23
Yeisu ana kotu Pailato be Erodi matadi goi tetelina
(Madiu 27:1-2,11-14; Maki 15:1-5; Iyoni 18:28-38)
1 Tuwo moitamo Diyuu idi tolovinayao madabokidi sitaoya, Yeisu sinave Pailato yaina goi ana kotu manuna. 2 E sima Pailatoyana goi sivatowo Yeisu siwowoko kadi,
‘Ame Tauyana kagitebabane ima boda ivasulaigidi ame nakae: Tomota isanabodedi geya sitakisita Sisa yaina. Aiyuwoina kanove idigo kana,
“Yau Guyau, Tokalibúbuna tayamo.” ’
3 E kina go Pailatoyana Yeisu ilumadade idigo kana,
‘Kom moitamo Diyuu adi Tokalibúbuna?’
‘Kom bogina kudigoyabe’, Yeisu kaena.
4 E kina go Pailatoyana Tonúwala Gagaidi be boda ilatuwokoidi idigo kana,
‘Ame korotoyana bogina adovatusiye go, agite geya ana pikwanamo.’
5 E bodayadi sikaugeogéona sidigo kadi,
‘Geya! Tauyana ina Yudiya madabokina goi ivaatulúkwana, e boda idumwamwainidi. Ivatowo Galili goi ima ameko goi.’
6 E kina go Pailatoyana idi livala inove, ilumadádana kana,
‘Manakae? Koroto ame moitamo Galili korotoina ae?’
7 ‘U, nakae’, kidi kaedi.
Tuwo Pailato bogina iyagoi bego Yeisu ina kasa moe Erodi ina kaba lovina sinaena. Amo tutayana Erodiyana nakae Yerusalema goi ikaaiyaka, tuwo Pailato ina boda ilovinaedi kana,
‘Yeisu konave Erodi yaina goi.’
Tuwo moitamo sinave tauyana yaina goi.
8 E kina go Erodiyana Yeisu igite, iuyáwana gagaina. Tuta maanawena latuwona Yeisu igite unana valena bogina inove. Tuwo iilotuta bei Yeisu aba kinana tayamo iguuinuwe igite. 9 E lumadádana goi Yeisu idoovatusi tuta maanawena go, Tauyana geya ikatumapuyeta. 10 E kidi Tonúwala Gagaidi be Yaubada ina Katukeda ana tovatulukwanayao siitaoya Yeisu kikina siwowoko gagaina. 11 E kina Erodiyana mana tovayaviyayao Yeisu sikaiwotete be sivaponuponuye. Nakae tolovina ana kwama dedevina sikabi, Yeisu sivalosi bego yaina goi sisakululu polapola. Ikavava, Erodi ina lovina goi sietunemnei ina Pailato yaina goi. 12 E Erodi be Pailato amo maliyalinayana goi bogina sivasíyana. Boi mainao sivaakaleya.
Pailato ilovina Yeisu bei ikámasa tetelina
(Madiu 27:15-26; Maki 15:6-15; Iyoni 18:39—19:16a)
13 E kina go Pailatoyana Tonúwala Gagaidi, Diyuu idi tomoyamoyayao be boda ikatuvagogudi sima 14 ilatuwokoidi idigo kana,
‘Ame korotoyana bogina kome yau yaigu kotalavaite bego tomota ivasulaigidi go, konovēgu. Tauyana bogina matami goi adovatusidoko go, geya tayaamo píkwana Tauyana yaina goi ababane. Go moe yau aguta guna nuwonúwana geya, 15 go sem Erodi nakae geya tayaamo kaga ibabane. Yeisu ietunemnei ima yaida goi. Go konovēgu. Ame Tauyana geya tayaamo goyo iguinuwe bei ámasa itoboine. 16 Tauna bei adabiyamo namliyeta ataligei yaimi goi.’
17-18 Go kidi bodayadi madabokidikova siduduwo sidigo kadi,
‘E moe Tauyana kukaumāte go, Barabasi kutaligēi manuma!’‡ Buki Kimaasabaina ana kopi maniyedi goi tomwana 17 ikaaiyaka. Go kopi aibogoidi geya ikaiyaketa. Nakona Luke geya iginiyeta, go sem tokaidámana tayamo toinina ina nuwonúwana igini. Tomwana 17 ame nakae: Ego aikayana ana tuta itoboine Pailato deri ana tokaiyaka tayamo italigei Diyuu yaidi goi.
19 Barabasiyana boi deri sivaisiu unana boi Yerusalema goi senao italewuwudi bego Roma idi lovina sikapipilavedi be nakae tomota maniyedi ikaumatedi. 20 E Pailatoyana latuwona Yeisu italigei, tuwo aiyuwoina tomota ilumadademneidi. 21 Go kidi siiduduwo kadi,
‘Kerose goi kutupatūko! Kerose goi kutupatūko!’
22 Go kina Pailatoyana sivato kana,
‘Tupatúkwana? Ame Tauyana ava goyo iguinuwe bei itoboine ikámasa? Geya tayaamo píkwana Tauyana yaina goi ababane. Tauna bei adabiyamo namliyeta ataligei.’
23 E kidi sikaugeogéona. Niyadi gagaidi goi silovina kadi,
‘Kerose goi situpatuko!’
Tauyadi sopadi imakimaki, 24 tuwo kina Pailatoyana ilovina Yeisu ikámasa idi kawanoi nakae. 25 E korotoyana ina kapipilova be ina kaumata pasidi deri goi ikaaiyaka go, Pailato italigei nakae sikawanoiye. Go Yeisu iyato boda nimadi goi bei idi nuwonúwana siguinuwe Tauyana yaina.
Yeisu kerose goi situupatuko tetelina
(Madiu 27:32-44; Maki 15:21-32; Iyoni 19:16b-27)
26 Tutayana sinavenave bei kerose goi situpatuko, enao goi koroto tayamo guma Sairini yoina Saimoni ina tánuwo goi imamaima. Imamaima go, tovayaviya siyoisi silovinae Yeisu ina kerose ikabi ikavale. Ikabi ikavale Yeisu mlina goi iiketoiya. 27 E Yeisu inonoina go, boda gagaina sisabookuliye. Bodayadi yaidi goi vevina badabadaidi kasikasidi sitututu go, sitaiyakuwokúwala Yeisu manuna. 28-29 E kina Yeisu itaoya, itugavila vevinayadi ilatuwokoidi kana,
‘Yerusalema vevinaimi, tuta simamaima bei mou gagaidi sisowóduwo, e tomota bei sidigo kadi,
“Avatauwa komi vevina neta kaagalimi o geya natumimo, ami dedevina bogina kobabane.”
Tauna taabu kotaitāiya yau manugu, go sem toinimi manumi be nakae natumiyao manudi kotāiya. 30-31 Yau geya guna pikwanamo o kada, “Yau alova mamaina nakae, tauna tomota geya itoboinedita sigabu.” Komi da Yerusalema mami píkwana o tadigo kada, “Komi alova diinalidi nakae tomota bei sigabudi.” Tuwo kerose goi bei situpatukoigu go, komi bei manakaemi? Tuta amo goi bei igoyo toina, nakae tomota geya latuwodi bei mouyadi silotowo, tauna bei sivatowo koya silatuwokoidi kadi,
“Kosōu kōma kokautūmma!” ’
Oseya 10:8
32 E toogoyoidi adi taiyuwo nakae sinavedi bei Yeisu taiyao sikaumatedi.
33 Tutayana sima asa yoina Bulubulu goi Yeisu ana kwama sivalilividi. Ikavava, kerose goi situpatuko. Ago togoyoidiyadi adi taiyuwokova nakae adi kerose goi situpatukoidi, tayamo kakataina, tayamo kekelina. 34 E kina go Yeisuyana idigo kana,
‘Tamagu, idi guinuwa goyogoyoina ame kunuwotāo. Geya siyagoiyeta kaga siguuinuwe.’
E tovayaviyayadi Yeisu ana kwama, ana sendoro, ana gadíwana sikabidi, pápala tayamo siguinuwe bei sigite avatauwa sikabidi.† Sam 22:18. 35 Ago boda siitaoya Yeisu siyookoe. E kidi go Diyuu adi tolovinayaoyadi nakae sikaoseve† Sam 22:7. sidigo kadi,
‘Bego ituli ta tomota iyavedi. Tuwo toinina iyāve, neta Tauyana moitamo Yaubada ana Vadámana, ina kinava!’
36 E tovayaviya nakae Tauyana sikaiwotete ame nakae: Sima oine bwaena yuyuyuna sitagone inim† Sam 69:21. go, 37 sidigo kadi,
‘Neta kom moitamo kidi Diyuu adi Tokalibúbuna, toinim kuyavēm!’
38 Ego Yeisu ana píkwana aisika paaevaina tayamo goi sigini, dabana diligaemaina goi situpatuko. Ana pikwanayana kana,
‘Ame Tauyana
Diyuu adi Tokalibúbuna.’
39 E kina go tokapipilova tayamo adi taiyuwo tupaatukoidi yaidi goi Yeisu itagiwoi idigo kana,
‘Manakae? Kom Guyau gea geya? Toinim kuyavēm namliyeta kai nakae kuyavēma.’
40 E kina ituli ta toogoyoina siyana ibove idigo kana,
‘Manakae? Yaubada ina liuna geya kumatoiteyeta ae? Iyaa! Kita ada liuna taababane Tauyana ana liuna nakae! 41 Ago liunayana kita itoboineda. Kita ida guinuwa ana katumapu bogina tababanedoko go, ame Tauyana geya tayaamo kaga goyogoyoina iguinuwe geya.’
42 Tuwo togoyoinayana Yeisu ilatuwoko idigo kana,
‘Yeisu, kunuwokavatēgu tutayana im tuta kuetokalibúbuna.’
43 Yeisu idigo kana,
‘Nakae bei aguinuwe, tauna ame alatuuwokoim kunōve: Ame bei guna dadava dedevina goi kom yau taiyao takaaiyaka.’
Yeisu ina kámasa tetelina
(Madiu 27:45-56; Maki 15:3-41; Iyoni 19:28-30)
44 Bogina dine, asa madabokina ikamamaníwana go, amamaniwanayana ikaaiyaka ana kadókana lavilavi. 45 Níyala ikamaamaníwana go, Tukunu Kimaasabaina Toina ana vabodaupa kaarekoina† Tat 26:31-33. ikiiseyuwe. 46 Ago Yeisu niyana gagaina goi iduduwo kana,
‘Tamagu, balomaigu nimam goi ayato!’† Sam 31:5.
E moe ibobore ikavava, yawoina ikasalave. 47 E tovayaviya adi tovakumgo igite kaga iisowóduwo, Yaubada ina togaga ana káeyana ikamooitamoe kana,
‘Moitamo. Amo korotoyana tutubeso nakae tokibóbwata.’
48 Ago tutayana Yeisu ina kámasa ana toyokoyao madabokidi sigite kaga liliuna siisowóduwo, madi nuwomou goi kasikasidi situtu go, sikaluvilamna sina idi kasa. 49 E Yeisu senao liliudi be nakae vevina boi Galili goi Yeisu sisabookuliye†a Luk 8:2-3. tupwana masigava†b Sam 88:8. siitaoya sigitegite kaga liliuna siisowóduwo.
Yeisu ana valiwoga tetelina
(Madiu 27:57-61; Maki 15:42-47; Iyoni 19:38-42)
50 Koroto tayamo yoina Iyosepa, Diyuu adi kotu ana tolovina tayamo go, koroto todedevina be tokibóbwata. 51 Iyosepayana guma Arimateya, moe Diyuu idi kasa tayamo. Tauyana Yaubada ina kalibúbuna ina sowóduwo ilootutae. Moe tauyana kotu ana tolovinayao idi nuwonúwana be idi guinuwa Yeisu yaina geya ikamoitamoedita. 52 Ame tauyana ina Pailato yaina goi ikawanoi idigo kana,
‘Manakae? Kutagona Yeisu wowona akabi avaliwoge gea geya?’
Tuwo moitamo itagona. 53 Tuwo Iyosepayana ma senao sina kerose goi Yeisu wowona sikaisobuye go, areko sikabi, wowonayana siutube. Siutube ikavava, sinave valiwoga tukubu goi sisiu siyato. Tukubuyana boi gurewa sitavi go, sinaena geya tayaamo tuta goi tokámasa siyato.
54 Ago moe Sabati ana katubayásina ana maliyalina go, níyala giyakainava bei isaliu, e Sabatiyana ivatowo. 55 E vevinayadi boi Galili goi Yeisu sisabookuliye, sina Iyosepa ma senao sisabokuliyedi, e sigite manakaedi Yeisu wowona tukubuyana sinaena goi siyato. 56 E sigite ikavava, sikaluvila idi kasa pauda mainina dedevina be pútuma dedevina sikatubayasidi Yeisu wowona manuna.
Ago Sabati goi siwaiwasi nakae Sabati ana lovina idige.† Tat 20:10; Atu 5:14.
‡23:17-18 Buki Kimaasabaina ana kopi maniyedi goi tomwana 17 ikaaiyaka. Go kopi aibogoidi geya ikaiyaketa. Nakona Luke geya iginiyeta, go sem tokaidámana tayamo toinina ina nuwonúwana igini. Tomwana 17 ame nakae: Ego aikayana ana tuta itoboine Pailato deri ana tokaiyaka tayamo italigei Diyuu yaidi goi.
†23:34 Sam 22:18.
†23:35 Sam 22:7.
†23:36 Sam 69:21.
†23:46 Sam 31:5.
†b23:49 Sam 88:8.