30
1 E Reitiyeli tuwowona igite bogina ivenátuna, natunao adi badabada adi taivasi go, kina geya tayaamo ivenatuni Yakobo manuna. Tauna tuwowona ivakipikipiye. Tuwo Yakobo ilatuwoko idigo kana,
‘Yakobo, gogómana kuvinīgu go, neta geya, bei akámasa!’
2 Tuwo Yakobo gamona igoyo ibolagu, idigo kana,
‘Manakae? Yau Yaubada nakae? Moe Yaubada ina guinuwa goi kom kukágala, yau geya!’
3 E kina Reitiyeli idigo kana,
‘Gwa, guna pákwana Bila kwābi, taiyao komasīsi, e ikéuwama, ivenátuna yau manugu. E ina venatunayana goi yau nakae bei ma natugu.’
4 Tuwo moitamo Reitiyeli ina pakonayana Bila ikabi, Yakobo ivamonene. Moe monena aiyuwoina nakae go, taiyao simasisi, e ikéuwama. 5 Ikéuwama, ivenátuna, moe Yakobo natuna koroto ivenatuni. 6 E Reitiyeli idigo kana,
‘Yaubada itakinoigu yau todedevigu. Guna kawanoi inove, e natugu koroto ivinigu.’
Moe pasina natuna ivayou Dani.‡ Dani: Ame youyana ana yagoina moe itakínona.
7 Niga aiyuwoina simasisi, e Bila ikéuwama. Ikéuwama, ivenátuna, moe Yakobo natuna koroto aiyuwoina ivenatuni. 8 E Reitiyeli idigo kana,
‘Yau tuwowogu taiyao bogina kapoikíkina Yaubada ina uyáwana manuna go, yau atogaga.’
Tuwo natuna ivayou Napatali.‡ Napatali: Ame youyana ana yagoina moe guna poikíkina.
9 E kina Reya iyagoi bogina ivenatunaupa, tuwo ina pákwana vavina Silipa ikabi, Yakobo ivamonene, e tauyana monena aiyuwoina nakae. 10 Ivamonene, taiyao simasisi, Silipa nakae ikéuwama. Ikéuwama, ivenátuna, moe Yakobo natuna koroto ivenatuni. 11 Tuwo kina Reyayana mana uyáwana idigo kana,
‘Guna dedevina bogina ababane!’
Tuwo natuna ivayou Gadai.‡ Gadai: Ame youyana ana yagoina moe ana dedevina.
12 Reya ina pakonayana aiyuwoina ikéuwama, e ivenátuna, moe Yakobo natuna koroto ivenatuni. 13 Tuwo Reyayana idigo kana,
‘Nakona vevina liliudi bei sivayokoigu uyaaonigu. Tauna auyáwana gagaina!’
Tuwo natuna ivayou Aseri.‡ Aseri: Ame youyana ana yagoina moe uyáwana.
14 Sikaiyaka, sikaiyaka, witi ana dibayoya ana tuta Rubeni ina tánuwo goi go, náuna mandareki‡ Mandareki: Isileli tubunao sinuwonúwana neta vevina sikágala, e mandareki keuwoina sikani, itoboinedi sikéuwama. ibabane bogina ikéuwo, tuwo keuwoina maniyedi iguwedi. Iguwedi ikavava, imedi sinana Reya ivini. Ago Reitiyeli keuwoinayadi igitedi, inuwonúwana kana, ‘Neta akanidi, bei akéuwama.’ Tuwo idigo kana,
‘Tuwowogu, natum ana mandareki keuwoina maniyedi kuvinīgu akáika.’
15 Go kina Reyayana ivagágala, idigo kana,
‘Kom manakae? Moe igoyo boi monegu kuneboigu. Go manakae? Ame tutayana latuwom natugu ana mandareki keuwoina nakae kuneboigu ae? Geya!’
Tuwo Reitiyeliyana idigo kana,
‘Neta keuwoinayadi kuvinigu, atagona sabamgo ame goi Yakobo kom taiyao komasisi.’
16 Tuwo moitamo lavilavi goi Yakobo tánuwo goi ima go, Reya ina ivalobode, ilatuwoko idigo kana,
‘Monegu, sabamgo ame goi itoboine yau taiyao tamasisi. Natugu ana mandareki keuwoina goi agimonem.’
Tuwo sabamgo amo goi taiyao simasisi. 17 E Reya ina kawanoi Yaubada bogina inove, tuwo ina guinuwa goi Reya itoboine ikeuwamamna. Ikéuwama, ivenátuna moe Yakobo natuna koroto ainimaina ivenatuni. 18 Ago Reyayana idigo kana,
‘Guna pákwana monegu avini bego monena nakae, tauna ame guna vaiwówana Yaubada ivinigu.’
Tuwo natuna ivayou Isakara.‡ Isakara: Ame youyana Isileli tubunao niyadi goi ana taiyakeka nakae vaiwówana.
19 E Reya aiyuwoina ivenátuna, moe Yakobo natuna koroto ainima tayamoina ivenatuni. 20 E Reyayana idigo kana,
‘Yaubada yabobona dedevina toina bogina ivinigu. Nakona ame tutayana Yakobo bei iwowoinegu unana natunao ainima tayamo bogina avenatunidi.’
Tuwo natuna ivayou Sebuloni.‡ Sebuloni: Ame youyana ana yagoina moe taimámina.
21 Niga go ivenátuna, natuna vavina, e ivayou Daina.
22 E amo tutayana Yaubada Reitiyeli inuwaisi nakae ina kawanoi inove, tuwo ina guinuwa goi Reitiyeli ina kágala ikavava. 23 Tuwo Yakobo taiyao simasisi, e ikéuwama. Ikéuwama, ivenátuna, natuna koroto, e idigo kana,
‘Guna omayamaya Yaubada bogina ikabi, inave.’
24 Kana,
‘Guna kawanoi bego Yauwe natugu aiyuwoina ivinigu.’
Tuwo natuna ivayou Iyosepa.‡ Iyosepa: Ame youyana Isileli tubunao niyadi goi ana taiyakeka nakae aiyuwoina ivinigu.
Yakobo doiyana Lebani ikaatubau tetelina
25-26 E Iyosepa ana bíbina mlina, Yakobo ina doiyana Lebani ilatuwoko, idigo kana,
‘Doiyagu, monegowo be natugowo kuvinīgu bei kana guna kasa. Guna paisewa tauyadi manudi bogina ikavava. Kom bogina kuyagoi guna paisewayana madabokina dedevina yaim. Ame tutayana kutagōna monegowo be natugowo akabidi, kana guna kasa.’
27 Go kina Lebaniyana idigo kana,
‘Doiyagu, neta kusoosalegu, e kwaiyāka yau taiyao. Bogina kuyagoi, guna kokósala goi ayagoi kom pasim Yauwe ikaipakuyegu. 28 Tuwo kwaiyāka ameko be kupaaisēwa manugu. Am maisa kulatuwokōigu bei aemaisim.’
29 Go kina Yakoboyana idigo kana,
‘Kom kuyagoi magu salau apaaisewa manum nakae guna matakavata goi im sipi sisusáila badabadaidi. 30 Kunuwaisi, boi mainao ama kom im sipi geya sibadebadeta go, ame bogina sisusáila gagaina. E kaga aguinuwe im sipiyadi manudi, e guinuwayadi pasidi Yauwe ikaipakuyem. Go manakae? Ava tuta goi bei kutagonegu bego apaisewa yau guna bodao manudi?’
31 Tuwo kina Lebaniyana idigo kana,
‘Kaga latuwom avinim?’
E Yakoboyana idigo kana,
‘Geya tayaamo kaga latuwogu kuvinigu, go sem neta dogoi tayamo bei alatuwokoim kuguinuwe, bei akaaiyaka im sipi amatakavatedi. 32 Dogoiyana ame nakae: Ame bei im yoguyoguyao akiwotaidi gúguna aiyuwo. Gúguna tayamo sipi be goti wowodi kaupolapolaidi be nakae lami wowodi kalaakovidi kaka. Go gúguna tayamo sipi wowodi poowoudi kaka be nakae goti wowodi kalaakovidi kaka. E niga tutayana sivenátuna, ava yoguyoguva wowodi kaupolapolaidi, e moe yau guna yoguyoguyao.‡ Isileli tubunao sinuwonúwana sipi dedevidi neta wowodi poowoudi kaka go, goti dedevidi neta wowodi kalaakovidi kaka. Ago neta wowodi kaupolapolaidi moe tupwana dedevina. 33 Nava bei itoboinem guna yoguyoguyao kugitedi, e bei kuyagoi yau guna guinuwa yaim moe akibobosidoko gea geya. Neta guna yoguyoguyao yaidi lami tayamo o goti tayamo kubabane wowona poowouna kaka, bei kuyagoi yoguyoguyana avainao kom yaim.’
34 Lebaniyana kana,
‘Dedevina! Kaga liliuna kuudigedi bei taguinuwedi.’
35 Go amo maliyalinayana goi Lebani doiyana Yakobo geya inumiseyeta, tauna ame nakae iguinuwe: Tauyana ina gotiyao bolamo wowodi neta sabasabaidi o kaupolapolaidi be ina gotiyao bovavina liliudi neta wowodi sabasabaidi o kaupolapolaidi go, poowoudi be nakae ina lamiyao kalaakovidi ikabidi, natunao ivinidi simatakavatedi. 36 E ilatuwokoidi sikabidi maliyalina aito nakae sinavedi. Go Lebani ina sipiyao wowodi poowoudi kaka be ina gotiyao wowodi kalaakovidi kaka Yakobo imatakavatedi.
37 E sipiyadi be gotiyadi Yakobo igitedi, bogina iyagoi. Tauna itaoya ina alova aito‡ Alova aito: Ame alovayadi ana dimdim yoidi poplar, almond be plane. Go alovayadi adi kaigigita nakae kobuluwo, taniya be vivi. laonidi badabadaidi italaidi. Italaidi, imedi iseselitaotaoidi. Ina sesalayana ame nakae: Sakava maniyena iseselidi go, maniyena geya. Tauna alovayadi sabasabaidi. 38 Iseselidi ikavava, laonidiyadi ikabidi, yoguyogu idi kaba nim goi ivataoedi. Ego tutayana yoguyoguyadi sima bwae sinim, siiváunuwo.‡ Siiváunuwo: Ame ana yagoina moe yoguyoguyadi sivadimémala. 39 Tuwo nakae iguuinuwe. Yoguyoguyadi sima bwae goi, e laonidiyadi sigitedi sikatonoidi, e siváunuwo. Niga sivenátuna natudiyao wowodi kaupolapolaidi o sabasabaidi.
40 E tutayana sivenátuna, natudiyao ikiwotaidi gúguna ituli. Ego yoguyogu gagaidi ikabidi, imedi yoguyogu kaupolapolaidi matadi goi sikaaiyaka. Tutayana siváunuwo yoguyogu kaupolapolaidi kaka sigitedi sikatonoidi, e bei sivenátuna, natudiyao kaupolapolaidi. E tauna ame nakae kenaoyana goi Yakobo ina yoguyoguyao ivaituwedi sibadabada go, Lebani geya. 41 E ava yoguyoguva neta bobíbina siváunuwo, e laonidiyadi Yakobo ivataoedi idi kaba nim goi bego sigitedi sikatonoidi. 42 Go ava yoguyoguva neta bagabagaidi siváunuwo, e laonidiyadi geya ivataoedita. Tauna Lebani ina yoguyoguyao bagabagaidi go, Yakobo ina yoguyoguyao bobíbina.
43 Moe nakae tauna Yakobo iguyau gagaina. Ina sipiyao be nakae ina gotiyao badabadaaidi. Aiyuwoina ina pakonayao koroto be vevina be nakae ina kameriyao be ina ase badabadaaidi.
‡30:6 Dani: Ame youyana ana yagoina moe itakínona.
‡30:8 Napatali: Ame youyana ana yagoina moe guna poikíkina.
‡30:11 Gadai: Ame youyana ana yagoina moe ana dedevina.
‡30:13 Aseri: Ame youyana ana yagoina moe uyáwana.
‡30:14 Mandareki: Isileli tubunao sinuwonúwana neta vevina sikágala, e mandareki keuwoina sikani, itoboinedi sikéuwama.
‡30:18 Isakara: Ame youyana Isileli tubunao niyadi goi ana taiyakeka nakae vaiwówana.
‡30:20 Sebuloni: Ame youyana ana yagoina moe taimámina.
‡30:24 Iyosepa: Ame youyana Isileli tubunao niyadi goi ana taiyakeka nakae aiyuwoina ivinigu.
‡30:32 Isileli tubunao sinuwonúwana sipi dedevidi neta wowodi poowoudi kaka go, goti dedevidi neta wowodi kalaakovidi kaka. Ago neta wowodi kaupolapolaidi moe tupwana dedevina.
‡30:37 Alova aito: Ame alovayadi ana dimdim yoidi poplar, almond be plane. Go alovayadi adi kaigigita nakae kobuluwo, taniya be vivi.
‡30:38 Siiváunuwo: Ame ana yagoina moe yoguyoguyadi sivadimémala.