28
Paulo ina kaiyaka Melite goi
1 Mama dedevina kakayalaga, e kidi toni kasa sima silatuwokoima kadi,
‘Simla ame yoina Melite.’
2 Ago toni kasayadi kai simataogeogema dedevina toina. Nakae siuyaonema be nakae ima yeu sidimili. Idi mataogaogayana moitamo dedevina. Amo tutayana ikuwokúwana, e gogou kakámasa. 3 E Paulo ina alova ipátuma. Ikavava, alovayadi imedi go, tutayana yeu goi iyatoidi, idimili, e moteta mana boláusa yeu yaviyavina pasina alovayadi sinaedi goi isowóduwo. Isowóduwo, Paulo nimana ikakavate. 4 E toni kasa sikandobala motetayana sigite Paulo nimana goi isaisaina. Tuwo taudiva sibobóbwara kadi,
‘Amo korotoyana woi tokaumata tayamo. Moitamo négwasa goi geya ikamaseta go, tuwo ida yaubada Tokivavasa‡ Tokivavasa: Ame da Melite idi yaubada tayamo yoina. geya itagoneyeta tauyana bego ma yawoina ikaaiyaka.’
5 Go Pauloyana nimana ikatusapisapi, e motetayana isou ina yeu goi go, kina mana dedevina, geya tayaamo kaga isowóduwo yaina. 6 E kidi toni kasayadi sidobala Paulo sigitegite go, situyáwata, sinuwonúwana kadi,
‘Giyakainava bei wowona isápala o mainao imataginigini ikapusi isou poyapoya goi ikámasa.’
E tuta maanawena situyáwata geya, tuwo nukotodi sikatuvilavila kadi,
‘Nakona tauyana yaubada tayamo.’
7 E ame dadavayana goi aba lovina tayamo ikaaiyaka, moe asa ina tovakumgo yoina Popiliyo ina kaba lovina. Tauyana maliyalina aito goi iuyaonema be nakae imataogeogema. 8 E ame tutayana Popiliyoyana tamana ikatówana be nakae gamona iilokoina, tuwo kebana goi iimasisi. Tuwo Paulo isiu ina tamanayana igite, manuna ikawanoi Yaubada yaina. Ikawanoi ikavava, tauyana ibisikone, e iboboina. 9 E ikidedevine ikavava, boda liliudi simlayana goi Paulo valena sinove, tuwo madi vísiya sima Paulo yaina ikidedevinedi. 10 Aiyuwoina siwowoinema gagaina, tuwo tutayana bego kasowoya, e ma nimatooma sivalavema, madabokima bogina yoiyama.
Paulo ina sowóduwo Roma goi
11 E tukówana aito simlayana goi bogina kakaiyaka. Moe kelavagoyo ana tuta. Amo tukowanayadi goi da Alekisandira idi oga nakae ikaaiyaka. Ogayana matana goi tokwalu lalavi‡ Tokwalu lalavi: Ame tokwaluyadi yoidi Kasita be Polukisi. sikaaiyaka. E tukowanayadi sikavava, ogayana goi kasowoya. 12 Kasowoya, kakailova kalokoina kana asa Serakiusa goi kavaiu kasou. Kasou, maliyalina aito amoko goi kakaaiyaka. 13 Maliyalinayadi sikavava, ogayana goi kasowoyamna kakailova kalokoina kana asa Regiyoni goi kavaiu kavailówana kamasisi. Kamasisi itomo, yágira youya itowo, tuwo kakailovamna kalokoina. Maliyalina aiyuwoina asa Poteoli goi kavaiu kasou. 14 Kasou, kayava kana asa goi semao nuumisaidi maniyedi kababanedi. Tauyadi siuyaonema gagaina go, sitagona idi vada goi kakaiyaka maliyalina ana badabada ainima aiyuwo. E moe nakae kana Roma.
15 Ago sedao nuumisaidi Roma goi valema sinove, tuwo sima asa Apiyo ina kaba maketi goi be nakae asa Vada Ogaoga Aito goi sivalobodema. Ago kina Paulo igitedi, ikauyagu Yaubada yaina goi go, ikatepatu.
Paulo Roma goi Diyuu yaidi
Yeisu valena italavaite
Yeisu valena italavaite
16 E kaketoiya kana Roma goi kasowóduwo. Kasowóduwo, tovayaviyayao adi tovakumgo itagona bego Paulo toinina ana vada goi ikaaiyaka go, tovayaviya tayamo ikaaiyaka Pauloyana imataakavate.
17 E maliyalina aito sikavava, koroto gagaidi Diyuu yaidi goi iduduwedi sima. E tauyadi sima go, ilatuwokoidi idigo kana,
‘Segowo, yau boi Yerusalema goi geya tayaamo goyo aguinuwe ida bodao yaidi goi be nakae tubudao idi sinapu geya tayaamo akapipilave go, to tuwo Diyuu siyoisibesoigu, e sinavegu da Roma nimadi goi siyatoigu, yau deri ana tokaiyaka. 18 Da Romayadi sikabigu sidovatusigu. Sidovatusigu ikavava, latuwodi bego sitaligeigu unana geya tayaamo goyo yaigu goi sibabane bei itoboinegu akámasa. 19 Nakae latuwodi go, kidi Diyuu geya latuwodi da Roma sitaligeigu, tauna idi nuwonúwana sitalavaite. E moeko goi baige akawanoi bego guna kotu Sisa inove go,† Gui 25:11. geya bego ida bodao awowokoidi Sisa yaina geya, go sem bego kidi idi wowókana alawoiwoiye. 20 Moe pasina tauna aduduwemi koma agitemi. Latuwogu komi koyagoi nimagu siyowóidi kita Isileli tubunao ida lotuta taoyamna pasina.’
21 ‘Kai geya tayaamo leta da Yudiya goi ima ilatuwokoima kom manum. Aiyuwoina geya tayaamo siyada ima kom italavaitem o ikaogoyoem geya. 22 Go kai latuwoma Yeisu ina bodao taviileidi manudi im nuwonúwana kutalavaite, kanove. Valedi bogina kanove bego asa liliudi goi tomota sikaogoyoedi’, tauyadi kaedi.
23 E tuwo idi upa siyato. Niga maliyalinayana ima, e Diyuuyadi badabadaidi sima Paulo ana vada goi ivatulukoidi. Nobuyana giyaina ina lavilavi goi Vala Dedevina ilumavivisi ame nakae: Yaubada ina kalibúbuna italavaite be nakae Yaubada ina Katukeda boi Mosese ivini be tokabivalavala idi gínina goi ipoikíkina itamyabidi bego Yeisu moitamo Guyau. 24 Go ina bóbwara goi maniyedi itamyabidi sinumisa go, maniyedi geya sinumiseta. 25 E Diyuuyadi madi kaumakimaki sisáwala sina. Ego mainao Paulo ina bóbwara tayamo ilatuwokoidi idigo kana,
‘Baloma Kimaasabaina boi nimatu tokabivalavala Aiseya goi ibóbwara moitamo tubumiyao yaidi go, komi ame tuta nakae. 26 Idigo kana,
“Kūna amo tomotayadi kulatuwokōidi kam,
‘Bei kotaiiyakeka go,
geya koyagoiyeta.
Bei kogitagita go,
geya kogitadokoneta.
27 Moitamo. Ame tomotayadi dabadi sikasa,
taiyadi sipatu
be nakae matadi sikibodedi,
govila bei matadi goi sigita,
taiyadi goi sinowo
be nakae nuwodi goi siyagoi,
bei situgavila,
e simekoigu akidedevinedi.’ ”† Mad 13:14-15; Mak 4:12; Iyo 12:40.
Aiseya 6:9-10
28-29 E tauna latuwogu komi koyagoi bego Yaubada ina yava bogina ietune ina Totuyoyowo yaidi go, kidi moitamo bei sinove.’‡ Tomwana 29 nakona Luke geya iginiyeta, go sem tokaidámana tayamo toinina ina nuwonúwana igini. Tomwana 29 ame nakae: Paulo ibóbwara ikavava, kidi Diyuuyadi sina taudiva sikaumakimaki.
30 E tala aiyuwo sinaedi goi Paulo toinina ana vada iiemaisi ikaaiyaka go, avatauwa neta sima sivadade, iuyaonedi. 31 Go avatauwa neta sima yaina, mana katepatu Yaubada ina Kalibúbuna italavaite tomotayadi yaidi. Aiyuwoina ivatulukoidi Tomoya Yeisu Guyau valena manuna. Ago geya vatau tayaamo Paulo isanabode geya.
‡28:4 Tokivavasa: Ame da Melite idi yaubada tayamo yoina.
‡28:11 Tokwalu lalavi: Ame tokwaluyadi yoidi Kasita be Polukisi.
†28:27 Mad 13:14-15; Mak 4:12; Iyo 12:40.
‡28:28-29 Tomwana 29 nakona Luke geya iginiyeta, go sem tokaidámana tayamo toinina ina nuwonúwana igini. Tomwana 29 ame nakae: Paulo ibóbwara ikavava, kidi Diyuuyadi sina taudiva sikaumakimaki.