuwokoidi idigo kana,
‘Manakae? Konumisa bego itoboinegu moe nakae aguinuwe?’
‘U, Tomoya’, tokeboyadi kaedi.
29 E tuwo matadi ibisikonedi go, idigo kana,
‘Imi numisa pasina nakae, e matami sidedevīna!’
30 Tuwo matadi sikatupailala go, Yeisu ikatumatalidokoidi idigo kana,
‘Konovēgu. Geya vatau tayaamo kolatuwōko moe dogoiyana manuna.’
31 E kidi korotoyadi sisowóduwo go, Yeisu ina livala geya sikabikaoneyeta, go sem sina amo dadavayana ana madabokina goi valena sisanunui.
Yeisu dimoni ivaatapiye tetelina
32 E Yeisu kai taiyao bego kasowóduwo kana go, tomota maniyedi matabuwodi koroto tayamo maena dimoni ikiigavile sime Tauyana yaina. Sime, Yeisu igite, dimoniyana ivatapiye isiya. 33 E ivatapiye ikavava, korotoyana itoboine ibobwara dókana. Ago boda sigite, sikainaopa kadi,
‘Geya tayaamo kaga nakae Isileli sinaena tagitegite!’
34 E kidi go Parisiyadi sikaaiyaka sidigo kadi,
‘Moe dimoni idi tolovina ina togaga goi dimoni ivataapiyedi siisowóduwo.’† Mad 10:25, 12:24; Mak 3:22; Luk 11:15.
Awanoi topaisewa manudi
35 Yeisu kai taiyao kataoya, asa liliudi giyaidi be gagaidi goi kavanibiníbita. Kavanibiníbita go, Tauyana Diyuu idi kaba tugúguna tamo tamo goi ivaatulúkwana be nakae Yaubada ina kalibúbuna Valena Dedevina itaalavaite bego tomota itoboinedi sisiu. Aiyuwoina tomota ituli ta vísiya siyooisidi be nakae tokatówana liliudi ikidedeevinedi.† Mad 4:23; Mak 1:39; Luk 4:44. 36 Ego boda iigitedi, geya adi tovaitamo sinuwokubukubu; tauyadi sipi geya adi tomatakavatamo nakae, tauna inuwokapisiyedi.† Yoy 27:17; 1To 22:17; 2Te 18:16; Isi 34:5; Mak 6:34. 37 E tuwo kai ina tovatotowanayao yaima goi idigo kana,
‘Tánuwo bogina iloboina go, todibayoya geya sibadebadeta. 38 Tauna toni tánuwo yaina goi kokawanōi bego topaisewa ietunedi sima sidibayoya.’† Luk 10:2.