34
Yauwe Isileli tubunao ikanasiukoomneidi tetelina
1 E Yauwe ilatuwokoigu idigo kana,
‘Gurewa aiyuwo kwabīdi, kumadagīdi paaevaidi nakae boi avinim go, kukauvisivisidi, e bei yatadi goi guna livalayadi aginidi. 2 Go kwatubayāsi bei itomo nobuyana Sainai Koyaina goi kutūko kūma bei koyayana yatana goi kuvalobodegu. 3 Go geya vatau tayaamo taiyao kotūko komamāima. Nakae geya vatau tayaamo kutagōne koyayana goi ikaaiyaka. Yoguyogu nakae. Taabu koyayana unana goi sikaaiyāka sikakāika.’
4 Tuwo moitamo, ana gurewa aiyuwo akabidi amadagidi paaevaidi boi gurewayadi nakae. Ikavava, vanuwo itomo nobuyana giyaina ataoya, e gurewayadi aiyuwo nimagu goi akavaledi Koya Sainai goi atuko nakae Yauwe bogina ilatuwokoigu. 5 E Yauwe gaota sinaena goi isou ima kikigu itaoya go, toinina yoina italavaite kana,
‘Yau Yauwe.’
6 E Yauwe ivatabale matagu goi italavaita idigo kana,
‘Yauwe, Yau Yauwe.
Yau Yaubada nuwokaapisigu be kanuuwoiigu.
Ameesayágana.
Guna lokata ivakaigaga
be nakae Yau aba numisa toigu.† Yoy 14:18; Atu 5:9-10, 7:9-10; Nie 9:17; Sam 86:15, 103:8, 145:8; Iyl 2:13; Iyn 4:2.
7 Guna lokatayana tomota yaidi ikaiyako vata.
Tomota idi tapepeko, idi kadoinana
be nakae idi bágala anuwootaoidi.
Go tomota madi tapepeko anuwokavatedi,
e bei natudiyao, tubudiyao
be natudiyao adi liuna avinidi.’
8 E woiligu aegu avatugúyala, asakululu Yauwe yaina go, 9 adigo kagu,
‘Guna Tomoya, moitamo im kanuwóiya bogina ababane, tauna akawanoi yaim, kuvakitāuma. Moitamo. Kidi taiyadi tuntunidi go, idi bágala be idi tapepeko kunuwotaōidi be kukabīma kai im kaba lovina.’
10 E Yauwe idigo kana,
‘Kunōve. Kom mam bodao bei akanasiukoimi. Im bodao Isileli tubunao liliudi matadi goi bei guna kaba kainaopa aguinuwedi. Aba kainaopayadi geya vatau tayaamo ame poyapoya ana madabokina goi iguinuwedi. Boda liliudi yaim goi sikaaiyaka bei sigite guna guinuwa, e sopadi akaupatudi. Dogoiyana Yau aguuinuwe yaimi moe dogoi gagaina.
11 Kom be Isileli tubunao liliudi, kaga liliuna ame Yau alatuuwokoimi kokabiikaōne. Kunōve. Kidi Emori tubunao, Kenani tubunao, Eta tubunao, Perisi tubunao, Ivai tubunao be nakae Iyebusi tubunao yaimi goi bei avatapiyedi sisiya. 12 Ami dodōkana. Taabu amo toni kasayadi kokanasiiukōidi, govila bei kidi ami síkwana nakae. 13 Idi kaba kasala koligēidi be idi dídiya kimaasabaidi kokauvisivisīdi be nakae Asera‡ Asera: Ame da Kenani idi yaubada vavina tayamo yoina. Kówala sikaitáoe go, kowalayana Asera ana katumapu nakae. (Tat 23:24). ana kówala aba sakululu kotalāidi.† Atu 12:3, 16:21. 14 Neta konuwaisi, taabu ituli ta yaubada yaina kosaakulūlu. Moe moitamo. Yau Yauwe yoigu Tovakókala; Yau Yaubada vakookoligu. 15 Ami dodōkana. Taabu toni kasa kokanasiiukōidi. Kidi tomatagogoli nakae idi yaubadayao yaidi sisaakululu be yoguyogu sikaumatedi sigabudi go, sikasaledi yaubadayaoyadi yaidi. Go neta siduduwemi, taabu kononōina. Neta kona, bei kidi taiyao idi yoguyoguyaoyadi kaasalaidi kokáika. 16 Aiyuwoina natudiyao vevina bei kokabidi natumiyao monediyao, e vevinayadi pasidi komi natumiyao koroto tomatagogoli nakae bei sisakululu idi yaubadayaoyadi yaidi.
17 Yaubadayadi kainum taabu komaadagīdi bego yaidi kosaakululu.† Tat 20:4; Vin 19:4; Atu 5:8, 27:15.
18 Beredi Pokaka Aikanina bei kowodūgu. Aikaninayana ame nakae: Maliyalina ainima aiyuwo goi beredi pokaka kokakāika tukówana Abib‡ Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana (Abv 12:18). nakae bogina alatuwokoimi. Moe tukowanayana sinaena Itipita goi kosowóduwo.† Tat 12:14-20; Vin 23:6-8; Yoy 28:16-25.
19 Botomoya liliudi, tomota imi botomoyayao be nakae yoguyogu idi botomoyayao, neta bulumakau o sipi o goti, idi botomoyayao liliudi guna kaba lovina.† Tat 13:2. 20 Imi aseyao adi botomoyayao bolamo lami goi kotatetēdi. Lamiyadi kokaumatēdi kokasalēdi yaigu. Go neta geya kotatetedita, e nukotodi kokiguyalīdi.† Tat 13:13. Imi botomoyayao koroto liliudi lami goi kotatetēdi. Taabu nima kaka komamāima matagu goi, go sem mami vininabeso kōma yaigu.
21 Maliyalina ainima tayamo goi kopaisēwa go, maliyalina ainima aiyuwoina goi kowaiwāsi. Bágula ana tuta be dibayoya ana tuta nakae, maliyalina ainima aiyuwoina goi kowaiwāsi.† Tat 20:9-10, 23:12, 31:15, 35:2; Vin 23:3; Atu 5:13-14; Luk 13:14.
22 Wiki Aikanina‡ Wiki Aikanina: Niga Yeisu ina tuta goi ame aikayana yoina Pentikosi.†a Vin 23:15-21; Yoy 28:26-31; Gui 2:1. koowodūgu. Ame youyuwoina Keuwokumgo Aikanina. Ame Aikaninayana goi dibayoya keuwokumgoina bei kokasāle yaigu. Aiyuwoina Lolágata Aikanina†b Vin 23:39-43. koowodūgu tala ana kaba lukavava goi tutayana távina ikavava.
23 Sivato tala tayamo goi komi koroto kōma kosowōduwo Yau Yauwe imi Tomoya, komi Isileli tubunao imi Yaubada, matagu goi. 24 Bei avakumgoiyemi go, boda liliudi avatapiyedi bei sisiya. Nakae imi túwana bei avatudedededi. E kidi geya sipoikikineta bei imi poyapoya sikabimnei tutayana sivato tala tayamo goi koma kosowóduwo Yau Yauwe imi Yaubada matagu goi.
25 Neta yoguyogu bego kokasale yaigu, e yoguyoguyana ikaikaina taabu beredi mana isti taiyao kokaasalēdi yaigu. Nakae yoguyogu Basitáwana Aikanina manuna taabu talainao maniyedi sikesakēsa vanuwo itomo goi.† Tat 12:10.
26 Keuwokumgo dedevina toina imi poyapoya goi bei komēdi Yau Yauwe imi Yaubada yaigu.†a Atu 26:2.
Neta goti bonatuna iwoina kovaipoluye, taabu sinana nununa bwaena goi kovaaipōlu.’†b Tat 23:19; Atu 14:21.
27 E tuwaina Yauwe idigo kana,
‘Ame livalayadi kuginīdi. Livalayadi goi bogina akanasiukoimi, kom be nakae Isileli tubunao liliumi.’
28 E tuwo maliyalina poti (40) be nakae sabamgo poti (40) goi akaaiyaka Yauwe taiyao go, áika be nakae bwae nim geya. Ago gurewayadi aiyuwo goi Yauwe ina kanasíuna ana livala aginidi moe ina lovina yawou.
Mosese maisina itoomoéyala tetelina
29 E aginidi ikavava Koya Sainai goi gurewayadi aiyuwo asouyedi, gurewayadi goi Yaubada ina kaba vatulúkwana ikaaiyaka. Go tutayana asouyedi, sakavaigu maisigu goi itoomoéyala† Mad 17:2; 2Ko 3:7-16. unana Yauwe taiyao kabobóbwara. Go geya ayagoiyeta bego itomoéyala. 30 E Eroni be nakae Isileli tubunao liliudi sigitegu, maisigu itomoéyala go, simatoita bego simekoigu. 31 Tuwo aduduwedi, e Eroni be nakae Isileli tubunao adi tomoyamoyayao liliudi sima alatuwokoidi. 32 Alatuwokoidi ikavava, Isileli tubunao liliudi sima go, lovinayadi liliudi boi Yauwe Koya Sainai goi iivinigu, e tomotayadi alatuwokoidi. 33 Tutayana alatuwokoidi ikavava, areko tayamo akabi, maisigu atabode. 34 Go tuta tamo tamo asiu ana Yauwe matana goi avadigo, e arekoyana avayoini. Nakae ikaaiyaka ana kadókana asowóduwo. Tutayana asowóduwo, ana Isileli tubunao alatuwokoidi kaga nakae Yauwe bogina ilatuwokoigu. 35 Go tutayana sigite bego sakavaigu maisigu goi itomoéyala, e arekoyana akabi, maisiguyana atabodemnei ana kadókana akaluvila ana Yauwe avadigo.
†34:6 Yoy 14:18; Atu 5:9-10, 7:9-10; Nie 9:17; Sam 86:15, 103:8, 145:8; Iyl 2:13; Iyn 4:2.
‡34:13 Asera: Ame da Kenani idi yaubada vavina tayamo yoina. Kówala sikaitáoe go, kowalayana Asera ana katumapu nakae. (Tat 23:24).
†34:13 Atu 12:3, 16:21.
†34:17 Tat 20:4; Vin 19:4; Atu 5:8, 27:15.
‡34:18 Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana (Abv 12:18).
†34:18 Tat 12:14-20; Vin 23:6-8; Yoy 28:16-25.
†34:21 Tat 20:9-10, 23:12, 31:15, 35:2; Vin 23:3; Atu 5:13-14; Luk 13:14.
‡34:22 Wiki Aikanina: Niga Yeisu ina tuta goi ame aikayana yoina Pentikosi.
†a34:22 Vin 23:15-21; Yoy 28:26-31; Gui 2:1.
†b34:22 Vin 23:39-43.
†a34:26 Atu 26:2.