5
Mosese be Eroni Pero matana goi tetelina
1 Moe mlina yau be Eroni kana Pero kalatuwoko, kadigo kama,
‘Yauwe, Tauyana kai Isileli tubunao ima Yaubada, ibóbwara ame nakae kana,
“Guna bodao kutaligēidi bei sima yoyowo goi uyáwana aikanina siwodugu Yau yaigu.” ’
2 Go kina Peroyana idigo kana,
‘Yauwe avatau bego niyana anove, tauna komi Isileli tubunao ataligeimi? Yauwe geya ayagoiyeta geya. Go komi Isileli tubunao geya ataligeimita, geya toina!’
3 Tuwo kai kadigo kama,
‘Kai Iberiu ima Yaubada bogina ivalobodema. Tuwo kutaligēima bei maliyalina aito goi kaketoiya kana yoyowo goi ima yoguyoguyao kagabudi kakasaledi Yauwe ima Yaubada yaina, govila bei vísiya goi o yaviya goi isapima.’
4 Go da Itipita adi tolovinayana ibowoima idigo kana,
‘Mosese be Eroni, manakae tomota idi paisewa go, matadi koobanidi? Kokaluvīla kōna imi paisewa moumouna goi. Woilīmi!’
5 Tauyana tuwaina kana,
‘Konōve! Bodayadi bogina sibadabada go, komi latuwomi idi kogúyala sikalave!’
6 E Pero maliyalina amo goi lovina tayamo ietune ina ina pakonayao adi tolovinao be nakae Isileli tubunao toinidi adi tovakumgoyao ilatuwokoidi idigo kana,
7 ‘Geya tuwaina Isileli tubunao limou kovinīdi idi vaega ana pópwala vaboda manudi‡ Vaega ana pópwala vaboda manudi: Kidi poyapoya be limou sipopolidi. Niga siwodugudi paaevaidi be kalabadabadaidi. Sipopolidi ikavava, sigabudi simalagurewa. Ikavava, sivapopoidi idi vaboda simadagidi. nakae boi, go sem kolovinaēdi kidi sina toinidi limou silusala limou poyapoya ana kailómwana. 8 Boi nakae simadagidi adi badabada nakae ame tuta go, taabu kokupokūpo, tuwo nakae. Moitamo. Kidi suumoyaidi, tauna moe pasina siduduwo kadi,
“Kutagonēma kana ima yoguyoguyao kagabudi kakasale ima Yaubada yaina.”
9 E tuwo paisewa moumouna koroto kovinīdi sikogúyala bei geya itoboinedita livala polapola sitaiyakeke.’
10 E tuwo moitamo paakonidi adi tolovinaoyadi be nakae Isileli tubunao toinidi adi tovakumgoyaoyadi sina tomota silatuwokoidi sidigo kadi,
‘Pero ibóbwara ame nakae kana,
“Yau geya tuwaina bei limou aavinimi. 11 Go komi sem kōna toinimi imi limou kolusāla nako goi itoboinemi kobabane. Imi kogúyala bei geya akupoeta, nakae geya giyaiina geya.” ’
12 Tuwo moitamo tomotayadi sisapa sina Itipita liliuna goi idi limou silusala sisinúkula. 13 E kidi go pakonidiyadi adi tolovinao sisatubetubedi sidigo kadi,
‘Imi katuyáiva ame maliyalinayana kolukavavēdi! Itomo aiyuwoina nakae. Kolukavavēdi boi nakae limou kaavinimi kopaisewa!’
14 E paakonidi adi tolovinaoyadi sina Isileli tubunao idi paisewa ana tovakumgoyao boi sikiinavedi silauidi, sidigo kadi,
‘Kaga unana imi paisewa boile niga ame geya kolukavavedita? Kaga unana vaega be limou adi pópwala be nakae adi kaigábuna adi badabada geya kolukavavedita nakae boi nimatu?’
15 E Isileli tubunao adi tovakumgoyao sitaoya sina sikaukulukúluwo Pero yaina sidigo kadi,
‘Kom manakae im sinapu nakae kai im pakonayao yaima? 16 Limou geya sivinimeta geya, go sem ama tolovinao sibowoima kadi,
“Vaega be limou kopopolīdi, e kogabūdi simalagurewa!”
Go kunōve! Kai im pakonayao silauima unana vaega be limou kamadagidi simalagurewa go, geya sibadebadeta boi nakae go, ame kom be nakae im bodao taiyao imi puwoya!’
17 Go kina Peroyana ipodeda idigo kana,
‘Komi suumoyaimi! Moitamo toina komi suumoyaimi! Moe pasina boi kami,
“Kutagonēma kana ima yoguyoguyao kagabudi kakasaledi Yauwe yaina.”
18 Tauna ame tuta kōna kopaisēwa! Woilīmi! Go limouyana, geya kavinimita, go sem vaega be limou simalagurewa adi badabada boi komaadagidi, e ame tuta nakae komadagīdi.’
19 E Isileli tubunao adi tovakumgoyao bogina siyagoi mou gagaina bei sibabane tutayana silatuwokoidi kadi,
‘Maliyalina tamo tamo poyapoya be limou komaadagidi simalagurewa adi badabada taabu kokupokūpo. Geya kada maliyalina tayamo goi geya.’
20 E tovakumgoyadi Pero sikalave go, sima Eroni be yau ama taiyuwo moetala kaatuyáwata sikamatanakoima. 21 Sikatubolatema sidigo kadi,
‘Yauwe bei igitemi itakinoimi komi toogoyoimi! Komi pasimi Pero be nakae ina pakonayao taiyao sigiteda sikalagiwoleda. Imi guinuwayana sisi nakae bogina kovini bei sisiyana goi sikaumateda.’
22 E akaluvilamna ana Yauwe alatuwoko adigo kagu,
‘Tomoya, kaga unana amo tomotayadi kuyogedegededi? Kaga unana kuetunegu tauyadi yaidi? 23 Tutayana boi agimiima im livala Pero alatuwoko go, ima ame tuta amo tomotayadi iyogedeegededi go, kadago giyaina kuyaveedi.’
‡5:7 Vaega ana pópwala vaboda manudi: Kidi poyapoya be limou sipopolidi. Niga siwodugudi paaevaidi be kalabadabadaidi. Sipopolidi ikavava, sigabudi simalagurewa. Ikavava, sivapopoidi idi vaboda simadagidi.