5
Ananiyasi ma monena sipooikiki
bego tonumisa sikatubaudi tetelina
bego tonumisa sikatubaudi tetelina
1 E koroto tayamo yoina Ananiyasi; monena yoina Sapira. Korotoyana ma monena nakae idi poyapoya sikaigimone. 2 Sikaigimone ikavava, korotoyana ina poyapoya maisana ikabi go, manina maniyena ivagagale toinidi manudi. Go vavina nakae iyagoi kaga monena iguinuwe. E ava mani kesakesaina korotoyana ikabi ime vamoleyanayao ivinidi go, latuwona bego sinuwonúwana maniyana moe ina poyapoya maisana madabokina. 3 E ime ivinidi go, kina Pita idigo kana,
‘Ananiyasi, kaga unana kutagona Kaleya ikalimonem, e Baloma Kimaasabaina yaina kupola go, poyapoya maisana maniyena kuyoisi? 4 Manakae? Mainao poyapoya nava geya kwaigimoneyeta, poyapoyayana moe im kaba lovina ae? Go niga kwaigimone ikavava, maisana moe nava im kaba lovina ae? Tauna manakae nuwom goi kunuwonúwana bego maniyana manuna kupola? Im polayana moe tomota kai yaima geya, go sem moe Yaubada yaina kupola!’
5 E Ananiyasiyana Pita ina livala ame inovedi, ikapusi isou ikámasa. Avatauwa neta tauyana ina kámasa valena sinove, simatoita gagaina. 6 E ikámasa ikavava, tubuwau sitaoya sima tauyana wowona siutube. Siutube ikavava, sikavale sinave valiwoga tukubu sinaena goi sivaliwoge.
7 Go kina Ananiyasiyana monena geya iyagoiyeta kaga bogina isowóduwo monenayana yaina. E nakona awa aito korotoyana ina kámasa mlina monena ima vadayana Pita ikaaiyaka goi isiu. 8 E Pitayana ilumadádana idigo kana,
‘Sapira, kulatuwokōigu boi imi poyapoya kokaigimone, maisana ame nakae?’
‘U. Maisana tauna nakae’, vavinayana kaena.
9 E kina go Pitayana idigo kana,
‘Kaga unana kom ma monem kotagona Yauwe Balomaina kovakakone? Kugīte, tauyadi maine monem bogina sivaliwoge, totom goi sikaaiyaka bei sima sikavalaoduwem maine monem nakae sikavalaoduwe.’
10 E mainao vavinayana ikapusi isou Pita aena goi yawoina ikavava. E tubuwauyadi sisiu sima tauyana sigite bogina ikámasa, tuwo sikavale sinave monena kikina goi sivaliwoge. 11 Moeko goi Tomoya ana totugugunayao liliudi be nakae avatauwa neta vavinayana ina kámasa valena sinovenove simatoita.
Yeisu ina vamoleyanayao
adi yóita be adi talígava tetelidi
adi yóita be adi talígava tetelidi
(Guinuwa 5:12-42)
12 E Yaubada ina vamoleyanayao nimadi goi aba kinana kainaaopaidi badabadaidi iguuinuwedi tomota yaidi. E Yeisu ina tonumisayao liliudi nuwodi tayamo situgúguna vada geya ana vabodamo yoina Solomoni ina veranda goi. 13 Siitugúguna go, tomota maniyedi simatoita, geya latuwodi ina tonumisayaoyadi sisiukoidi, go sem siwowoinedimo. 14 E boda gagaina Tomoya sinumise; tomota badabadaidi, koroto be vevina, Yeisu ina tonumisayaoyadi sisiukoidi. 15 Tauna vamoleyanayao idi guinuwa badabadaidi pasidi tomota sediyao madi vísiya idi liyaliyaka goi sikavaledi simedi enao goi siyatoidi bego Pita ina ketoiya goi nakona nugonina ibisikonedi ikidedevinedi. 16 E asa liliudi Yerusalema kikina goi tomota sediyao madi vísiya be nakae naagovaidi, e liliudi simedi go, madabokidi Yaubada ina vamoleyanayao nimadi goi ikidedevinedi.
17 E tuwo kidi Tonúwala Toolagaina mana bodao, moe kidi Sadusi, sitaoya Yeisu ina vamoleyanayaoyadi sigitedi sivakipikipiyedi gagaina. 18 Tuwo siyoisidi go, deri goi sivaisiudi sikaaiyaka.
19 E kina go Yauwe ina anerose sabamgo goi ima deri totomna ikatupáeve. Ikavava, vamoleyanayaoyadi ikabidi inavedi go, ilatuwokoidi idigo kana,
20 ‘Kōna Vada Kimaasabaina moteoina goi yawana vata valena madabokina kotalavāite tomota yaidi.’
21 Tuwo anerose ina livala sinove, nobuyana nava matagougouna tauyadi sitaoya sina Vada Kimaasabaina ana kali goi tomota sivatuulukoidi Yeisu manuna.
E kidi Tonúwala Toolagaina ma senao Sadusi bogina sitaligógana sima Vada Kimaasabaina goi kotu manuna. Tuwo kotu ana tolovinayao moe Isileli tubunao idi tomoyamoyayao sikatuvagogudi sima baige Vada Kimaasabaina ana polisi maniyedi sietunedi sina deri goi bego vamoleyanayaoyadi sikabidi simedi. 22 Sinonoina go, deriyana sigite tauyadi geya. Tuwo sikaluvila sina tolovinayao silatuwokoidi 23 sidigo kadi,
‘Kana deri kagite niboda goi roka ikaaiyaka be nakae deri ana tomatakavatayao totomna goi siitaoya deri simataakavate go, kakatupáeve, sinaena geya tayaamo tomota kababane geya.’
24 E tutayana ame livalayadi Vada Kimaasabaina ana polisi adi tovakumgo be nakae Tonúwala Gagaidi sinovedi, nuwodi siwówana gagaina go, sinuwonúwana kaga nakona bei isowóduwo ame dogoiyana pasina. 25 E sinuwonúwana go, koroto tayamo ima ilatuwokoidi kana,
‘Konōve, korotoyadi boi koyooisidi deri goi kovaisiudi agitedi Vada Kimaasabaina ana kali sinaena goi siitaoya tomota sivatuulukoidi.’
26 Tuwo polisiyadi madi tovakumgo sina Vada Kimaasabaina goi vamoleyanayaoyadi siyoisidi simedi go, manukaidi siyoisidi simedi. Boda simatooitedi; geya latuwodi bodayadi siegamogamogu, govila bei gurewa sikabidi sikaumatedi. 27 E simedi Diyuu tolovinayadi matadi goi sivataoedi. Tuwo Tonúwala Toolagaina iwowokoidi 28 idigo kana,
‘Manakae? Lovina bogina kavinimi? Lovinayana moe taabu moe Tauyana yoina goi kovaatulūkwana! Go kogīte! Imi vatulúkwana bogina kosanunui ina tomota liliuudi Yerusalema goi! Go imi vatulukwanayana goi komi latuwomi bego moe Tauyana ikaikaina nimama goi ikaaiyaka.’† Mad 27:25.
29 Go kina Pita, tauyana vamoleyanayao adi katumapu, idigo kana,
‘Itoboinema ame manuna Yaubada kakabikaone go, komi geya. 30 Komi boi Yeisu kerose goi kotupatuko ikaaiyaka ana kadókana ikámasa go, ámasa goi tubudao idi Yaubada ikaitaoemnei. 31 Ame Tauyana kina Yaubada ikilagasi tutayana ikailagasi wowoina basekoina kakataina goi itusobu go, ivayoko Yáwana ana Tokaimatana be nakae Toyava, e bei kita Isileli tubunao itoboineda tatugavila go, Yaubada ida goyoyadi inuwotaoidi. 32 Go kai ame dogoiyadi adi totalavaitayao go, Baloma Kimaasabaina nakae adi totalavaita tayamo. Ame Balomayana, avatauwa neta Yaubada sopana sikabiikaone, e ivinidi.’
33 E kidi go tolovinayadi livala ame sinove, gamodi igoyo toina; latuwodi bego Pita be Iyoni sikaumatedi. 34 E nakae idi nuwonúwana go, Parisi tayamo yoina Gameliyeli itaoya. Tauyana moe Yaubada ina Katukeda ana tovatulúkwana. Tomota liliudi siiwowoine. E kotu goi itaoya ilovina bego kidi vamoleyanayaoyadi tuta kaakupina goi sikaiwoduwedi moetala. 35 Sikaiwoduwedi ikavava, e Diyuu adi tolovinayao ilatuwokoidi idigo kana,
‘Segowo Isileli tubunao, ami dodōkana kaga nakona bei koguinuwe amo korotoyadi yaidi. 36 Guna nuwonúwana ataligei. Boi nimatu tauyana Teudasi itaoya toinina ikilagasi ma gaagasina kana,
“Yau koroto tayamo, koroto gagaigu.”
Ago koroto adi badabada aivasi andedi (400) sisiuko. Niga go da Roma sitaoya Teudasiyana sikaumate go, ana tosabokuliyao sisáwala, e ina guinuwa bogina ikavava.
37 Teudasiyana mlina, e Yudasa guma Galili itaoya. Moe tutayana tomota adi katuyáiva ana tuta goi. Go maniyena tomota ilumakikinedi sisabokuliye go, niga Yudasayana nakae ivailai be nakae ana tosabokuliyao sisáwala.
38 Ame tuta nakae. Alatuwokoimi ame korotoyadi kovakilisīdi nakae kokalavēdi go, geya adi liunamo kotaligeidi. Neta ame tauyadi idi nuwonúwana o idi guinuwa moe tomota idi nuwonúwana siguuinuwe, e toinina bei itagau, Teudasi be Yudasa nakae. 39 Go neta idi guinuwa moe Yaubada ina nuwonúwana siguuinuwe, e geya itoboinemita kosanabodedi. Tauna ami dodōkana, govila bei Yaubada yaina kovayaviya.’
E Gameliyeliyana ina nuwonúwana sikabikaone. 40 Tuwo vamoleyanayaoyadi siduduwedi sima. Sima, tolovinayadi silovina bego idi polisi siyoisidi sidabidi. Adi dábina ikavava, tolovinayadi sisanabodedi sidigo kadi,
‘Taabu Yeisu yoina goi kobobōbwara tomota yaidi!’
Sisanabodedi ikavava, sitaligeidi.
41 Tauna kidi vamoleyanayaoyadi kotu goi sisowóduwo go, siuyáwana bego Yeisu yoina pasina itoboinedi omayamaya dábina goi sibabane. 42 Tolovinayadi idi lovina geya sikabikaoneyeta, go sem maliyalina tamo tamo sina Vada Kimaasabaina ana kali sinaena goi be nakae vada tamo tamo goi sivaatulúkwana be Vala Dedevina sitaalavaite bego Yeisu moe Guyau.