1 Opale* Lo 7:7; Kl 2:17; Ip 7:19; 8:5; 10:11 epe maitakao ipanya pilyamo dupa mana setapae dupame naima laitaka pyaakao pyaa naenya, dupanya imambu iki laitaka pilyamo. Ee kana dii lao kundi tata mendaiyaka mailyami dokome kapa pao endakali pii sala epeamino dupa eteteaka auu pisala naenge. 2 Pii sala epeami endakali dupa kundi mendai ikimi etete auu pisiali kandao doko, dupame nyakamanya ingi monapinya koo dupa masala nayao, kundi maingi mana doko kayao piamili. 3 Dopaka doko, ee kana dii lao dupame kundi maingima dokome dupanya koo dupa deaka masina lenge-pyaa. 4 Doko,* Ip 9:13 pulumakao maipapi memepi dupanya taiyoko dupame etete kapa pao koo kunala naenge-pyaa.

5 Dopa* Wee 40:6-8 pianya Kataisa yuunya epeamo gii dokopa baame dapa lea-pyaa:

11 Pitisa* Eke 29:38; Ip 10:1-4 dupa pitakame toya katapala nyakamanya kalai dupa koteaka lao pingima-pyaa. Dupame kundi maingi kalai tata dokoaka paa longosa pingima-pyaa. Dopa pingimaka doko, kundi maingi dupame etete kapa pao koo kunala naenge-pyaa. 12 Dopaka* Ap 2:33; Ip 7:27; 10:10* Wee 110:1 doko, Kataisame koo kunalanya paa mendai iki kundi maiyamo dokome koteaka lao kapa pelyamo. Baame dopa petala baa Gotenya kingi tolae dokonya kalyamo. 13 Dopa* Jo 17:19; Ip 1:3 pyoo katao Goteme Jisasanya yandapipi dupa baanya moko pundipundi katasetamo gii doko malisoo kalyamo. 14 Baame etete epe injisiamo endakali dupa koteaka lao auu pyoo katatamina lao baame kundi mendai ikimi auu pisalakao pisia-pyaa.

15-16 Oli* Ip 8:10* Jet 31:33-34 Sipitisa dokome naima kandao pii dapa langilyamoaka:

19 Dopana,* Ip 7:19 kaimia paluma, Jisasanya taiyoko dokome naima kapa pao Gotenya anda etete epe dokonya kolandao pituu paka nakaelyamano. 20 Baame* Jo 14:16; Ip 6:19-20; 9:8,11-12 lete katenge kaitini mende naimanya lumbekeamo silyamo doko, lapalapa pyatu doko nyoo kapya latala palo eteteaka epe dokonya kolandenge kaitini mende setekea-pyaa. Kaitini doko Jisasa baa. 21 Naimanya* Sak 6:11-12 pitisa mupa doko katao baame naima Gotenya tata doko isilyamo. 22 Baame* Lep 8:30; Ese 36:25; Lo 6:4; Ep 5:26; 1 Pi 3:21 baanya taiyoko dokome naimanya mona dupa wasawasa pyakao naimanya koo tenge masiamano dupa pitaka kunao nepekea-pyaa. Baame endaki auu petae dokome naimanya yonge kaimbu pyekea-pyaa. Dopana, naimame naimanya monanya masingi koo dupa pitaka soo nepatala Gote lao masoo minalakao minatala baa tengesa mona. 23 Naimame* 1 Ko 1:9; Ip 3:2; 4:14; 11:11 masoo malisoo kalyamano dokonya lao pii lao panenge doko mona lapo napaliuu minalakao minamana. Doko, Goteme pitona lateamo dupa pitaka kiningi etete baame pita. 24 Dee naimame naimanya mende lao masa masa petala dupame auu kaenge mana watao minao pituu mana epe minina lao sakatasemanaka. 25 Endakali* 1 Ko 1:8; Ip 3:13 mendapuame pingimali pyoo naimame kaiminingi dupa-pipa kambu pingi mana doko yakinala nayamana. Naimame dupanya mona minao kyoto injisoo katamana. Kataisa dee ipupenge gii doko tengesa petelyamona lao masetala eteteaka kyoto injisoo katamana.

26 Naimame* Ip 6:4-8; 12:17 Kataisanya kiningi pii doko mana nyepala maitakao naima tangeme koo pyuani kayao pitamano kandao doko, koo doko kunina lao naimanya kundi maipenge mende etete nasilyamo. 27 Naimame* Ais 26:11 dopa pitamano kandao doko, naima etete pakame kumao Goteme naima yapatamo dokopa Gotenya yandapipi dupa pitaka tao mulyingima itate etete itaita pipae dokopa dolapo malisoo katapenge jilyamo. 28 Mana* Dit 17:6; 19:15 setapae Goteme Mosese maiyamo dupa endakali mendeme angotamopa endakali lapomapi tepomapi mendeme baa kandatala koo pitamo doko lao pantamino kandao dokopa, endakali doko kondo nakayao kumasepenge. 29 Dopana,* Eke 24:8; Ip 6:6; 9:20; 13:20 Gote Ikiningi doko maita mailyamo endakali doko kandao nyakamame aipa lao masilyamipi? Endakali doko baa eteteaka kenda pipae nyeta. Kataisanya taiyokome pii lao setapae dokome endakali doko eteteaka epe injisia. Dopa piamoaka doko, endakali dokome taiyokome pii lao setapae doko mee injisetala mona epe palenge Sipitisa doko kandao etete mana koo minilyamo. 30 Pii* Dit 32:35-36; Wee 135:14; Mt 12:31-32; Lo 12:19 leamo akali dokome lao pituu, “Koo pinginya yanu nyingi doko nambana, nambame yanu pyatona,” lea-pyaa. Dee baame lao pituu, “Kamongo dokome baanya endakali dupa yapatona,” leamo doko masilyamano. 31 Gote* Mt 10:28 lete katenge dokome endakali yanu nyetopa lao masepeta katatamo kandao doko, etete paka kayapenge mende lamo.

32 Dopaka* Ep 5:14 doko, wamba nyakamame Gotenya tii pipae nyiamino gii doko dee masalapape. Gii dokopa nyakama endakalimi lekeleke andake tasiaminopa tanda longo nao pituwapi kyoto joo kateami. 33 Gii* 1 Ko 4:9 mendapuanya dupame nyakama endakali pitakanya enombasa katatala pii koo lao nyakama kenda pisiami. Dee gii mendapuanya kenda pipae dopale nyiami endakali dupa-pipa nyakama awapa nyiami. 34 Nyakamame* Mt 5:11,40; 6:20; 19:21,29; Ip 13:3 anjetae paleami endakali dupa kondo leami. Dee nyakamanya oapi dupa nyiaminopa nyakamame mona yaepatala nyina kayami. Doko, nyakamame nyakamanya angi etete doko mee silyamo doko koteaka lao setana lao maseteami. 35 Dopana, nyakamame nyakamanya masoo miningi kyoto doko yakinala nayalapape. Dokonya yole andake doko silyamo. 36 Nyakamame* Lu 21:19; Ap 14:22; 1 Te 3:4 Gotenya masilyamoli pimana lawapi baame opale nyetami lateamo dupa nyemana lawapi nyakamame maka nakayao kyoto joo kalyepape. 37 Gii* Ais 26:20; Lu 21:28* Apa 2:3-4 kuki iki sepatamopa akali ipanya pilyamo doko malisala nayao ipata. 38 Dopaka* Lo 1:17; Ga 3:11 doko, masoo miningi dokonya-kaita Goteme nambanya tolataena lelyamo endakali doko lete etete katata. Baa paka setamo kandao doko, nambame baa kandao mona koo palyeto. 39 Dopaka* Lu 21:19; 1 Pi 1:9 doko, naima paka sowapi koyatama endakali daa. Naima masoo miningi endakali dupa pyoo nyepae kalyamano.